ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមលិខិតរបស់ក្រសួងអប់រំ យុវជន និងកីឡា ផ្ញើជូនមន្ទីរអប់រំ រាជធានីខេត្ត ចុះថ្ងៃទី១៦ មិថុនា បានបញ្ជាក់ថា វិញ្ញាសាជម្រើសសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១៨ សីហា ២០២៥ ត្រូវបានកំណត់មុខវិជ្ជា ប្រវត្តិវិទ្យា សម្រាប់ថ្នាក់វិទ្យាសាស្រ្ត និងមុខវិជ្ជាផែនដី និងបរិស្ថានវិទ្យា សម្រាប់ថ្នាក់វិទ្យាសាស្រ្តសង្គម។
ជារៀងរាល់ឆ្នាំក្រសួងអប់រំ បានកំណត់វិញ្ញាសាចំនួន៧មុខវិជ្ជាសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ក្នុងនោះសម្រាប់ថ្នាក់វិទ្យាសាស្រ្ត រួមមាន ជីវវិទ្យា, គីមីវិទ្យា, រូបវិទ្យា, អក្សរសាស្រ្តខ្មែរ, គណិតវិទ្យា, ភាសាបរទេស និងប្រវត្តិវិទ្យា។ រីឯថ្នាក់វិទ្យាសាស្ត្រសង្គមវិញ មាន អក្សរសាស្រ្តខ្មែរ, គណិតវិទ្យា, ភាសាបរទេស, ភូមិវិទ្យា, ប្រវត្តិវិទ្យា, សីលធម៌ ពលរដ្ឋវិជ្ជា និងផែនដី និងបរិស្ថានវិទ្យា។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ក្នុងការប្រឡងមធ្យមសិក្សាទុតិយភូមិ ឬបាក់ឌុប សិស្សានុសិស្សមិនតម្រូវឱ្យប្រឡងគ្រប់មុខវិជ្ជាដែលសិក្សាក្នុងកម្មវិធីសិក្សាទេ គឺមានមុខវិជ្ជាតម្រូវដែលប្អូនៗត្រូវប្រឡងអាស្រ័យតាមបណ្តុំដែលប្អូនៗសិក្សាថា ជាបណ្តុំវិទ្យាសាស្ត្រ ឬវិទ្យាសាស្ត្រសង្គម។ បើតាមលោកជំទាវ ក្រៅពីមុខវិជ្ជាតម្រូវ មុខវិជ្ជាជម្រើស សម្រាប់ថ្នាក់វិទ្យាសាស្រ្ត គឺត្រូវ ជ្រើសរើស មួយមុខវិជ្ជា ក្នុងចំណោមមុខវិជ្ជា ភូមិវិទ្យា ប្រវត្តិវិទ្យា សីលធម៌-ពលរដ្ឋវិជ្ជា និង ផែនដី និងបរិស្ថានវិទ្យា។ ដោយឡែកមុខវិជ្ជាជម្រើសថ្នាក់វិទ្យាសាស្រ្តសង្គម ត្រូវជ្រើសរើសមួយមុខវិជ្ជាក្នុងចំណោម រូបវិទ្យា គីមីវិទ្យា ជីវវិទ្យា និង ផែនដី និង បរិស្ថានវិទ្យា។
សូមជំរាបជូនថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ បានកំណត់ធ្វើនៅពាក់កណ្តាលខែសីហាខាងមុខនេះ ដែលនៅមិនដល់២ខែទៀតនោះទេ ដែលបេក្ខជនថ្នាក់ទី១២ ត្រូវត្រៀមខ្លួនសម្រាប់ការប្រឡងដ៏សំខាន់នេះ៕
