ក្រៅពីបានដឹងអ្វីទៅជាគុណសម្បត្តិ នៃអំណាន និងការធ្វើកំណត់ត្រាអំណាន, ជាសកម្មភាពបន្ទាប់គឺចាប់ផ្តើមស្វែងយល់ពីគន្លឹះ ឬក៏វិធីសាស្រ្តនៃការសរសេរកំណត់ហេតុពេលអានប្រកបដោយប្រសិទ្ធភាព និងភាពងាយស្រួល។

តាមរយៈ​គេហទំព័រ Wondr បានបង្ហាញ៥ចំណុច នៃការចាប់ផ្តើមសរសេរកំណត់ហេតុ ដោយមានរៀបរាប់ជូននៅខាងក្រោម ៖

១. តាមដានរាល់សៀវភៅដែលធ្លាប់អាន ៖ មូលដ្ឋានគ្រឹះ នៃការចាប់ផ្តើមសរសេរសៀវភៅកំណត់ហេតុ នៅគ្រាដំបូង គឺការតាមដានឱ្យដឹងពីប្រភេទសៀវភៅទាំងអស់ដែលខ្លួនឯងបានអានកន្លងមក ព្រោះនៅពេលដែលតាមដានបានទៀងទាត់ គឺនឹងផ្តល់ភាពងាយស្រួល នៅពេលមាននរណាម្នាក់សុំការណែនាំ ឬក៏បទពិសោធន៍ពាក់ព័ន្ធនឹងការអានផ្ទាល់ខ្លួនរបស់អ្នក។ ម្យ៉ាងវិញទៀតការតាមដានធ្វើឱ្យលោកអ្នកមានវិធីផ្តល់ព័ត៌មានដោយលម្អិតមិនថា អ្នកនិពន្ធ កាលបរិច្ឆេទ និងខ្លឹមសារសង្ខេបៗជាដើម។ ក្រៅពីនោះការតាមដានប្រវត្តិនៃការអាន បានរួមចំណែកឱ្យអ្នកអានផ្ទាល់អាចដឹងថា តើទៅពេលខាងមុខ គេត្រូវជ្រើស ឬទិញសៀវភៅបែបណា? ដើម្បីឱ្យការវិនិយោគលើអំណាន កាន់តែចំគោលដៅ និងមានប្រសិទ្ធភាព។

២. កត់ទុកអំពីគោលដៅនៃការអាន ៖ ការកំណត់ពេលវេលាមានភាពខុសប្លែកគ្នាទៅតាមមនុស្សម្នាក់ៗ អ្នកអានខ្លះចូលចិត្តចាប់ផ្តើមនៅដើមឆ្នាំ រីឯអ្នកអានខ្លះទៀតចូលចិត្តប្រមូលសៀវភៅមកអានបញ្ចប់នៅចុងឆ្នាំ ដោយឡែកអ្នកអានមួយចំនួនទៀតបានធ្វើវាជាទៀងទាត់ ព្រោះតែគេបានប្រើប្រាស់បច្ចេកវិទ្យាជាជំនួយនៅពេលអាន។ មិនថារបៀបនៃការជ្រើសការអានតាមវិធីណានោះទេ អ្វីដែលសំខាន់ គឺការសរសេរផែនការ និងការកំណត់គោលដៅជាគោលសិន។ ការកំណត់គោលដៅនៃការអាន បង្កភាពងាយស្រួលដល់ការបែងចែកសៀវភៅ មិនថាប្រលោមលោកបែបបុរាណ ​និងសម័យ ប្រភេទសៀវភៅបកប្រែ សៀវភៅបែបរឿងនិទាន ប្រវត្តិសាស្រ្ត ឬជំនាញនីមួយៗ រួមទាំងសៀវភៅពាក់ព័ន្ធនឹងការថែទាំសុខភាពផ្លូវចិត្ត។ ការកំណត់គោលដៅ ក៏ត្រូវពឹងផ្អែកទៅលើទិន្ន័យនៃការតាមដានប្រវត្តិដែលបានអានកន្លងមក ដើម្បីឱ្យដឹងថាត្រូវបន្ថែមប្រភេទសៀវភៅបែបណាចូលទៅក្នុងគោលដៅឆ្នាំថ្មី។

៣. សរសេរចំណាប់អារម្មណ៍ផ្ទាល់ខ្លួនអំពីសៀវភៅ ៖ ក្រោយការអានសៀវភៅ មនុស្សនឹងមានគំនិតបន្ថែម និងមានថាមពល ក្នុងការលើកយកគំនិតពីសៀវភៅដែលបានអានទាំងនោះ ដើម្បីចែកជូនទៅកាន់អ្នកដទៃ ឬក៏ផ្ទុកជាឯកសារសម្រាប់ខ្លួនឯង។ ដូច្នេះការមានទម្លាប់សរសេរ ឬនិយាយអំពីចំណាច់អារម្មណ៍ផ្ទាល់ខ្លួនក្រោយការអាន ចាត់ថាជាវិធីវិជ្ជមានមួយ។ ការសរសេរពីចំណាប់អារម្មណ៍ទៀតសោត គឺពុំចាំបាច់មានរបៀបវារៈពេកនោះទេ ហើយដើម្បីឱ្យកាន់តែមានភាពងាយស្រួល គឺជ្រើសយកខ្លឹមសារមួយ ឬពីរដើម្បីយកមកវិភាគលម្អិត និងបង្ហាញពីទស្សនៈផ្ទាល់ខ្លួន។ ​កាលដែលបង្ហាញពីចំណាប់អារម្មណ៍ផ្ទាល់ខ្លួនក្រោយការអាន គឺបានបង្កើនការចងចាំអំពី​សៀវភៅទាំងនោះ តើមានភាពស៊ីជម្រៅកម្រិតណា ហើយបើមាននរណាម្នាក់មកសាកសួរអំពីសៀវភៅដែលលោកអ្នកបានអាន នោះគឺមិនពិបាកក្នុងការស្រាយចម្ងល់ទៅកាន់អ្នកដទៃឡើយ។

៤. ធ្វើតារាងលម្អិតអ្វីដែលអ្នក​ខ្លួនចូលចិត្ត ៖​ ពេលដែលអានចុះ អានឡើង គឺជៀសពុំរួចពីការភ្លេចភ្លាំងខ្លះៗ ឬការបាត់ទិន្នន័យនៃអំណាន ឬចំនួនសៀវភៅនោះទេ។ ដូច្នេះដើម្បីជាវិថី នៃការដោះស្រាយទៅនឹងបង្ហានេះ គឺការធ្វើតារាងលម្អិតនូវអ្វីដែលខ្លួនចូលចិត្ត មិនថាចំនួនសៀវភៅ ឬសៀវភៅដែលបានអានរួច និងមិនទាន់បានអាន និងការគូសចំណាំ ឬឱ្យពិន្ទុផ្ទាល់ខ្លួនទៅលើសៀវភៅនីមួយៗបន្ទាប់ពីអាន។ កំណត់ហេតុនៃសៀវភៅ ជួយឱ្យកាន់តែចំណាំ ប៉ុន្តែការធ្វើតារាងលម្អិតរឹងរឹតតែធ្វើឱ្យមានភាពច្បាស់លាល់ទៅលើទិន្នន័យអំណាន។

៥. រក្សាទុកនូវប្រយោគដែលខ្លួនស្រឡាញ់ ៖​ អានប្រៀបដូចជា ដំណើរផ្សងព្រេងមួយ ដើម្បីស្វែងរកពាក្យពេចន៍លើកទឹកចិត្តខ្លួនឯង ដូច្នេះនៅពេលរកបានពាក្យលើកទឹកចិត្តពេលកំពុងអាន គួរតែកត់ត្រាទុក ឬក៏យកទៅបិទលើជញ្ជាំង ក៏ដូចជាកន្លែងណាមួយដែលខ្លួនពេញចិត្ត។ ការកត់ត្រាប្រយោគដែលខ្លួនចូលចិត្ត ទៅក្នុងកំណត់ត្រានៃការអាន ផ្តល់ភាពងាយស្រួលនៅពេលអនាគត និងមានភាពងាយស្រួលក្នុងការចែករំលែកទៅកាន់អ្នកដទៃផង៕