ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មនុស្សត្រូវការផ្សារភ្ជាប់ទំនាក់ទំនងគ្នា ការជ្រោមជ្រែងគ្នា និងការអភិវឌ្ឍន៍ផ្នែកបញ្ញាស្មារតីជាប្រចាំ ដែលជាហេតុធ្វើឱ្យមនុស្សបង្កើតសម្ព័ន្ធភាពជាគ្រួសារ ជាក្រុម ក្នុងការរស់នៅដើម្បីផ្តល់ការគាំទ្រគ្នា ជាលក្ខណៈគ្រួសារ ឬបែបជាបងប្អូន និងតាមរយៈមិត្តភាពជាដើម។ គេហទំព័រ Child Focus បានបង្ហាញអំពីភាពប្រទាក់ក្រឡាគ្នា រវាងទំនាក់ទំនងវិជ្ជមានចំពោះសុខភាពផ្លូវចិត្ត និងសុខុមាលភាពចំពោះកុមារ ក៏ដូចជាក្រុមមនុស្សទូទៅ។
តាមរយៈគេហទំព័រនេះដដែល បានឱ្យដឹងថា ទំនាក់ទំនងវិជ្ជមាន ដើរតួនាទីយ៉ាងសំខាន់ទៅកាន់គុណភាពនៃសុខុមាលភាព និងសុខភាពផ្លូវចិត្ត មិនថាទំនាក់ទំនងជាមួយគ្រួសារ មិត្តរួមការងារ មិត្តភ័ក្ដិ ឬពីសំណាក់ក្រុមមនុស្សណាម្នាក់នោះទេ សុទ្ធសឹងតែដើរតួនាទីក្នុងការពង្រឹងសុខភាពផ្លូវចិត្តផ្ទាល់ខ្លួន។ ដោយឡែកបុគ្គលដែលស្ថិតក្នុងស្ថានភាពឯកោយូរៗ ឬបុគ្គលដែលមានទម្លាប់ដាក់ខ្លួនឱ្យស្ថិតក្នុងបរិយាកាសអវិជ្ជមាន បានជះឥទ្ធិពលមិនល្អទៅកាន់សុខភាពផ្លូវចិត្តរបស់ពួកគាត់។
គួរជម្រាបជូនថា ទំនាក់ទំនងវិជ្ជមាន មិនមែនជាដំណោះស្រាយតែមួយជួយទ្រទ្រង់សុខភាពផ្លូវចិត្តនោះទេ ប៉ុន្តែជាចំណែកមួយ ក្នុងការពង្រឹងសុខភាពផ្លូវចិត្ត ក៏ដូចជាសុខុមាលភាពជាទូទៅ។
និយមន័យទំនាក់ទំនងវិជ្ជមាន ៖ ទំនាក់ទំនងវិជ្ជមានសំដៅលើការមានទំនាក់ទំនងដែលផ្តល់ការគោរព ការគាំទ្រ ផ្តល់ទំនុកចិត្ត និងការសន្ទនាដែលមានប្រសិទ្ធភាព។ បន្ថែមពីនោះក៏មានជជែកអំពីកិច្ចសហការណ៍ និងការរួបរួមគ្នាដើម្បីគោលដៅរួមណាមួយ ដែលផ្សារភ្ជាប់ទស្សន:វិស័យ និងការបំពេញគ្នាទៅវិញទៅមក តាមរយៈការធ្វើទំនាក់ទំនងគ្នា។ ជារួមមានន័យថា ទំនាក់ទំនងវិជ្ជមានរួមបញ្ចូលទាំងការផ្សាភ្ជាប់គ្នានៃការរស់នៅ ដែលផ្តោតទៅលើចំនួនមនុស្សផង និងគុណភាពនៃការរាប់រកគ្នាផង។
ទំនាក់ទំនងគ្រួសារ និងសុខុមាលភាព ៖ ទំនាក់ទំនងជាមួយគ្រួសារ មានសារៈសំខាន់ទៅក្នុងសុខុមាលភាព និងសុខភាពផ្លូវចិត្ត ព្រោះអាចកាត់បន្ថយភាពតានតឹង អាការៈបាក់ទឹកចិត្ត។ បរិយាកាសគាំទ្រពីគ្រួសារ បានបង្កើននូវអារម្មណ៍សុវត្ថិភាព មានភាពជាម្ចាស់ កាត់បន្ថយអារម្មណ៍ឯកោ និងការផ្តាច់ខ្លួននៅដាច់ដោយឡែក។ ការគាំទ្រផ្នែកផ្លូវចិត្ត និងផ្លូវអារម្មណ៍ពីគ្រួសារ រួមចំណែកក្នុងការកាត់បន្ថយហានិភ័យនៃបញ្ហាសុខភាពផ្លូវចិត្ត។
មានទំនាក់ទំនងរឹងមាំជាមួយគ្រួសារ ក៏បានរួមចំណែកអភិវឌ្ឍន៍ទៅកាន់គុណតម្លៃនៃជីវិតផ្ទាល់ខ្លួន នៅពេលដែលបុគ្គលម្នាក់ៗ ទទួលបាននូវអារម្មណ៍យកចិត្តទុកដាក់ ការស្រឡាញ់ និងការទទួលស្គាល់ពីគ្រួសារ នោះពួកគេកាន់តែមើលឃើញខ្លួនឯងនៅក្នុងរូបភាពល្អៗ និងទស្សនៈវិជ្ជមាន និងការស្គាល់ពីគុណតម្លៃនៃខ្លួនឯង។
បន្ថែមពីនោះ ទំនាក់ទំនងរឹងមាំជាមួយគ្រួសារក៏ជះឥទ្ធិពលវិជ្ជមានទៅកាន់សុខភាពផ្លូវកាយផងដែរ ព្រោះតាមរយៈការផ្តល់ ការគាំទ្រចេញពីគ្រួសារ មិនត្រឹមតែជួយកាត់បន្ថយស្ត្រេស ប៉ុន្តែបានរួមចំណែកទៅកាន់សុខភាពបេះដូង ព្រោះចង្វាក់បេះដូងចាប់ផ្តើមដើរល្អ នៅពេលដែលសុខភាពផ្លូវចិត្ត មានភាពល្អប្រសើរ។
មិត្តភាពដែលមានផាសុកភាព និងទំនាក់ទំនងវិជ្ជមាន ៖ មិនខុសគ្នាទៅនឹងទំនាក់ទំនងដទៃឡើយ មិត្តភាពដែលល្អ បានផ្តល់ផលជាវិជ្ជមានទៅកាន់សុខភាពផ្លូវចិត្ត ដោយសារទំនាក់ទំនងទាំងនេះ បានផ្តល់នូវអារម្មណ៍កក់ក្តៅ ការគាំទ្រ រួមទាំងការស្វែងរកអត្ថន័យ នៃជីវិត នេះដោយសារតែពួកគេមានវ័យប្រហាក់ប្រហែលគ្នា ដែលជាហេតុមិនពិបាកក្នុងការសេពគប់គ្នា ឬក៏រក្សាទំនាក់ទំនងនឹងគ្នា មួយវិញទៀតចំណូលចិត្តអំពីការកម្សាន្ត និងការហូបចុក ក៏មិនសូវខុសជំនាន់គ្នានោះដែរ។ បន្ថែមពីនោះ មិត្តភាពក៏បានពន្លឿនឱ្យរកឃើញអត្តសញ្ញាណផ្ទាល់ខ្លួន និងការផ្តល់កម្លាំងចិត្តចំពោះគ្នាទៅវិញទៅមក៕
