បំបៅកូនដោយទឹកដោះម្ដាយ ជួយឱ្យកុមារមានសុខភាពរឹងមាំ និងអភិវឌ្ឍបញ្ញាឈ្លាសវៃ។ ទន្ទឹមគ្នានេះ ទឹកដោះដំបូងរបស់ម្តាយមានសារធាតុរាវម្យ៉ាងដែលក្នុងសារធាតុនោះផ្ទុកទៅដោយប្រូតេអ៊ីន និងសារធាតុចិញ្ចឹមចាំបាច់សម្រាប់ទារក។ ដូច្នេះ ការបំបៅកូនដោយទឹកដោះម្តាយមានសារប្រយោជន៍ពេញមួយជីវិត។

យ៉ាងណាមិញ បញ្ហាគ្មានទឹកដោះ អាចជាក្តីបារម្មណ៍សំរាប់អ្នកម្តាយជំនាន់ថ្មី ជាពិសេសអ្នកម្តាយដែលមានកូនដំបូង ហើយបញ្ហានេះវាអាចធ្វើឱ្យមានភាពតានតឹង និងថប់អារម្មណ៍ជាប្រចាំ។ ដើម្បីដោះស្រាយបញ្ហាគ្មានទឹកដោះ និងជួយឱ្យអ្នកម្ដាយអាចផលិតទឹកដោះបាន គេហទំព័រ Verywell Family បានណែនាំនូវ​ភេសជ្ជៈ ៣ប្រភេទ ដែលវាជួយជំរុញការផលិតទឹកដោះ។

ទី១. តែជំនួយការផលិតទឹកដោះ (Nursing Teas) ៖ តែជំនួយការផលិតទឹកដោះ គឺជាជម្រើសណែនាំមួយដ៏ល្អបំផុតសម្រាប់អ្នកម៉ាក់ដែលចង់ជំរុញការផលិតទឹកដោះ។ ជំនួយការផលិតទឹកដោះនេះ ជាឱសថរុក្ខជាតិមួយប្រភេទផ្សំបញ្ចូលគ្នាពីប្រភេទឱសថរុក្ខជាតិជាច្រើនទៀត ដើម្បីគាំទ្រការបំបៅកូន និងផលិតទឹកដោះម្ដាយ។ ឱសថរុក្ខជាតិដែលមានក្នុងតែជំនួយការផលិតទឹកដោះ រួមមាន គ្រាប់តែ Fenugreek, ដើម Blessed thistle, ស្លឹក Milk Thistle និងម៉ើម fennel។ ក្រៅពីការបង្កើនការផលិតទឹកដោះ តែនេះក៏ជួយឱ្យមានផាសុខភាព និងអារម្មណ៍ល្អ។

ទី២. ទឹកដោះគោស្រូវសាលី (Oat Milk) ៖ ស្រូវសាលី គឺជាគ្រាប់ធញ្ញជាតិដែលត្រូវបានបញ្ជាក់ថា អាចជំរុញការផលិតទឹកដោះម្ដាយ។ ស្រូវសាលី មានផ្ទុកជាតិសរសៃ ហៅថា beta-glucan ដែលអាចបង្កើនកម្រិតអរម៉ូន (prolactin) នៅក្នុងខ្លួន។ ម៉្យាងវិញទៀត ទឹកដោះគោស្រូវសាលី គឺជាភេសជ្ជៈដែលផលិតពីស្រូវសាលីមានរសជាតិផ្អែមបែបធម្មជាតិ។ លើសពីនេះ អាចទទួលទានតែឯង ឬបន្ថែមជាមួយគ្រាប់ធញ្ញជាតិបាន។

ទី៣. ទឹកពិសាបរិសុទ្ធ (Water) ៖ ទឹកពិសាបរិសុទ្ធ គឺជាវិធីសាមញ្ញបំផុតដើម្បីធានាថារាងកាយរបស់អ្នកអាចផលិតទឹកដោះបានច្រើនសម្រាប់កូនរបស់អ្នក។ ក្នុងអំឡុងពេលបំបៅកូនដោយទឹកដោះម្តាយ អ្នកម្ដាយគួរតែទទួលទានទឹកឱ្យបានច្រើនជាងបរិមាណដែលត្រូវការ។ នេះដោយសារតែទឹកដោះម្តាយមានជាតិទឹក ៨៧% ហើយអំឡុងពេលក្រោយសម្រាល រាងកាយបាត់បង់ជាតិទឹកច្រើនជាងធម្មតា។ ដូច្នេះ ព្យាយាមទទួលទានទឹកប្រហែល ៨ពែងក្នុងមួយថ្ងៃ។

បើតាមគេហទំព័រ Kelly mom ទឹកដោះដំបូងរបស់ម្ដាយ (Colostrum) ត្រូវបានផលិតនៅពាក់កណ្ដាលវដ្ដ ឬនៅចន្លោះសប្ដាហ៍ទី១៦ និងទី២២ នៃការមានផ្ទៃពោះ ដោយម្ដាយភាគច្រើនមិនបានចាប់អារម្មណ៍ថា រាងកាយមានការផលិតនូវទឹកដោះដំបូង ព្រោះទឹកដោះដំបូងមិនងាយហៀរចេញ ឬងាយច្របាច់មកខាងក្រៅ។ ម៉្យាងទៀត ទឹកដោះដំបូង (Colostrum) ជាប្រភេទទឹកដោះដែលសម្បូរដោយសារធាតុចិញ្ចឹមចម្រុះ ក៏ដូចជាសម្បូរទៅដោយប្រព័ន្ធការពាររាងកាយដែលជួយបញ្ចៀសទារកពីការឆ្លងនូវមេរោគផ្សេងៗ ។ នៅថ្ងៃដំបូងនៃការសម្រាលរួច ម្ដាយអាចបញ្ចេញទឹកដោះបានប្រហែលជា៣០ ទៅ៦០មីលីលីត្រ ក្នុងរយៈពេល ២៤ម៉ោងដំបូង ក្នុងអំឡុងពេលបំបៅទារកម្ដងៗ ។ ទឹកដោះម្ដាយអាចបញ្ចេញបានប្រហែលជា ២ទៅ១០មីលីលីត្រ ដែលសមស្របសម្រាប់ប្រព័ន្ធផ្លូវអាហាររបស់ទារកទើបនឹងកើត៕