ភ្នំពេញ – លោកជំទាវ ប្រាក់ សោភ័ណនារី រដ្ឋលេខាធិការក្រសួងសុខាភិបាល បានមានប្រសាសន៍ថា ការបំបៅកូនដោយទឹកដោះម្ដាយ នឹងជួយ​ឱ្យ​កូនមានសុខភាពល្អ ប្រាជ្ញាឆ្លាតវៃ ពីព្រោះទឹកដោះម្ដាយជាអាហារមួយល្អឥតខ្ចោះ ដែលនៅក្នុងខ្លួនម្ដាយ មិនប៉ះពាល់ធូលីដី មិនភ័យព្រួយជូរផ្អូម ឬមានសារធាតុគីមី។ លោកជំទាវ លើកឡើងបែបនេះ ក្នុងឱកាសចុះទស្សនកិច្ចគម្រោងលើកកម្ពស់អាហារូបត្ថម្ភនៅកន្លែងធ្វើការ នៅមន្ទីរកិច្ចការនារីខេត្តកំពង់ធំ កាលពីពេលថ្មីៗនេះ ។

លោកជំទាវ ប្រាក់ សោភ័ណនារី បន្ថែមថា អំឡុងពេលមានផ្ទៃពោះស្រ្តីត្រូវការរបបអាហាររូបត្ថម្ភដែលមានសារធាតុចិញ្ចឹមគ្រប់គ្រាន់មិនត្រឹមតែទ្រទ្រង់រាងកាយ ប៉ុន្តែសម្រាប់ទ្រទ្រង់ដល់ទារកក្នុងផ្ទៃ ដើម្បីធ្វើយ៉ាងណាឱ្យម្ដាយមានសុខភាពល្អ កូនក្នុងផ្ទៃក៏ទទួលបានសុខភាពល្អផងដែរ ។ ទន្ទឹមនឹងទៅពិនិត្យផ្ទៃពោះឱ្យបានទៀងទាត់ចំនួន៤ដងហើយ សូមម្ដាយទៅសម្រាលកូននៅមូលដ្ឋានសុខាភិបាល ដើម្បីសុខសុវត្ថិភាពទាំងម្ដាយទាំងកូន ។ កត្តាសំខាន់នៅពេលសម្រាលហើយភ្លាម យើងត្រូវតែយកកូនមកដាក់លើទ្រូង ដើម្បីឱ្យស្បែកប៉ះស្បែក យ៉ាងហោចណាស់ឱ្យបាន ៩០នាទី ធ្វើបែបនេះដើម្បី ទី១.កូនទទួលបានភាពកក់ក្ដៅពីម្ដាយ ២.កូនឆាប់បៅទឹកដោះម្ដាយ ។

រដ្ឋលេខាធិការក្រសួងសុខាភិបាលបន្ថែមថា ការចិញ្ចឹមកូនដោយទឹកដោះម្ដាយដែលមានសុខភាពល្អ អត្ថប្រយោជន៍មិនត្រឹមតែទទួលបានតែកូនទេ ម្ដាយក៏ទទួលបានប្រយោជន៍ដែរ ដោយទី១.ម្ដាយទទួលបានសុខភាពល្អ, ២.ចំណេញប្រាក់ដោយមិនបានចំណាយផ្ដេសផ្ដាស, ៣.កាត់បន្ថយជំងឺមហារីកសុដន់ និងមហារីកដៃស្បូន។ ទន្ទឹមគ្នានេះ ស្រ្តីដែលយល់ដឹងអំពីការហូបចុកបានត្រឹមត្រូវ គ្មានបញ្ហាភ័យព្រួយពីបញ្ហាកង្វះអាហារូបត្ថម្ភសម្រាប់កូន និងម្ដាយនោះឡើយ។

លោកជំទាវ ប្រាក់ សោភ័ណនារី រដ្ឋលេខាធិការក្រសួងសុខាភិបាល

“ទឹកដោះម្ដាយល្អមែនទែន មានគ្រប់សារធាតុចិញ្ចឹម មានទាំងសុវត្តិភាព និងគុណភាព ហើយនៅក្នុងខ្លួនម្ដាយផ្ទាល់ ចង់ឱ្យកូនបៅពេលណា នៅកន្លែងណាបានកន្លែងនោះ ហើយសំខាន់គឺមិនចំណាយលុយកាក់សូម្បីតែមួយរៀល”

បើតាមលោកជុំទាវ ប្រាក់ សោភ័ណនារី ទោះបីជាម្ដាយមានការងារធ្វើ មិនថាធ្វើការងាររាជការ ការងារឯកជន ការងានៅក្នុងក្រុមហ៊ុន ឬរោងចក្រជាដើម កុំមានគំនិតថា ធ្វើការមិនអាចបំបៅដោះកូនបាន ឬតាមអនុសាសន៍ក្រសួងសុខាភិបាលឱ្យបំបៅកូនឱ្យបាន៦ខែ គឺនៅតែអាចបំបៅកូនរបស់គាត់បានដដែល។ ទន្ទឹមគ្នានេះ រាជរដ្ឋាភិបាលផ្ដល់មាតុភាពឱ្យស្រ្តី៣ខែ អាចនៅជាមួយកូនគ្រប់ពេលវេលានៅក្នុងការបំបៅដោះកូន ប៉ុន្តែក្រោយពេល៣ខែ ពេលចូលធ្វើការវិញ គាត់ក៏នៅមានឱកាសបំបៅកូនដោយទឹកដោះម្ដាយបាន។

លោកជំទាវ បន្តថា បច្ចុប្បន្ន ក្រសួងសុខាភិបាលបានសហការជាមួយអង្គការហេឡែន ខេលល័រ ប្រចាំកម្ពុជា និងគម្រោងម៉ូស៊ីហ្វូ របស់អង្គការ GIZ បានរៀបចំបន្ទប់បំបៅដោះកូននៅតាមកន្លែងធ្វើការមួយចំនួនដែលជាឱកាសមួយងាយស្រួលទោះជាគាត់យកកូនមកជាមួយក៏ដោយ ឬមិនយកកូនមកគាត់ក៏អាចច្របាច់ទឹកដោះទុកឱ្យកូនគាត់ក្នុងទូទឹកកក និងធុងទឹកកកបានផងដែរ។ ទន្ទឹមគ្នានេះ ប្រសិនបើម្ដាយឱ្យកូនបៅកាន់តែច្រើន ទឹកដោះផលិតកាន់តែច្រើន ដែលខុសពីការញ៉ាំអាហារផ្សេងៗ។

តាមលោកជំទាវ ប្រាក់ សោភ័ណនារី ការចូលដល់វ័យដែលត្រូវធ្វើជាម្ដាយរបស់គេ ជាវ័យមានគ្រួសារ តែងចង់បង្កើតគ្រួសារមួយដែលមិនមែនជាការបង្កើតគ្រួសារហើយមានកូនទៅរួចរាល់នោះទេ មានន័យថា ត្រូវបង្កើតឱ្យមានគ្រួសារមួយដែលមានភាពកក់ក្ដៅ មានគុណភាពនៅក្នុងការរស់នៅទាំងសុខភាព និងជីវភាពរស់នៅ ហើយកូនៗមានសុខភាពល្អ និងរឹងមាំទាំងអស់គ្នា។

លោក ហ៊ូ ក្រើន នាយកអង្គការហេឡែនខេលល័រ ប្រចាំកម្ពុជា បានលើកឡើងថា បច្ចុប្បន្នអង្គការ សម្រេចជោគជ័យលើគម្រោងរៀបចំបន្ទប់បំបៅដោះកូននៅតាមកន្លែងធ្វើការបាន ៨០ភាគរយ នៃផែនការគ្រោងទុក។ លោកបន្តថា ក្រោយសម្រេចផែនការទី១រួច អង្គការ នឹងបន្តគម្រោងពង្រីកទៅតាមបណ្ដាខេត្តផ្សេងៗទៀត នៅឆ្នាំ២០២៤ខាងមុខ។

លោក ហ៊ូ ក្រើន នាយកអង្គការ ហេឡែន ខេលល័រ ប្រចាំកម្ពុជា

“ម្ដាយមកធ្វើការនៅភ្នំពេញគាត់ទុកកូនគាត់នៅខេត្ត ពេលដែលយើងផ្សព្វផ្សាយទៅបានត្រឹមការយល់ដឹង តែទាក់ទងរឿងកូននៅខេត្តមិនអាចយកកូនមកបំបៅបានទេ ប៉ុន្តែទោះជាយ៉ាងណាយើងនៅតែផ្សព្វផ្សាយបន្ថែមទៀត ហើយសង្ឃឹមថានឹងមានការកើនឡើងនៃការបំបៅដោះកូនដោយទឹកដោះម្ដាយ”

បើតាមនាយកអង្គការ ហេឡែន ខេលល័រ ប្រចាំកម្ពុជា ការបង្កើតបន្ទប់បំបៅកូនដោយទឹកដោះម្ដាយ នៅតាមរោងចក្រ សហគ្រាស មានចំនួន ២៨កន្លែង ក្នុងនោះមានការបណ្ដុះបណ្ដាលបុគ្គលិកកម្មកររោងចក្រមានជាង ២ម៉ឺននាក់ ទៅតាមទីតាំងគោលដៅរួមមាន ខេត្តកំពត កំពង់ធំ កណ្ដាល និងរាជធានីភ្នំពេញ៕