ពីមួយជំហាន ទៅមួយជំហាន មនុស្សមួយចំនួនបានផ្ទៀងផ្ទាត់ ភាពលូតលាស់របស់ខ្លួន ដើម្បីវាស់ស្ទង់អំពីភាពរីចម្រើនរបស់ខ្លួនឯង និងងាយស្រួល​ក្នុងការបំពេញបន្ថែមនូវកង្វះខាត។

តាមរយៈ Yourtango បានបង្ហាញគន្លឹះ៤ចំណុច ដែលផ្តល់ជាតឹកតាងឱ្យឃើញថា វឌ្ឍនៈភាពផ្ទាល់ខ្លួន គេអាចឆ្លុះបញ្ចាំងតាមរយៈការជ្រើសសកម្មភាពមកប្រព្រឹត្តិប្រចាំថ្ងៃ ដូចជា ៖

១. ស្វែងយល់ពីខ្លួនឯងជារឿយៗ ៖ ធ្លាប់មានបទពិសោធន៍ មានអាការៈអស់ថាមពលរៀងរាល់ពេលរសៀលដែរ ឬទេ? ទន្ទឹមគ្នានោះ តែងតែបន្ទោសខួរក្បាលនិងសមត្ថភាពនៃការគិតរបស់ខ្លួនឯង ខណៈបញ្ហានេះ កើតមានដោយសារការប្រើប្រាស់រាងកាយ និងការថែទាំសុខភាពមិនបានល្អ។​ ការធ្វើអ្វីមួយដែលអាចផ្តល់ប្រយោជន៍ចំពោះខ្លួនឯង យល់ពីតម្រូវការខ្លួនឯង ជាពិសេសនៅពេលដែលកំពុងប្រឈមនឹងបញ្ហាសុខភាពផ្លូវចិត្ត សុទ្ធសឹងតែជាចំណែកក្នុងការស្វែងយល់ពីខ្លួនឯងបានច្រើនជាងមុន។

២. រក្សាសកម្មភាពជំរុញចិត្ត ៖ ចំពោះសកម្មភាព ដែលជំរុញនូវការរក្សាកម្លាំងទឹកចិត្តមានដូចជា អានសៀវភៅ ទស្សនាភាពយន្ត ការស្តាប់សាច់រឿងដែលមានភាពតស៊ូ ស្តាប់មនុស្សដែលមានថាមពលជំរុញចិត្ត និងពាក្យសម្តីលើកទឹកចិត្តក្នុងការសម្រេចបាននូវក្ដីសុបិន ដែលចំណុចទាំងនេះ គឺជាទម្លាប់មួយ ជួយជំរុញផលិតភាពការងារ និងការសម្រួចគោលដៅ។

៣. កត់ត្រាសមិទ្ធផលល្អៗ ៖ ការសរសេរកំណត់ហេតុប្រចាំថ្ងៃ មានការទទួលស្គាល់ ថា មានអត្ថប្រយោជន៍ពីក្រុមអ្នកសិក្សាចម្រុះមជ្ឈដ្ឋាន ហើយការកត់ត្រាទៀតសោធ គឺមានច្រើនប្រភេទ មិនថាការកត់អារម្មណ៍ដែលបានកើតឡើង ការបរាជ័យ ជោគជ័យ និងរាល់អ្វីៗដែលបានកើតឡើង។ សង្កត់ធ្ងន់ទៅលើការកត់ត្រារាល់សកម្មភាពសំខាន់ៗវិញ ការកត់ត្រាត្រង់ចំណុចនេះ បានដើរតួនាទីយ៉ាងសំខាន់ក្នុងការផ្ទៀងផ្ទាត់ វិភាគ វាយតម្លៃរាល់ភាពរីកចម្រើន ពីមួយដំណាក់កាល ទៅមួយដំណាក់កាលទៀត ថា តើវាមានល្បឿនបែបណា? ព្រោះ អ្នកដែលអាចវិភាគភាពជោគជ័យនៃខ្លួនឯងបាន ផ្តើមចេញពីបុគ្គលជាម្ចាស់ខ្លួនមុនគេ ដែលត្រូវដើរតួនាទីសំខាន់។ 

៤. ទុកចន្លោះនិងរក្សាភាពស្ងៀមស្ងាត់ ៖ ស្ថិតក្នុងស្ថានភាពដ៏មមាញឹក និងការចំណាយថាមពលជាច្រើនរៀងរាល់ថ្ងៃ ការសម្រាក ការឆ្លុះបញ្ចាំង ការនៅម្នាក់ឯង គឺជាចំណែកសំខាន់មុននឹងបន្តទៅមុខទៀត។ ហើយដើម្បីកាត់បន្ថយ ពីការគិតដ៏មានភាពរញ៉េរញ៉ៃ ឬភាពស្មុគស្មាញ នោះការទុកចន្លោះឱ្យខ្លួនឯងបាននៅកន្លែមួយដែលមានភាពស្ងប់ស្ងាត់មួយរយៈគឺជាដំណោះស្រាយមួយដ៏​ល្អ៕