ការពង្រឹងវិន័យត្រូវការពេល និងកម្លាំងតទល់ដូចជាការហ្វឹកហាត់យកសាច់ដុំដៃដូច្នោះដែរ ក្នុងនោះ​ការកាន់តែអនុវត្តន៍ គឺនឹងកាន់តែរឹងមាំ, វិន័យដើរតួនាទីយ៉ាងសំខាន់ក្នុងការចម្រាញ់នូវលទ្ធផលដែលស្របតាមគោលដៅ។ នៅក្នុងអត្ថបទនេះ យើងនឹងបង្ហាញគន្លឹះ៧ចំណុចដើម្បីពង្រឹងវិន័យផ្ទាល់ខ្លួន។

១. កំណត់ និងផ្ទៀងផ្ទាត់គោលដៅ ៖ មុននឹងឈានទៅគិតគូរអំពីការរក្សា ឬពង្រឹងវិន័យ អ្វីដែលជាចំណុចសំខាន់ក្នុងការយល់ឱ្យបានច្បាស់ជាមុននោះ គឺ តើយើងចង់សម្រេចបាននូវសមិទ្ធិផលអ្វីខ្លះ? រកកន្លែងដែលល្អ និងសរសេរអំពីគោលដៅដែលត្រូវសម្រេច ហើយគោលដៅទៀតសោធត្រូវតែមានភាពជាក់លាក់ សមល្មមនឹងអាចវាស់វែងពីលទ្ធផលបាន និងជាគោលដៅដែលអាចទៅរួចមិនមែនគ្រាន់តែស្រមើស្រមៃលេងៗ គោលដៅត្រូវតែពាក់ព័ន្ធនឹងរបៀបរស់នៅ ឬក៏បុព្វហេតុនៃការចង់បានអ្វីមួយ។ ហើយចំណុចសំខាន់ចុងក្រោយ គឺកំណត់កាលវិភាគអំពីពេលវេលាឱ្យបានច្បាស់លាស់។ មានគោលដៅច្បាស់ៗ ជាចំណែកជួយឱ្យសម្រេចនូវអ្វីដែលខ្លួនរំពឹងទុកបានលឿន រួមទាំងជាកម្លាំងជំរុញចិត្តឱ្យបន្តភារកិច្ចរហូតដល់ទីដែលបានដៅទុក។

២. បន្ថយសកម្មភាពមិនផ្តល់ប្រយោជន៍ ៖ ទទួលស្គាល់ថា មនុស្សក្នុងសម័យបច្ចុប្បន្នងាយនឹងទទួលរងនូវផលរំខានបានយ៉ាងងាយ ដូច្នេះត្រូវតែកំណត់ពេលឱ្យបានច្បាស់ចំពោះសកម្មភាពនីមួយៗ ឬសកម្មភាពមិននាំនូវលទ្ធផលល្អដោយប្រការណាមួយ។ ឧទាហរណ៍ ប្រសិនបើអ្នកបានដឹងខ្លួនថា ហាក់ដូចជាពិបាកងើបពេលព្រឹកព្រលឹម ត្រូវតែកំណត់សម្លេងម៉ោងរោទ៍ឱ្យបានពាសពេញបន្ទប់ និងដាក់ឱ្យច្រើនដង ដែលធ្វើយ៉ាងណាត្រូវតែក្រោកឱ្យទាន់ពេលវេលា។ ហើយការប្រើប្រាស់ទូរស័ព្ទក្នុងសម័យបច្ចុប្បន្ននេះក៏ដូចគ្នាដែរ ព្រោះឧបករណ៍ទាំងនេះបានទាក់ចិត្តអ្នកប្រើប្រាស់ឱ្យចាយពេលរាប់ម៉ោងរហូតដល់ភ្លេចថាពេលណាត្រូវសម្រាកក៏មាន។ ដូច្នេះត្រូវតែមានការកំណត់លើអេក្រង់មុននឹងចាប់កាន់ប្រើប្រាស់ដើម្បីជាការរំឮកដាស់តឿន។

៣. ធ្វើផែនការនិងចាត់អាទិភាពប្រភេទការងារឱ្យបានល្អបំផុត ៖  ការប្តេជ្ញាចិត្តធ្វើឱ្យខ្លួនឯងមានវិន័យ ពាក់ព័ន្ធនឹងការចាត់ចែងប្រភេទការងារដែលសំខាន់ៗ រួមទាំងឆ្លើយតបនឹងអ្វីដែលខ្លួនត្រូវការ។ ដើម្បីធានា​ឱ្យបាននូវប្រភេទការងារដែលខ្លួនត្រូវការ គឺត្រូវមានផែនការសម្រាប់រយៈពេលខ្លី និងរយៈពេលវែង រួមទាំងសរសេររៀបរាប់លម្អិតអំពីប្រភេទការងារនីមួយៗឱ្យបានជាក់លាក់។ អនុវត្តន៍បែបនេះ គឺជាការដាក់វិន័យខ្លួនឯងឱ្យធ្វើតែសកម្មភាពដែលនាំជាប្រយោជន៍។

៤. បំបែកគោលដៅឱ្យតូចហើយចាប់ផ្តើមសកម្មភាព ៖ កាលដែលសម្លឹងមើលគោលដៅក្នុងរូបភាពធំពេក អាចនឹងធ្វើឱ្យអ្នកមានអារម្មណ៍ខ្លាចរអាក្នុងការចាប់ផ្តើម ដូច្នេះត្រូវយកគោលដៅដែលបានកំណត់ក្នុងរូបភាពធំដែលមានស្រាប់ទៅបំបែកឱ្យចេញជាសកម្មភាព ឬក៏រូបភាពតូចៗ ទើបចាប់ផ្តើមអនុវត្តន៍ជាសកម្មភាព ដើម្បីជារក្សាការជំរុញទឹកចិត្តឱ្យបន្តបេសកកម្ម ។

៥. ជ្រើសមនុស្សដែលជាចំណែកគាំទ្រដល់ការសម្រេចគោលដៅ ៖ កាលដែលមានមនុស្សក្បែរខ្លួនមានសមត្ថភាពគាំទ្រ និងអាចក្លាយជាចំណែកក្នុងការលើកស្ទួយជំរុញឱ្យសម្រេចបាននូវអ្វីដែលបានដៅទុក គឺជាឥទ្ធិពលក្នុងការជំរុញចិត្ត ក៏ដូចជាការពង្រឹងវិន័យ។ ជ្រើសរើសមនុស្សដែលអ្នកទុកចិត្ត មិនថាជាមិត្ត សមាជិកគ្រួសារ ឬក៏នរណាដែលមានគោលដៅស្រដៀងគ្នានិងអាចជជែកគ្នាបាន។ ទន្ទឹមគ្នានោះត្រូវចែករំលែកដំណើរការដែលកំពុងអនុវត្តន៍ ហើយលើកទឹកចិត្តឱ្យពួកគេមានកម្លាំងបន្តអភិវឌ្ឍន៍ដូចគ្នាដែរ។ នៅពេលដែលចែករំលែកគោលដៅនិងសកម្មភាពចំពោះគ្នាទៅវិញទៅមក គឺបានផ្តល់នូវភាពងាយស្រួលឱ្យដើរត្រូវទិសដៅ។

៦. ផ្តល់រង្វាន់ឱ្យខ្លួនឯង ៖ ការពង្រឹងវិន័យ ការលត់ដំខ្លួនឯង មិនមែនមានន័យថា កាត់ចោលសកម្មភាពរីករាយហើយគិតតែរឿងរីកចម្រើនមួយមុខនោះទេ នៅពេលដែលសម្រេចបាននូវ​សមទ្ធិផលខ្លះៗហើយ ឬក៏ជិតសម្រេចបាននូវគោលដៅធំមួយ យើងត្រូវទុកពេលសម្រាកខ្លះ និងផ្តល់រង្វាន់ជូនខ្លួនឯង។ ជ្រើសរើសសកម្មភាព ឬក៏រង្វាន់ដែលផ្តល់អត្ថន័យចំពោះខ្លួនឯងមិនថាក្នុងទំហំតូចក្ដីធំក្ដី មិនថាជាការសម្រាកនៅទីកម្សាន្ត ការបរិភោគអាហារឆ្ងាញ់ៗ ឬក៏ធ្វើសកម្មភាពដែលខ្លួនចូលចិត្ត។

៧. រៀបផែនការព្រៀងទុក ៖ ការសរសេរផែនការទីពីរនៅតែសំខាន់ ទោះបីជាផែនការទី១បានរៀបចំ​ល្អឥតខ្ចោះយ៉ាងណាក៏ដោយ តែវាអាចនឹងប្រែប្រួលដោយយថាហេតុណាមួយ​បាន ដូច្នេះផែនការព្រៀងទុកគឺជាចំណែកសំខាន់ក្នុងការរក្សាគោលដៅ និងក្ដីសង្ឃឹម៕