ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើសិនជាភ័យខ្លាចក្នុងការធ្វើទំនាក់ទំនង នោះការត្រៀមខ្លួនទុកមុន ជាវិធីសាស្រ្តដែលមានប្រសិទ្ធភាព ជាពិសេសគឺល្អសម្រាប់អ្នកដែលពិបាកក្នុងការចាប់ផ្តើមនិយាយក្នុងកិច្ចពិភាក្សាណាមួយ។ យ៉ាងណាមិញ ប្រសិនបើអ្នកបានត្រៀមខ្លួនហើយ ប៉ុន្តែនៅតែមានអាការអន្ទះសាទៀតនោះ អ្នកអាចអនុវត្តន៍ វិធីសាស្រ្តបីចំណុចបន្ថែមទៀតដែលមានបកស្រាយជូនដោយគេហទំព័រ verywellmind និងមានលម្អិតដូចខាងក្រោម ៖
១. រក្សាជំហរឱ្យវិជ្ជមាន ៖ ដើម្បីវិវឌ្ឍន៍ជំនាញកិច្ចសន្ទនា សូមកុំបារម្ភអំពីការបង្កើតកំហុសតទៅទៀត ហើយជឿជាក់លើសមត្ថភាពរបស់អ្នកបច្ចុប្បន្ន។ ការបារម្ភច្រើនពេក ហាក់ពុំផ្តល់ផលចំណេញនោះទេ វានឹងធ្វើឱ្យការនិយាយរបស់អ្នកកាន់តែរកកោះនិងត្រើយលែងឃើញតែម្តង! គឺមានន័យថា កាន់តែបារម្ភ គឺកាន់តែជំរុញបាននូវការវង្វេងភ័ន្តស្មារតីកំឡុងពេលអនុវត្តន៍កិច្ចសន្ទនា ខណៈស្ថិតក្នុងស្ថានភាពនេះ វាក៏នឹងរុញច្រានអ្នកទៅក្នុងដំណាក់កាលមួយ ដែលមិនដឹងថាត្រូវបញ្ចប់នៅពេលណា ឬមិនដឹងត្រូវនិយាយអ្វីបន្តទៀតជាដើម។ សកម្មភាពដែលអាចធ្វើបានដើម្បីដោះស្រាយនឹងកត្តាប្រឈមមួយនេះ លោកអ្នកគ្រាន់តែព្យាយាម ធ្វើជាអ្នកស្ដាប់ដែលសកម្ម ដោយផ្តោតទៅលើភាគីម្ខាងទៀតឱ្យបានខ្លាំងជាងមុន ថាតើគេកំពុងមានន័យបែបណា ហើយគោលបំណងរបស់គេចង់ប្រាប់អ្វីមកកាន់អ្នក។
២. ដកដង្ហើមមួយៗ ៖ បើអ្នកកំពុងមានអារម្មណ៍ថាភ័យព្រួយ ឬក៏កំពុងដក់ជាប់នូវអារម្មណ៍តានតឹងជាខ្លាំងនោះ! ពិតណាស់ វាពុំបានផ្តល់នូវផលល្អកំឡុងពេលជជែកនោះឡើយ។ ដូច្នេះហើយ ការសម្រាកដោយការដកដង្ហើមមួយៗ ដែលធ្វើយ៉ាងណាឱ្យអារម្មណ៍ស្រស់ស្រាយសប្បាយចិត្តសិន សឹមបន្តការជែកពិភាក្សា ទៅតាមដំណើរបែបធម្មជាតិ។ ជារួម គុណសម្បត្តិនៃការដកដង្ហើមមួយៗ ជួយឱ្យលោកអ្នកកាន់តែស្រស់ស្រាយ និងការផ្តោតសតិ ហើយទុកចន្លោះឱ្យអ្នកអាចប្រមូលផ្តុំគំនិត និងទុកពេលវិភាគដើម្បីកុំឱ្យពាក្យដែលប្រើប្រាស់នៅថ្ងៃនេះបង្កផលប៉ះពាល់នៅពេលក្រោយ ថែមទាំងរក្សាបាននូវការប្រុងប្រយ័ត្ន និងការយល់អំពីអ្នកដទៃ។
៣. ការណែនាំខ្លួន ៖ វិធីសាស្រ្តដ៏សាមញ្ញមួយគឺចាប់ផ្តើមដោយការណែនាំខ្លួន និងអនុញ្ញាតឱ្យអ្នកដទៃមានឱកាសបានណែនាំខ្លួនដូចគ្នា បន្ទាប់មកចាប់ផ្តើមសាកសួរគ្នាដោយសំណួរសាមញ្ញៗ។ តាមរយៈ ការណែនាំខ្លួន ជួយឱ្យលោកអ្នកមានឱកាសក្នុងការបង្ហាញពីចំណាប់អារម្មណ៍ ឬក៏ទាក់ទាញចំណាប់អារម្មណ៍ពីភាគីម្ខាងទៀត និងជួយឱ្យភាគីទាំងពីរបានស្គាល់គ្នា និងមានទំនុកចិត្តនឹងគ្នាបន្ថែមមួយកម្រិតទៀត ហើយវាក៏បង្ហាញទៅកាន់អ្នកដទៃថា អ្នកក៏មានការចាប់អារម្មណ៍នឹងរឿងរ៉ាវ ដែលពាក់ព័ន្ធនឹងអ្នកដទៃផងដែរ។ លើសពីនោះទៅទៀតវាក៏ងាយស្រួលឱ្យអ្នកបានរកឃើញចំណុចរួមគ្នាមួយ ក្នុងការបន្តដំណាក់កាលនៃការជជែកនៅពេលបន្ទាប់ទៀត ដែលសុទ្ធសឹងជាធ្លុងក្នុងការជំរុញឱ្យបង្កើនឱកាសថ្មីៗ៕
