រុក្ខជាតិ និងសួនច្បារ គឺជាចំណែកមួយដ៏សំខាន់នៃជីវិត, វាមិនត្រឹមតែផ្ដល់ឱ្យយើងគ្រប់គ្នានូវអុកស៊ីហ្សែន និងអាហារ សម្រាប់ទទួលទានប៉ុណ្ណោះទេ ប៉ុន្តែក៏ជួយរក្សាស្ថេរភាពបរិស្ថាន និងបង្កើតបរិយាកាសដ៏ស្រស់ស្អាត សម្រាប់ការរស់នៅផងដែរ។

ដោយមើលឃើញពីសារៈសំខាន់នៃការផ្សារភ្ជាប់ជីវិតរស់នៅប្រចាំថ្ងៃ Jungle a Domicile និង Phnom Penh Green Studio បានសហការបង្កើតពិព័រណ៍រុក្ខជាតិ និងសួនច្បារភ្នំពេញ កាលពីដើមឆ្នាំ២០២២ ដើម្បីបំផុសគំនិតឱ្យប្រជាជនមានការស្រឡាញ់ និងយល់ដឹងអំពីអត្ថប្រយោជន៍នៃ រុក្ខជាតិ និងបរិស្ថានជុំវិញខ្លួន ហើយ​នៅ​ក្នុង​ឆ្នាំ​២០២៥នេះ ពិព័រណ៌រុក្ខជាតិ និង​សួនច្បារ នឹងប្រព្រឹត្ត​ទៅ​​ចាប់ថ្ងៃទី១២ ដល់ថ្ងៃទី១៤ កញ្ញា នៅ​មជ្ឈមណ្ឌល​ Connexion កោះពេជ្រ។

លោក ហែម ច័ន្ទសុភ័ក្រ្ដ សហស្ថាបនិក និងនាយកកម្មវិធីពិព័រណ៍រុក្ខជាតិ និងសួនច្បារភ្នំពេញ លើកឡើងថា ការរៀបចំព្រឹត្តិការណ៍នេះឡើង គឺចង់ឱ្យប្រជាជនយល់ដឹងអំពីចំណេះដឹងទាក់ទងនឹងការដាំដុះ និងការថែរក្សា ដែលមិនត្រឹមតែធ្វើឱ្យបរិស្ថានកាន់តែមានភាពបៃតងប៉ុណ្ណោះទេ ប៉ុន្តែក៏ជាផ្នែកមួយនៃការជួយពង្រឹងសុខភាពផ្លូវកាយ និងផ្លូវចិត្តរបស់ប្រជាជនកម្ពុជា។

“នៅពេលដែលយើងចាប់ផ្តើមស្រឡាញ់ធម្មជាតិ ពួកយើងនឹងមានការយកចិត្តទុកដាក់បន្ថែមក្នុងការថែរក្សាបរិស្ថាន និងសហគមន៍ជុំវិញខ្លួនយើង”

សហស្ថាបនិក និងនាយកកម្មវិធីពិព័រណ៍រុក្ខជាតិ និងសួនច្បារភ្នំពេញ បានសង្កត់ធ្ងន់ថា ពិព័រណ៍នេះមិនត្រឹមតែផ្តល់ចំណេះដឹងដោយផ្ទាល់ពីក្រុមអ្នករៀបចំទេ ប៉ុន្តែថែមទាំងជាវេទិកា ដែលអ្នកចូលរួមអាចរៀនពីគ្នាទៅវិញទៅមក តាមរយៈការជួបជុំជាមួយអ្នកលក់រុក្ខជាតិ ក៏ដូចជាអ្នកចូលរួមដទៃទៀត។

លោកបន្តថា ពួកគាត់អាចផ្លាស់ប្តូរបទពិសោធន៍ និងចំណេះដឹងគ្នា។ ក្រៅពីនេះ យើងក៏នាំមកនូវប្រធានបទថ្មីៗជារៀងរាល់រដូវកាល ដូចជា ការរៀបចំ​ Terrarium, រៀនពីការសម្ងួតផ្កា ការរៀនពីការចាក់ទាន់ក្រអ៊ូប​ និង​ការ​បោះពុម្ភរូបភាពលើសម្លាកបំពាក់ជាដើម។

គួរបញ្ជាក់ថា ពិព័រណ៌រុក្ខជាតិ និងសួនច្បារភ្នំពេញ ត្រូវបានរៀនចំចំនួន ៤ លើករួចមកហើយ ដោយការរៀបចំកន្លងមក ទទួលបានការគាំទ្រយ៉ាងច្រើនកុះករពីសាធារណជន ដោយមានអ្នកចូលរួមជាង ១ម៉ឺននាក់ ក្នុងអំឡុងពេលកម្មវិធី។ សម្រាប់ពិព័រណ៍លើកទី៥នេះ មានគោលបំណងផ្តល់បទពិសោធន៍ល្អជាងមុន ដោយនាំមកនូវសកម្មភាព និងប្រធានបទថ្មីៗ ដើម្បីផ្តល់ជូនអ្នកដែលចូលរួម ដូចជាការតាំងបង្ហាញរុក្ខជាតិលម្អ និង​រុក្ខជាតិកម្រជាច្រើនប្រភេទ,​ លើសពីនេះទៅទៀត​​ ក៏នឹងមានតាំងបង្ហាញស្នាដៃសិល្បៈរុក្ខសាស្រ្ត សម្ភារៈប្រើប្រាស់​ គ្រឿងអលង្ការ ម្ហូបអាហារ និង​ ផលិតផលជាច្រើនផងដែរ៕​