ភាពប្រទាក់ក្រឡាគ្នា រវាងសុខភាពផ្លូវចិត្ត និងប្រព័ន្ធ​ផ្សព្វផ្សាយ​បណ្តាញសង្គម ឬ​បច្ចេកវិទ្យា ហាក់ដូចជា​មាន​លក្ខណៈ​ស្មុគស្មាញបន្តិច នេះ ក៏ដោយសារតែ​ប្រភពព័ត៌មានចម្រុះពេក ដែលជាកត្តានាំឱ្យសុខភាពផ្លូវចិត្តត្រូវបានធ្លាក់ថមថយ។

ប្រព័ន្ធផ្សព្វផ្សាយបណ្តាញសង្គម សំដៅដល់ការបង្កើតទំនាក់ទំនងគ្នាដោយអនឡាញតាមរយៈកម្មវិធីដូចជា យូធូប (YouTube), ហ្វេសប៊ុក (Facebook), អ៊ីនស្រាក្រាម (Instagram), ធីកធក (Tiktok) ឬការបង្ហាះចែកចាយព័ត៌មានដោយផ្ទាល់ខ្លួនជាប្លុក ឬក៏ជាសំណេរខ្លី។ លោកស្រី ហុក ស្រីមុំ ជាអ្នកបង្កើតមាតិកា ផ្នែកឌីជីថល ( Sreymom Talk) លើកឡើងថា ផលវិជ្ជមាននៃការប្រើប្រាស់បណ្តាញសង្គម និងបច្ចេកវិទ្យា ត្រូវបានដឹងជាទូទៅថា វាមានឥទ្ធិពលបង្កើនវិសាលភាព នៃទំនាក់ទំនងជាបុគ្គល និងជាក្រុម រួមទាំងការគាំទ្រគ្នាតាមរយៈបណ្តាញសង្គម ការចែករំលែកចំណេះដឹង រួមទាំងជាឧបករណ៍ក្នុងការបំពេញកិច្ចការងារពីចម្ងាយផងដែរ។

“បច្ចុប្បន្នគ្រាន់តែងើបឡើងភ្លាម មានកត្តាជាច្រើនជំរុញឱ្យដៃកាន់ទូរស័ព្ទតែម្តង​​ ហើយទូរស័ព្ទ ជារបស់សំខាន់ខ្លាំងដែរ នៅក្នុងការរស់នៅប្រចាំថ្ងៃរបស់យើង ហើយប្រសិនបើទូរស័ព្ទអត់មានអ៊ីនធឺណិតទៀត គឺប្រៀបដូចជាការកាន់ដុំថ្មអ៊ីចឹង។ ចំណេះដឹងពីការប្រើប្រាស់បណ្តាញសង្គមសំខាន់មែនទែន! ព្រោះអ្នកទាំងអស់គ្នាត្រូវការប្រើប្រាស់រាល់ថ្ងៃ ឬសឹងតែរាល់ម៉ោង”

អ្នកគ្រូ ហុក ស្រីមុំ គឺជាអ្នកបង្កើតមាតិកា ផ្នែកឌីជីថល ( Sreymom Talk)

តែយ៉ាងណាភាពអវិជ្ជមានក៏មានដូចគ្នាដែរ គឺវាធ្វើឱ្យមានអារម្មណ៍លើសលប់ ក្នុងការប្រើប្រាស់ព័ត៌មាន ពិបាកកត់​សម្គាល់​ព័ត៌មានពិត និងព័ត៌មានក្លែងក្លាយ ការទទួលឮ និងឃើញពាក្យពេចន៍ជេរប្រមាថគ្នា បាត់បង់ឯកជនភាព និងការជះផលមិនល្អទៅកាន់សុខភាពផ្លូវចិត្ត។

លោកស្រី ហុក ស្រីមុំ បន្តថា ត្បិតបណ្តាញសង្គមបានជួយក្នុងការស្វែងរកព័ត៌មានក៏ពិតមែន ប៉ុន្តែនៅក្នុងនេះក៏បានរួមចំណែកធ្វើឱ្យប៉ះពាល់អារម្មណ៍យើងដែរ រូបភាពក្នុងបណ្តាញសង្គមក៏បានរួមចំណែកធ្វើឱ្យគុណភាពនៃការគេងត្រូវបានថយចុះ តាមរយៈសាច់រឿងមួយចំនួនក្នុងបណ្តាញសង្គម។ ដូច្នេះ តើយើងត្រូវដោះស្រាយបញ្ហានេះបែបណា? ឬតើយើងត្រូវជួយសម្រួលខ្លួនឯងយ៉ាងម៉េច ?

បើតាមអ្នកបង្កើតមាតិការូបនេះថា ក្នុងនាមជាសិស្សនិស្សិត ឬជាយុវជន ដែលមានតម្រូវការចាំបាច់ក្នុងការប្រើប្រាស់បណ្តាញសង្គម គួរបង្កើនការយកចិត្តទុកដាក់អំពីការប្រើប្រាស់បណ្តាញសង្គមប្រកបដោយប្រសិទ្ធភាព ដើម្បីទទួលបានសុខុមាលភាព ដោយការរៀនសូត្រអំពីរបៀបប្រើប្រាស់ ឬសិក្សាអំពីផលប៉ះពាល់ វិធានការណ៍ការពារខ្លួន និងការចាប់ផ្តើមពីមូលដ្ឋានគ្រឹះ នៃអក្ខរកម្មប្រព័ន្ធផ្សព្វផ្សាយនិងឌីជីថល៕