ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការបរិភោគអាហាររូបត្ថម្ភបានត្រឹមត្រូវ ជាផ្នែកមួយយ៉ាងសំខាន់ក្នុងការថែរក្សាសុខភាព។ ក្នុងចំណោមបន្លែផ្លែឈើជាច្រើនប្រភេទ «ប៉េងប៉ោះ» ដែលជាដំណាំងាយស្រួលរកទិញតាមទីផ្សារក្នុងស្រុក ត្រូវបានស្រាវជ្រាវឃើញថា មានផ្ទុកនូវសារធាតុចិញ្ចឹម និងវីតាមីនជាច្រើន រហូតដល់អ្នកជំនាញណែនាំឱ្យបន្ថែមវាទៅក្នុងរបបអាហារប្រចាំថ្ងៃ។
ប៉េងប៉ោះ ១ ផ្លែ មានកាឡូរីត្រឹមតែ ២២ តែវាសម្បូរទៅដោយជាតិសរសៃ (Fiber) ប៉ូតាស្យូម វីតាមីន A វីតាមីន C និងសារធាតុប្រឆាំងអុកស៊ីតកម្មដ៏សំខាន់ឈ្មោះ Lycopene។ អ្វីដែលពិសេស ប៉េងប៉ោះមានជាតិទឹកប្រមាណ ៩៤% ដែលជួយផ្តល់ជាតិទឹក ដល់រាងកាយបានយ៉ាងល្អ។
ខាងក្រោមនេះជា អត្ថប្រយោជន៍សុខភាពសំខាន់ៗ បានមកពីការបរិភោគប៉េងប៉ោះ ៖
កាត់បន្ថយហានិភ័យនៃជំងឺមហារីក ៖ សារធាតុ Lycopene នៅក្នុងសម្បកប៉េងប៉ោះ ជួយទប់ស្កាត់ការលូតលាស់នៃកោសិកាមហារីក (ពិសេសមហារីកក្រពេញប្រូស្តាត) និងការពារកោសិកាពីការខូចខាត។ ការញ៉ាំប៉េងប៉ោះជាមួយខ្លាញ់ល្អ (ដូចជាប្រេងអូលីវ ឬផ្លែបឺរ) នឹងជួយឱ្យរាងកាយបឺតស្រូបសារធាតុនេះបានកាន់តែល្អ។
ជួយទ្រទ្រង់សុខភាពថ្លើម ៖ ការសិក្សាបង្ហាញថា ការញ៉ាំប៉េងប៉ោះស្រស់ ឬជ្រក់ប៉េងប៉ោះ ជួយគ្រប់គ្រង និងកាត់បន្ថយការកើនឡើងនៃជាតិខ្លាញ់នៅក្នុងថ្លើម។
ថែរក្សាសុខភាពភ្នែក ៖ ក្រៅពីវីតាមីន A ដែលការពារភ្នែកពីភាពងងឹតនៅពេលយប់ ប៉េងប៉ោះមានសារធាតុ Lutein និង Zeaxanthin ដែលជួយកាត់បន្ថយហានិភ័យ នៃជំងឺឡើងបាយភ្នែក ឬភ្នែកខូចតាមអាយុ។
ជួយឱ្យរាងកាយមានជាតិទឹកគ្រប់គ្រាន់ ៖ ដោយសារមានជាតិទឹកខ្ពស់ រួមជាមួយជាតិប៉ូតាស្យូម ប៉េងប៉ោះជួយរក្សាតុល្យភាពជាតិទឹក និងអេឡិចត្រូលីតក្នុងរាងកាយ។
ពង្រឹងប្រព័ន្ធការពាររាងកាយ ៖ ប៉េងប៉ោះហាន់ ១ ពែង មានវីតាមីន C រហូតដល់ ២៩% នៃតម្រូវការប្រចាំថ្ងៃ ជួយផលិតកូឡាជែន ប្រឆាំងការរលាក និងជួយឱ្យរាងកាយបឺតស្រូបជាតិដែកបានល្អ (នៅពេលញ៉ាំគួបផ្សំជាមួយសណ្តែក ឬសាច់)។
សម្រួលដល់ប្រព័ន្ធរំលាយអាហារ និងពោះវៀន ៖ ប៉េងប៉ោះជួយបង្កើតបាក់តេរីល្អៗក្នុងពោះវៀន កាត់បន្ថយការរលាកពោះវៀន និងពង្រឹងការរំលាយអាហារឱ្យមានប្រសិទ្ធភាព។
ការពារសុខភាពបេះដូង ៖ សារធាតុប្រឆាំងអុកស៊ីតកម្មក្នុងប៉េងប៉ោះ ជួយសម្រួលសម្ពាធឈាម និងកាត់បន្ថយហានិភ័យនៃជំងឺបេះដូង និងសរសៃឈាម។
ជួយរក្សាទម្ងន់ ៖ ជាអាហារដែលមានកាឡូរីទាប មានជាតិទឹក និងជាតិសរសៃខ្ពស់ ប៉េងប៉ោះជួយឱ្យអ្នកមានអារម្មណ៍ឆ្អែតបានយូរ សម្រួលដល់ការរក្សាទម្ងន់ឱ្យនៅកម្រិតសមស្រប។
អ្នកជំនាញផ្នែកអាហាររូបត្ថម្ភបានបញ្ជាក់ថា ប៉េងប៉ោះកែច្នៃ ដូចជាប៉េងប៉ោះកិនខាប់ ឬទឹកប៉េងប៉ោះ មានកំហាប់សារធាតុ Lycopene ខ្ពស់ជាងប៉េងប៉ោះស្រស់ ដោយសារតែការចម្អិនធ្វើឱ្យបាត់បង់ជាតិទឹក។ ទោះជាយ៉ាងណា ប្រជាពលរដ្ឋអាចបរិភោគបានទាំងស្រស់ និងឆ្អិន ដោយគ្រាន់តែប្រុងប្រយ័ត្នជ្រើសរើសផលិតផលកំប៉ុងណាដែលគ្មានការបន្ថែមស្ករ អំបិល ឬប្រេងច្រើន៕
