នៅក្នុងសង្គមមួយ​មានមនុស្សចម្រុះបែប ដូច្នេះជំនាញនៃការរស់នៅរួមគ្នា ឬរបៀបរស់ជាមួយគេឯង គឺជាកត្តាចាំបាច់ដែលត្រូវតែដុសខាត់។ ការរស់នៅជាមួយអ្នកដទៃទាមទារនូវ សមត្ថភាពសម្របខ្លួនទៅនឹងបែបបទ របៀបរស់នៅ ទម្លាប់ផ្ទាល់ខ្លួន និងគុណតម្លៃដែលមានភាពខុសប្លែកគ្នាពីមនុស្សម្នាក់ ទៅមនុស្សម្នាក់ ឬពីសហគមន៍មួយ ទៅសហគមន៍មួយ មិនថារបៀបរស់បែបឯកជន ទម្លាប់ផ្ទាល់ខ្លួន គុណតម្លៃ និងកត្តាផ្សេងៗជាច្រើនទៀតសុទ្ធតែមានការផ្លាស់ប្តូរ។

តាមរយៈគេហទំព័រ Aparto Student បានឱ្យដឹងថា ជំនាញក្នុងការរៀនរស់ក្នុងសង្គម មិនត្រឹមតែចេះសន្ទនាដោយបើកចំហប៉ុណ្ណោះទេ ប៉ុន្តែក៏ត្រូវមានការយល់ចិត្តគ្នា ហើយបើត្រូវរស់នៅជាមួយគ្នាទៀត គឺចាំបាច់ត្រូវការបែងចែកទំនួលខុសត្រូវ បែងចែកការចំណាយ ការដោះស្រាយជម្លោះដោយសន្តិវិធី ការគោរពឯកជនភាព ការរក្សាអនាម័យ និងកត្តាដទៃៗជាច្រើនទៀត ដោយមានរៀបរាប់បន្ថែមនៅខាងក្រោម ៖

សន្ទនាគ្នាដោយបើកចំហ ៖ ភាពប្រទាំងប្រទើសគ្នា តែងកើតមានចំពោះទំនាក់ទំនងរបស់មនុស្ស ទោះបីជាមិនអាចគេចផុតទាំងស្រុង ប៉ុន្តែនៅមានវីធីសាស្រ្តកាត់បន្ថយ និងដោះស្រាយបាន។ យ៉ាងណាបើគ្មានការនិយាយដោយបើកចំហ ចេញពីចិត្តនោះទេ ជម្លោះនិងការយល់ច្រឡំអាចកើតមានជាហូរហែ ដូច្នេះ ការបើកចិត្តនិយាយ សន្ទនាគ្នាដោយបើកចំហជំរុញឱ្យជម្លោះធំៗកុំឱ្យកើតមាន។ ការនិយាយគ្នាដោយបើចំហ មានសារៈសំខាន់ណាស់ចំពោះទំនាក់ទំនង ជាពិសេសជាមួយមនុស្សដែលត្រូវរស់នៅកន្លែងតែមួយ ហើយការសន្ទនាគ្នាដោយបើកចំហទៅបាន គឺតម្រូវឱ្យស្តាប់គ្នាទៅវិញទៅមកដូចគ្នា។

ការបង្កើតដែនកំណត់ ៖ ការរស់នៅជាក្រុមៗ មិនថាចាប់ពីប៉ុន្មាននាក់ឡើងទៅនោះទេ ការនិយាយគ្នាឱ្យហើយអំពីដែនកំណត់ បានរួមចំណែកកុំឱ្យមានការរំខានគ្នា មិនថាដោយចេតនាក្ដី និងអចេតនាក្ដី។ ការបង្កើតដែនកំណត់នេះទៀតសោត ក៏បានដើរតួនាទីសំខាន់ ក្នុងការគោរពគ្នាទៅវិញទៅមក និងបញ្ចៀសការនាំឱ្យមានអាការប៉ះពាល់អារម្មណ៍រវាងគ្នានឹងគ្នាដោយប្រការណាមួយ។

កំណត់ឱ្យហើយថាសម្ភារៈណាអាចប្រើរួមគ្នាបាន ពេលណាដែលមិនគួររំខានគ្នា មានទម្លាប់រស់នៅស្រឡះឬការតុបតែង? ជារួមគឺលើកយកភាពខុសគ្នាមកនិយាយ ហើយសម្រួលគ្នាឱ្យហើយថា តើចំណុចណាខ្លះដែលអាចសម្រួលបាន ហើយចំណុចណាខ្លះ ដែលដាច់ខាតត្រូវតែចែកកន្លែងគ្នាប្រើប្រាស់រៀងខ្លួន។

ការប្រើប្រាស់សំឡេងរំខាន ៖ គ្រប់គ្នាមានរស់និយម និងរបៀបនៃការរស់នៅខុសៗគ្នា ហើយមិនចម្លែកនោះទេ ដែលពួកគេចូលចិត្តស្តាប់ភ្លេងឬចម្រៀងនៅម៉ោងខុសគ្នា ស្តាប់ប្រភេទតន្រ្តីខុសគ្នា និងការជ្រើសរើសស្តា​ប់នៅពេលខុសៗគ្នា ដែលជាហេតុតម្រូវឱ្យភាគីនីមួយៗ ចាំបាច់ត្រូវសួរមុននឹងបើកសំឡេងណាមួយ។ ឧទាហរណ៍អ្នកខ្លះចូលចិត្តបើកតន្រ្តីឮៗព្រោះការធ្វើបែបនេះបង្កើនបាននូវភាពរីករាយ ប៉ុន្តែអ្នកខ្លះវិញចូលចិត្តភាពស្ងប់ស្ងាត់ ដូច្នេះការសួរបញ្ជាក់ ឬការសូមអភ័យទោសមុននឹងបង្កសំឡេងណាមួយ ចាំបាច់ត្រូវជជែកគ្នាជាមុន ថា តើអាចប្រើប្រាស់សម្លេងចេញមកក្រៅបានកម្រិតណា រយៈពេលប៉ុន្មាន? ការមិនបង្កសំឡេងរំខានដល់អ្នកដទៃ ជាចំណែកមួយបង្កើតបាននូវទំនាក់ទំនងល្អ និងកាត់បន្ថយជម្លោះមិនថាអ្នករស់នៅជាមួយ ឬអ្នកក្បែរខ្លួននោះទេ។

ភាពយុត្តិធម៌ទៅលើការចំណាយ ៖ ចំណុចនេះ សំខាន់ណាស់សម្រាប់អ្នករស់នៅជាមួយមិត្តភ័ក្ត, ការចំណាយរួមគ្នា ជាចំណែកមួយដែលមិនអាចរំលងបាននោះទេ ហើយដើម្បីរក្សាចំណងទំនាក់ទំនងមួយឱ្យបានយូរ និងកាត់បន្ថយជម្លោះឬការអាក់អន់ចិត្តទៅបាន! ចាំបាច់ត្រូវបែងចែកឱ្យមានភាពយុត្តិធម៌ទៅកាន់ភាគីម្ខាងៗ ហើយការបែងចែកឱ្យមានភាពស្មើគ្នាទៅបាន មិនមែនគិតលើតែការចែកគ្នាពាក់កណ្តាលម្នាក់គ្រប់ទម្រង់នោះទេ គឺអាស្រ័យលើកត្តាជាក់ស្តែងដែរ ចែកគ្នាតែចំណុចណាដែលត្រូវប្រើរួមគ្នាដូចជាថ្លៃផ្ទះ ទឹក ភ្លើង និងសម្ភារៈប្រើប្រាស់ក្នុងផ្ទះ ប៉ុន្តែប្រសិនបើរបស់ខ្លួនចង់ប្រើប៉ុន្តែភាគីម្ខាងទៀតមិនចង់ប្រើ ក៏គួរមានការគោរពការសម្រេចចិត្តនៃការចំណាយរបស់ភាគីម្ខាងទៀត៕