សាលារៀននៅប្រទេសសិង្ហបុរី បានបញ្ចូលខ្លឹមសារមេរៀន ប្រឆាំងនឹងការជក់បារីអេឡិចត្រូនិចក្នុងមុខវិជ្ជាវិទ្យាសាស្ត្រ និងការអប់រំអត្តចរិត។

ចាប់តាំងពីខែកញ្ញាមក សាលាបឋមសិក្សា មធ្យមសិក្សា និងឧត្តមសិក្សាមួយចំនួន បានបញ្ចូលមាតិកាមេរៀនប្រឆាំងនឹងការជក់បារីអេឡិចត្រូនិចទៅក្នុងមេរៀនថ្នាក់វិទ្យាសាស្ត្រ រួមទាំងព័ត៌មានថ្មីៗអំពីថ្នាំ Etomidate និងផលប៉ះពាល់ ដែលអាចបង្កគ្រោះថ្នាក់នៃសារធាតុនេះ។

ជាផ្នែកមួយនៃកម្មវិធីសិក្សា សិស្សានុសិស្សត្រូវរៀនអំពីផលប៉ះពាល់ ដែលបង្កគ្រោះថ្នាក់ ដោយផលិតផលថ្នាំជក់ និងការជក់បារីអេឡិចត្រូនិច។

ជាឧទាហរណ៍ នៅក្នុងមេរៀនវិទ្យាសាស្ត្រមួយ សិស្សនៅវិទ្យាល័យ Presbyterian ៣ នាក់ ដែលបានមើលវីដេអូ និងរៀនអំពីសារធាតុផ្សេងៗគ្នា ដែលមាននៅក្នុងសារធាតុរាវ មាននៅក្នុងបារីអេឡិចត្រូនិច។

គ្រូបង្រៀនម្នាក់បាននាំសិស្សានុសិស្សពីរបៀបដែលឧបករណ៍ជក់បារីអេឡិត្រូនិចដំណើរការ មុនពេលចាក់វីដេអូអំពីមូលហេតុ ដែលរដ្ឋាភិបាលសិង្ហបុរីចាត់ថ្នាក់ថ្នាំ etomidate ជាថ្នាំថ្នាក់ C។

ថ្នាំ Etomidate ជាសារធាតុស្ពឹកនៅក្នុងបារីអេឡិចត្រូនិច មានផ្ទុកសារធាតុញៀន ដែលគេស្គាល់ថា Kpods ត្រូវបានចុះបញ្ជីនៅក្នុងច្បាប់ស្ដីពីការប្រើប្រាស់គ្រឿងញៀនមិនត្រឹមត្រូវ ថាជាថ្នាំថ្នាក់ C ចាប់ពីថ្ងៃទី ០១ ខែកញ្ញា ដែលជាថ្ងៃ ដដែលនៃការដាក់ពិន័យធ្ងន់ធ្ងរជាងនេះ ទាំងអ្នកប្រើប្រាស់បារីអេឡិចត្រូនិច និងអ្នកផ្គត់ផ្គង់បានចូលជាធរមាន។

ចាប់ពីពេលនោះ យ៉ាងហោចណាស់មនុស្ស ៦០នាក់ ត្រូវបានដាក់ឱ្យចូលរួមក្នុងកម្មវិធីស្ដារនីតិសម្បទា តាមរយៈវិទ្យាស្ថានសុខភាពផ្លូវចិត្ត ក្រុមប្រឹក្សាលើកកម្ពស់សុខភាព និងភ្នាក់ងារសេវាសង្គម។

ក្រសួងអប់រំ (MOE) សឹង្ហបុរី បានប្រកាសថា ខ្លឹមសារមេរៀនថ្មីនេះ បានដាក់ឱ្យប្រើប្រាស់នៅតាមសាលារៀន ចាប់ពីខែកញ្ញា ដោយមានបញ្ចូលនូវខ្លឹមសារទាក់ទងនឹងវិទ្យាសាស្ត្រនៅពីក្រោយការញៀនផងដែរ ដើម្បីជួយសិស្សឱ្យយល់ពីរបៀបដែលការជក់បារីអេឡិចត្រូនិច អាចនាំឱ្យមនុស្សញៀន។

ក្រសួងបានបន្ថែមថា មាតិកាទាំងនោះ ក៏ផ្ដល់នូវការណែនាំជាក់ស្ដែង អំពីរបៀប​ ដែលសិស្សអាចបដិសេធ ចំពោះការជក់បារីអេឡិចត្រូនិច។

លើសពីនេះ នៅក្នុងការស្ទង់មតិសិស្សអំពីរឿងពិត និងមិនពិតអំពីការជក់បារីអេឡិចត្រូនិច ប្រធានផ្នែកវិទ្យាសាស្រ្តនៃវិទ្យាល័យ Presbyterian លោកស្រី Heng Hui Peng បានសង្កេតឃើញថា ប្រសិនបើសិស្សមិនដឹងចម្លើយទេ ពួកគេច្រើនតែធ្វើតាមមិត្តភក្ដិតរបស់គេ។

លោកស្រីបានបន្ថែមថា «នេះជាអ្វីដែលយើងព្រួយបារម្ភ ពីព្រោះនៅពេលដែលពួកគេធ្វើតាមមិត្តភក្ដិ ព័ត៌មានមិនពិតមួយចំនួន អាចនឹងរីករាលដាលក្នុងចំណោមយុវជន។ ហើយនេះជាមូលហេតុ ដែលការអប់រំពួកគេអំពីការពិតប្រកបដោយភាពត្រឹមត្រូវ គឺជាតួនាទីរបស់យើង។»

កាលពីឆ្នាំមុន ក្រុមប្រឹក្សាលើកកម្ពស់សុខភាព (HPB) បានដាក់ឱ្យដំណើរការសាកល្បងមួយ ដើម្បីបណ្ដុះបណ្ដាលថ្នាក់ដឹកនាំសិស្ស នៅក្នុងក្រុមស្លៀកពាក់ឯកសណ្ឋានចំនួនបី ដើម្បីក្លាយជាឯកអគ្គរដ្ឋទូតប្រឆាំងការជក់បារីអេឡិចត្រូនិចនៅក្នុងសាលារៀនពួកគេ។

គិតត្រឹមខែតុលា ឆ្នាំ២០២៥ HPB បានបំពាក់ចំណេះដឹង និងជំនាញដល់សិស្សជាង ២៥០នាក់ នៅសាលាចំនួន ៣៥ ដើម្បីលើកកម្ពស់ការរស់នៅ ដែលគ្មានការជក់បារីអេឡិចត្រូនិចក្នុងចំណោមមិត្តភក្តិរបស់ពួកគេ។

HPB បានបន្ថែមថា សិស្សទាំងអស់ចូលរួមវគ្គបណ្ដុះបណ្ដាលតាមអ៊ីនធឺណិតរយៈពេល ២ម៉ោង ដើម្បីអប់រំអំពីបទបញ្ញត្តិរបស់ប្រទេសសិង្ហបុរីចំពោះ ផលិតផលនីកូទីន, គ្រោះថ្នាក់នៃការជក់បារីអេឡិចត្រូនិច, និន្នាការជក់បារីអេឡិចត្រូនិចរបស់យុវជនបច្ចុប្បន្ន និងយុទ្ធសាស្ត្រទីផ្សារ ដែលក្រុមហ៊ុនបារីអេឡិចត្រូនិចប្រើ ដើម្បីកំណត់គោលដៅយុវជន។

ពួកគេក៏ត្រូវបានបង្រៀនជំនាញគ្រប់គ្រងគម្រោងជាមូលដ្ឋាន រៀបចំសកម្មភាពជាក់ស្ដែង ដើម្បីចូលរួមជាមួយមិត្តភក្ដិពួកគេ និងត្រូវបានផ្ដល់ព័ត៌មានអំពីការគាំទ្រ ការបញ្ឈប់សកម្មភាពជក់បារីអេឡិចត្រូនិច៕