តើអ្វីដែលធ្វើឱ្យអ្នកសប្បាយចិត្ត? ប្រហែលជាការក្រោកពីព្រលឹម ដើម្បីមើលថ្ងៃរះ ការដើរលេងជាមួយក្រុមគ្រួសារ និងមិត្តភ័ក្តិនៅចុងសប្ដាហ៍ ឬទៅដើរលេងនៅមាត់សមុទ្រជាដើម។ ប៉ុន្តែ អ្នកស្រី Lowri Dowthwaite-Walsh ដែលជាអ្នកចិត្តសាស្ត្រ នៃ University of Central Lancashire បានលើកឡើងថា មនុស្សរីករាយមានទំនោរ បង្កើតទំនាក់ទំនងល្អជាមួយមនុស្សជុំវិញខ្លួន មានសុខភាពរាងកាយល្អ និងចូលរួមចំណែកយ៉ាងសកម្មក្នុងសហគមន៍។ អ្នកចិត្តសាស្ត្ររូបនេះ បានបង្ហាញពីទម្លាប់សាមញ្ញចំនួន ៤ របស់មនុស្សរីករាយ។

១. ធ្វើចលនារាងកាយ ៖ ការស្រាវជ្រាវរបស់ MDPI បង្ហាញថា ការដើររយៈពេល ៣០នាទីក្នុងមួយថ្ងៃអាចធ្វើឱ្យសុខភាពរបស់យើងប្រសើរឡើង។ លើសពីនេះ មនុស្សនឹងទទួលបានអត្ថប្រយោជន៍កាន់តែច្រើននៅពេលដែលពួកគេចូលរួមក្នុងការធ្វើលំហាត់ប្រាណកម្រិតមធ្យម (Moderate exercise) និងខ្លាំង (high-intensity) ព្រោះសកម្មភាពនេះជួយបង្កើនអត្រាចង្វាក់បេះដូង។ លំហាត់ប្រាណកម្រិតមធ្យម គឺជាលំហាត់ប្រាណ ដែលអ្នកហាត់នៅតែអាចនិយាយបាន និងមានចន្លោះដកដង្ហើម។

២. មានទំនាក់ទំនង ៖ ការសិក្សាថ្មីមួយបានរកឃើញថា ការចូលរួមជាមួយមិត្តភក្តិ និងក្រុមគ្រួសារ នៅពេលដែលយើងមានអារម្មណ៍មិនសប្បាយចិត្ត គឺអាចជួយកាត់បន្ថយអារម្មណ៍អវិជ្ជមានបានមួយកម្រិត។ នេះប្រហែលជាដោយសារតែធម្មជាតិមនុស្ស ចង់បានការលួងលោម និងការគាំទ្រ ដើម្បីឱ្យមានអារម្មណ៍សប្បាយរីករាយ និងបន្តសកម្មភាពផ្សេងទៀត។ ម្យ៉ាង ការចំណាយពេលនៅម្នាក់ឯងច្រើន ក៏ជាមូលហេតុដែលនាំឱ្យអ្នកមានអារម្មណ៍អវិជ្ជមានផងដែរ។

៣. មានផ្នត់គំនិតសុទិដ្ឋិនិយម ៖ ការសិក្សាបានរកឃើញថា ការមានផ្នត់គំនិតសុទិដ្ឋិនិយមច្រើន អាចទប់ទល់នឹងអារម្មណ៍អវិជ្ជមាន និងបង្កើនសុភមង្គលផ្លូវចិត្ត។ ការគិតអំពីរឿងល្អៗ និងចំណុចវិជ្ជមានដែលអ្នកមាន ធ្វើឱ្យអ្នកគិតវិជ្ជមាន និងមានអារម្មណ៍រីករាយជាងមុន។ អ្នកអាចអនុវត្តទម្លាប់នេះតាមរយៈការនិយាយជាមួយមនុស្សជិតស្និទ្ធ ឬសរសេររឿងបី ដែលអ្នកធ្វើបានល្អបំផុតជារៀងរាល់ថ្ងៃ ។ ការបង្ហាញពីអារម្មណ៍សុទិដ្ឋិនិយមមានទំនាក់ទំនងខ្លាំងទៅនឹងអារម្មណ៍វិជ្ជមាន និងលើកសុខុមាលភាពមនុស្សឱ្យកាន់តែប្រសើរ។

៤. ការចំណាយពេលជាមួយសត្វចិញ្ចឹម ៖ តាមលទ្ធផលនៃការសិក្សារបស់ MDPI បង្ហាញថា សកម្មភាពសត្វចិញ្ចឹម ជំរុញឱ្យមនុស្សកាន់តែមានភាពសកម្មក្នុងការរស់នៅ ព្រមទាំងបង្កើនភាពរីករាយ។ លើសពីនេះ សត្វចិញ្ចឹមក្នុងគ្រួសារផ្តល់អត្ថប្រយោជន៍ជាច្រើនដល់សុខភាព និងសុភមង្គល ព្រោះវាមិនត្រឹមតែផ្តល់ភាពជាដៃគូដ៏ល្អរបស់មនុស្សប៉ុណ្ណោះទេ ប៉ុន្តែថែមទាំងកាត់បន្ថយអត្រានៃជំងឺធ្លាក់ទឹកចិត្ត និងការថប់បារម្ភផងដែរ។ ម្យ៉ាងទៀត វាអាចជួយបង្កើនកម្រិតសុភមង្គល និងការគោរពខ្លួនឯង (Self-esteem)៕