ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សុខភាពផ្លូវចិត្ត គឺជាបញ្ហាសុខភាពសាធារណៈដ៏ធំរបស់ពិភពលោក។ យោងតាមអង្គការសុខភាពពិភពលោក (WHO) បានឱ្យដឹងថា មានមនុស្សប្រមាណជាង ១ពាន់លាននាក់ បានរងគ្រោះដោយសារបញ្ហាសុខភាពផ្លូវចិត្ត ឬការបំពានសារធាតុញៀន នៅមុនពេលបញ្ហាកូវីដ-១៩ ផ្ទុះឡើង ខណៈការកើតមានវីរុសនេះ បានបង្កើនទំហំ នៃបញ្ហាកាន់តែធំ។ បើតាមតួលេខ ការកើនឡើងនៃការធ្លាក់ទឹកចិត្ត និងការថប់បារម្ភ មានរហូតដល់ចន្លោះពី ២៥ ទៅ២៧ភាគរយ បន្ទាប់ពីកូវីដ-១៩ ផ្ទុះឡើង។
អ្នកស្រាវជ្រាវនៃសាលាវេជ្ជសាស្ត្រ Harvard និងសាកលវិទ្យាល័យ Queensland បានរកឃើញថា ក្នុងពេលជាមួយគ្នានេះ ប្រហែលពាក់កណ្ដាលនៃចំនួនប្រជាជនពិភពលោក ត្រូវបានគេរំពឹងថា នឹងជួបប្រទះបញ្ហាសុខភាពផ្លូវចិត្ត ក្នុងការរស់នៅរបស់ពួកគេ។
មូលហេតុដែលនាំឱ្យបញ្ហាកាន់តែធ្ងន់ធ្ងរ ដោយសារកង្វះអ្នកជំនាញមានសមត្ថភាពខ្ពស់គ្រប់គ្រាន់ ក្នុងការព្យាបាលអ្នកជំងឺ។ នៅទូទាំងពិភពលោក មានបុគ្គលិកសុខភាពផ្លូវចិត្តចំនួន ១៣នាក់ ក្នុងចំណោមមនុស្ស ១០ម៉ឺននាក់, នេះបើយោងតាម WHO’s Mental Health Atlas ។
អ្វីដែលគួរឱ្យចាប់អារម្មណ៍បន្ថែមទៀតនោះ គឺគម្លាតនៃចំនួនអ្នកជំនាញផ្នែកសុខភាពផ្លូវចិត្ត ក្នុងប្រទេសដែលមានចំណូលខ្ពស់មានចំនួនច្រើនជាងប្រទេសចំណូលទាបដល់ទៅ៤០ដង។ កង្វះកម្លាំងពលកម្ម បានបង្កឱ្យមានដែនកំណត់នៃការថែទាំ និងព្យាបាលសុខភាពផ្លូវចិត្ត ជាពិសេសនៅក្នុងប្រទេសដែលមានប្រាក់ចំណូលទាប និងមធ្យម ខណៈការសិក្សាបង្ហាញថា នៅប្រទេសទាំងនេះ មានមនុស្សរហូតដល់ទៅ ៨៥ភាគរយនៃអ្នកមានបញ្ហាផ្លូវចិត្តក្នុងពិភពលោក ដែលមិនទទួលបានការព្យាបាល។
គម្លាតនៃការផ្ដល់សេវាកម្ម និងតម្រូវការបង្ហាញពីតម្រូវការបន្ទាន់ សម្រាប់ដោះស្រាយបញ្ហានេះ។ ស្របនឹងបញ្ហានេះ បញ្ញាសិប្បនិម្មិត (AI) មានសក្ដានុពលក្នុងការធ្វើឱ្យប្រសើរឡើងនូវលទ្ធភាពនៃការស្វែងរកជំនាញព្យាបាលផ្លូវចិត្ត ខណៈមានមនុស្សជាច្រើនចង់សាកល្បងប្រើបច្ចេកវិទ្យានេះ សម្រាប់ការព្យាបាល។ នេះបើយោងតាមការស្ទង់មតិមនុស្សចំនួន ១៦០០០នាក់ នៅក្នុងប្រទេសចំនួន ១៦។
ការអនុវត្តឧបករណ៍បញ្ញាសិប្បនិម្មិត (AI) នឹងប្រែប្រួលអាស្រ័យលើភាពធ្ងន់ធ្ងរនៃស្ថានភាពអ្នកជំងឺ ទាំងការធ្វើរោគវិនិច្ឆ័យមូលដ្ឋាន និងរោគសញ្ញា ដែលពួកគេកំពុងជួបប្រទះ។ ប៉ុន្តែក្នុងករណីជាច្រើន បញ្ញាសិប្បនិម្មិត (AI) អាចបង្កើនលទ្ធភាពក្នុងការថែទាំបានច្រើន។ បច្ចេកវិទ្យានេះក៏ត្រូវបានគេប្រើដើម្បីវិភាគទិន្នន័យ និងជួយគ្រូពេទ្យព្យាបាលអ្នកជំងឺក្នុងពេលវេលាជាក់ស្ដែង។
ការកើនឡើងនៃការព្យាបាលសុខភាពផ្លូវចិត្ត ដោយប្រើបញ្ញាសិប្បនិម្មិត (AI)
មានវិធីជាច្រើនដែលបញ្ញាសិប្បនិម្មិត (AI) ត្រូវបានប្រើក្នុងការព្យាបាលសុខភាពផ្លូវចិត្ត។ បញ្ញាសិប្បនិម្មិត (AI) អាចបញ្ចូលគ្នា និងប្រើប្រាស់ការយល់ដឹងពីប្រភពជាច្រើន ដូចជា សៀវភៅសិក្សាវេជ្ជសាស្ត្រ ឯកសារស្រាវជ្រាវ ប្រព័ន្ធកំណត់ត្រាសុខភាពអេឡិចត្រូនិក និងឯកសារព្យាបាល ដើម្បីជួយអ្នកជំនាញផ្នែកសុខភាពផ្លូវចិត្ត ណែនាំវិធីសាស្ត្រព្យាបាល និងសិក្សាពីរបៀបដែលអ្នកជំងឺគួរអនុវត្ត ដើម្បីព្យាបាលខ្លួន។ ទន្ទឹមនេះ កម្មវិធីធ្វើរោគវិនិច្ឆ័យដោយខ្លួនឯង (Self-diagnosis), សារស្វ័យប្រវត្តិដោយបញ្ញាសិប្បនិម្មិត (Chatbot) និងឧបករណ៍ព្យាបាលដោយការសន្ទនាផ្សេងទៀត ដើម្បីកាត់បន្ថយឧបសគ្គ នៃការចូលប្រើសម្រាប់អ្នកជំងឺ ដែលមិនសូវធ្ងន់ធ្ងរ។
ការសិក្សាបានបង្ហាញថា មនុស្សវ័យក្មេងមានការចាប់អារម្មណ៍ច្រើន ក្នុងការប្រើប្រាស់បច្ចេកវិទ្យា ដើម្បីព្យាបាលបញ្ហាផ្លូវចិត្តរបស់ខ្លួន ក្នុងនោះមាន ៣៦ភាគរយ ជា Gen Z និង ២៨ភាគរយ ជាមនុស្សនៅជំនាន់ millenials ។ ខណៈអ្នកប្រើប្រាស់ ៤នាក់ ក្នុងចំណោម ១០នាក់ និយាយថា ពួកគេចូលចិត្តការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីព្យាបាលផ្លូវចិត្ត ហើយប្រហែល ១៥ភាគរយ និយាយថា ពួកគេជឿថា បញ្ញាសិប្បនិម្មិត (AI) មានភាពឆ្លាតវៃជាងមនុស្ស។ លទ្ធផលនេះ ស័ក្ដិសមសម្រាប់ប្រើប្រាស់ក្នុងប្រទេសកំពុងអភិវឌ្ឍ ដែលកំពុងខ្វះខាតអ្នកជំនាញផ្នែកផ្លូវចិត្ត។
ប្រើប្រាស់បញ្ញាសិប្បនិម្មិត (AI) ដោយប្រុងប្រយ័ត្ន ជាជំនួយក្នុងការព្យាបាល
ទោះជាយ៉ាងណាក៏ដោយ បច្ចេកវិទ្យានេះនៅតែមានហានិភ័យក្នុងការប្រើប្រាស់។ ហេតុនេះទាមទារឱ្យមានការយល់ដឹងទូលំទូលាយអំពីបច្ចេកវិទ្យានេះ មុនពេលដាក់ពង្រាយការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីធានាថាការថែទាំមានសុវត្ថិភាព និងមានប្រសិទ្ធភាព។
ហេតុនេះ ដើម្បីទាញយកប្រសិទ្ធភាពពីបច្ចេកវិទ្យាបញ្ញាសិប្បនិម្មិត (AI) គួរតែមានការរួមបញ្ចូលគ្នារវាង AI និងមនុស្ស។ កិច្ចសហការរវាងបញ្ញាសិប្បនិម្មិត (AI) និងមនុស្ស នឹងអនុញ្ញាតិឱ្យអ្នកជំនាញផ្លូវចិត្ត អាចផ្ដោតអារម្មណ៍បានកាន់តែល្អ លើការស្វែងយល់អំពីផ្លូវចិត្តអ្នកជំងឺ ការថែទាំ ការពង្រឹងលទ្ធផល នៃការព្យាបាល និងប្រសិទ្ធភាព៕
