ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការចិញ្ចឹមបីបាច់កូនគឺជាកាតព្វកិច្ចរបស់អាណាព្យាបាល ឪពុកជាតួអង្គម្នាក់ដែលមានភាពសំខាន់ និងមាន ឥទ្ធិពលក្លាយជាអ្នកបង្ហាត់បង្រៀនកូន និងការថែទាំកូនជាទូទៅ។ ការចិញ្ចឹមកូនឱ្យធំធាត់មិនត្រឹមតែ ផ្តល់អាហារ និងការរស់នៅប៉ុណ្ណោះទេ ប៉ុន្តែពាក់ព័ន្ធនឹងការលូតលាស់របស់កូនផងដែរ។
ពីមួយជំនាន់ ទៅមួយជំនាន់ ការថែទាំកូន តែងតែមានការប្រែប្រួល ទោះមិនខុសប្លែកទាំងស្រុង ប៉ុន្តែនៅតែត្រូវការចំណេះដឹងបន្ថែម ដើម្បីយកទៅអនុវត្តន៍មុននឹងក្លាយទៅជាឪពុកដែលឆ្លើយតបទៅនឹងតម្រូវការកូននាពេលបច្ចុប្បន្ន ឬទៅតាមសម័យកាល។ យោងតាមគេហទំព័រ Healthline បានបង្ហាញនូវមូលដ្នានគ្រឹះប្រាំចំណុចក្នុងការត្រៀមខ្លួនក្លាយជាឪពុក ឬមុននឹងក្លាយជាអាណាព្យាបាល ដោយមានរៀបរាប់លម្អិតនៅខាងក្រោម ៖
១. អាននិងសិក្សាស្រាវជ្រាវ ៖ ទោះបីជាផ្អែកលើកត្តាធម្មជាតិ ឪពុកមិនមែនជាបុគ្គលដែលមានលទ្ធភាពពពោះបានក៏ពិតមែន ប៉ុន្តែមិនមែនមានន័យលោកឪពុក មិនត្រូវការបទពិសោធន៍នៃការថែទាំស្រ្តីមានផ្ទៃពោះនោះដែរ។ មូលហេតុនោះគឺ ព្រោះវាជាផ្នែកមួយនៃទំនួលខុសត្រូវក្នុងនាមជាឪពុករបស់ក្មេង ដូច្នេះក៏ឪពុកត្រូវស្វែងយល់អំពីការថែទាំ ការទទួលទានអាហារ ការពិនិត្យសុខភាព និងការជ្រើសរើសសេវាកម្មផ្សេងៗដើម្បីគាំពារសុខភាពដល់ម្តាយ និងកូន ឬក្រោយសម្រាលកូនជាដើម។ នៅពេលដែលបុរស អាននិងសិក្សាស្រាវជ្រាវឯកសារដែលសរសេរដោយអ្នកជំនាញដើម្បីត្រៀមខ្លួនទុកជាមុន នោះនឹងផ្តល់ភាពងាយស្រួលក្នុងការជ្រើសរើសកន្លែងសម្រាប់ថែទាំសុខភាពម្តាយកូន និងកន្លែងផ្តល់កំណើតកូនផងដែរ។
២. ពង្រឹងសុខភាពខ្លួនឯង ៖ គិតអំពីការចង់បានទារក ជាដំបូងគឺត្រូវគិតពីសុខភាពខ្លួនឯងជាមុន ព្រោះអាណាព្យាបាលដែលមានសុខភាពល្អក៏ជះឥទ្ធិពលវិជ្ជមានទៅកាន់ទារកដែរ ការចាប់ផ្តើមទាំងនោះមានដូចជាការផ្តាច់បារី ឬផ្តាច់ជាតិអាល់កុល ព្រោះកត្តាទាំងនេះប៉ះពាល់ដោយផ្ទាល់ទៅកាន់សុខភាពទារកទាំងនៅក្នុងផ្ទៃ និងក្រោយសម្រាលហើយ។ ក្រៅពីនោះការមានទម្លាប់ទទួលទានអាហារសុខភាព ដែលមាជីវជាតិគ្រប់គ្រាន់ទៅតាមតម្រូវការផ្ទាល់ខ្លួន សុទ្ធសឹងតែការរួមចំណែកដល់សុខភាពខ្លួនឯង និងអនាគតកូន។
៣. គិតឱ្យហើយថាខ្លួនចង់ក្លាយជាឪពុកប្រភេទណា ៖ មិនមែនកូនគ្រប់គ្នា សុទ្ធតែមានទំនាក់ទំនងល្អជាមួយឪពុកទេ យ៉ាងណាមិញប្រសិនបើរកឃើញថា ខ្លួនឯងមានទំនាក់ទំនងល្អជាមួយឪពុកស្រាប់ហើយ និងមានការពេញចិត្តនឹងរបៀបដែលខ្លួនរស់នៅហើយ ដូចនេះបុគ្គលដែលគួរតែក្លាយទៅជាគំរូភាព គឺជាឪពុកខ្លួនឯងផ្ទាល់តែម្តង។
៤. ដឹងពីការចែករំលែកទំនួលខុសត្រូវ ៖ ត្រៀមខ្លួនក្លាយជាឪពុកម្នាក់ ចាំបាច់ត្រូវចេះដឹងអំពីរបៀបនៃការថែទាំក្មេង ព្រោះវាជាសកម្មភាពដែលត្រូវទទួលខុសត្រូវដូចគ្នា ដូចជា ការប្តូរខោទឹកនោមក្មេង ការងូតទឹក ការប្រឡែងក្មេងលេង ការសង្កេតមើលក្មេង លួងបំពេរក្មេង និងការផ្តល់អាហារដែលត្រឹមត្រូវតាមពេលផងដែរ។
៥. រំឭកពីគុណតម្លៃនៃខ្លួនឯង ៖ ក្លាយខ្លួនជាឪពុកមានភាពហត់នឿយជាច្រើន ទាំងចិត្ត និងកាយ ដែលធ្វើឱ្យម្តងម្កាល លោកឪពុកគិតថា ខ្លួនដូចជាមិនមានភាពស្និទ្ធស្នាលជាមួយគ្រួសារ ជាមួយកូន និងការភ្លេចថាខ្លួនជាបុគ្គលសំខាន់ក្នុងផ្ទះ។ អារម្មណ៍បែបនេះកើតឡើងជាពិសេសសម្រាប់ឪពុកដែលត្រូវបំពេញការងារនៅក្រៅបន្ថែមច្រើនម៉ោង! ក្នុងស្ថានការណ៍ត្រូវទៅធ្វើការហើយនៅឆ្ងាយកូនៗ សូមកុំបន្ទោសខ្លួនឯង ថា ជាឪពុកមិនល្អគ្រប់គ្រាន់ឱ្យសោះ គួររំលឹកខ្លួនឯងមកវិញថា ការចេញទៅធ្វើការក៏ដើម្បីភាពរីកចម្រើននៃគ្រួសារទាំងមូលដូចគ្នាដែរ។ ងារជាឪពុក ជាកាតព្វកិច្ចដែលមានទំនួលខុសត្រូវធ្ងន់ ហើយត្រូវការប្រើរយៈពេលយូរ រួមទាំងត្រូវការឱ្យលះបង់ទាំងកម្លាំងកាយចិត្ត និងជាបុគ្គលដែលមានគុណតម្លៃធំធេង៕
