អាការថប់បារម្ភជាទូទៅ ជំរុញឱ្យការរស់នៅប្រចាំថ្ងៃកើតមាននូវការព្រួយបារម្ភច្រើន អារម្មណ៍អន្ទះសាស្ទើរតែគ្រប់ជំហាន ខ្លាចនេះ ខ្លាចនោះ ទាំងមិនទាន់មានបញ្ហាអ្វីកើតមាន រាងកាយចុករួយ បង្កើនភាពតានតឹង និងអស់កម្លាំងខុសពីសព្វមួយដង។

ចុងឆ្នាំ២០២៥នេះ គេហទំព័រ Healthline បានឱ្យដឹងថា សុខភាពផ្លូវចិត្តដែលរងផលប៉ះពាល់ទៅលើប្រជាជននៅទូទាំង​ពិភពលោក តាមរយៈអាការថប់បារម្ភ គឺប្រមាណ 7.3% ហើយមានកត្តាជាច្រើនកំពុង​រុញច្រានយុវជន ឱ្យប្រទះនឹងបញ្ហាទាំងអស់នេះ ក្នុងនោះមានកត្តាមួយដែលពាក់ព័ន្ធនឹងទម្លាប់និងតម្រូវការប្រចាំថ្ងៃ គឺការបរិភោគអាហារ។ ការសម្រេចចិត្តជ្រើសរើសប្រភេទអាហារដែលរួមចំណែកដល់ការកាត់បន្ថយ ឬការពារអាការថប់បារម្ភ បានរួមចំណែកផ្តល់ផលវិជ្ជមានទៅកាន់សុខុមាលភាពទាំងមូល។

យ៉ាងណាមិញ មានប្រភេទអាហារមួយចំនួនដែលងាយស្រួលរក ហើយមានលក់ស្ទើរតែគ្រប់តំបន់ និងមានតួនាទីជួយបន្ធូរបន្ថយ ពីស្ថានភាពអាការថប់បារម្ភ មានដូចជា យូហ្កើត (Yogurt ) តែបៃតង ( Green tea ) និងស៊ុតសត្វជាដើម ( eggs) ។

តួនាទីរបស់យូហ្កើត​ ឬយាអួទឹកដោះគោជូរ (Yogurt ) ៖ យូហ្កើត មិនត្រឹមតែជាអាហារសម្រន់ ដែលមានរស់ជាតិឆ្ងាញ់ និងអាចយកទៅច្នៃ ជាបង្អែមបានជាច្រើនមុខប៉ុណ្ណោះទេ! ប៉ុន្តែក៏បានរួមចំណែកយ៉ាងសកម្ម ក្នុងការកាត់បន្ថយអាការថប់បារម្ភ ដោយសារវាមានសារធាតុ ប្រូបាយអូទិក ឬបាក់តេរីល្អ ហើយសារធាតុប្រូបាយអូទិក ដែលមាននៅក្នុងយូហ្កើត​ ឬ ទឹកដោះគោយ៉ាអួនេះហើយ ធ្វើឱ្យសុខភាពប្រព័ន្ធរំលាយអាហារបានល្អ កាត់បន្ថយការរលាក និងជួយបណ្តេញជាតិពុលពីរាងកាយទៀតផង។ ប៉ុន្តែអ្វីដែលគួរចងចាំនោះ គឺមិនមែនទឹកដោះគោយាអួ ឬផលិតផលរបស់យូហ្កើតទាំងអស់ មានផ្ទុកសារធាតុ ប្រូបាយអូទិក(probiotics) គ្រប់ម៉ាកសញ្ញានោះទេ ដូច្នេះ តម្រូវឱ្យអ្នកដែលទៅទិញអាហារប្រភេទនេះ មានការពិនិត្យផ្ទៀងផ្ទាត់ថា ផលិតផលបានចុះបញ្ជីជាផ្លូវការ និងមានការគាំទ្រពីក្រសួងសុខាភិបាល ឬក្រសួងពាក់ព័ន្ធនានាដែរឬអត់។

តែបៃតង ៖ តែបៃតងមានឥទ្ធិពលម្យ៉ាងក្នុងការលើកកម្ពស់ភាពស្ងប់ស្ងាត់ផ្នែកអារម្មណ៍ ពង្រឹងសុខភាពខួរក្បាល និងរួមចំណែកកាត់បន្ថយអាការថប់បារម្ភ ហើយតែប្រភេទនេះ ក៏អាចយកទៅផ្សែផ្សំដើម្បីបង្កើនបានជាភេសជ្ជៈចម្រុះ ដើម្បីទទួលទានជាអាហារសម្រន់ និងមានភាពងាយស្រួល ក្នុងការទទួលទានគ្រប់ទីកន្លែង។

ស៊ុតសត្វ ៖ ស៊ុតជាអាហារដ៏ពេញនិយមជាសកល, អាហារប្រភេទនេះ មិនត្រឹមតែងាយស្រួលរក និងផ្តល់ថាមពលទៅកាន់រាងកាយនោះទេ ប៉ុន្តែក៏មានតួនាទីជំរុញអារម្មណ៍រីករាយផងដែរ។ សម្រាប់បុគ្គលដែលទំនងជាមានសញ្ញានៃជំងឺធ្លាក់ទឹកចិត្ត និងការថប់បារម្ភ ពុំគួរមើលរំលងអាហារល្អៗដែលបានរៀបរាប់ ឬអាហារដែលផ្តល់ភាពងាយស្រួលសម្រាប់ខ្លួនឯងក្នុងការទិញ ដូចជាបន្លែបង្ការ និងផ្លែឈើស្រស់ៗជាដើម៕