ការគេងមានសារៈសំខាន់ជាមូលដ្ឋានសម្រាប់សុខភាពផ្លូវកាយ ផ្លូវចិត្ត និងផ្លូវអារម្មណ៍។ ទន្ទឹមនឺងនេះ ការគេងមិនលក់ គឺជាចំណែកនៃស្ថានភាពជំងឺរ៉ាំរ៉ៃមួយចំនួន ដូចជា ជំងឺធ្លាក់ទឹកចិត្ត ជំងឺធាត់ ជំងឺទឹកនោមផ្អែម និងជំងឺដាច់សរសៃឈាមខួរក្បាល។ ខាងក្រោមនេះ ជាជំហានចំនួន ៧ ដែលជួយអ្នកឱ្យគេងលក់ស្កប់ស្កល់ និងក្រោកពីដំណេកជាមួយអារម្មណ៍ស្រស់ស្រាយ។

១. កាត់បន្ថយពន្លឺនៅក្នុងបន្ទប់ ៖ ភាពងងឹតធ្វើឱ្យអ្នកមានអារម្មណ៍ថាសម្រាក និងជំរុញការផលិតអរម៉ូនមេឡាតូនីនរបស់ខួរក្បាល ដែលជាអរម៉ូនជួយគ្រប់គ្រងចង្វាក់ចលនាក្នុងរាងកាយ។ វាំងនន និងស្រមោលងងឹត គឺជាសម្ភារដែលជួយបង្កើតភាពងងឹតយ៉ាងមានប្រសិទ្ធភាព។ ចំណែកម៉ាសបាំងភ្នែក ក៏ជាបច្ចេកទេសមួយដែលល្អដូចគ្នា។ ម្យ៉ាងទៀត ត្រូវបិទ ឬបន្ថយពន្លឺឧបករណ៍អេឡិចត្រូនិច ដែលអ្នកប្រើមុនចូលគេង។

២. បន្ថយសីតុណ្ហភាព ៖ ការគេង និងសីតុណ្ហភាពរាងកាយ គឺមានទំនាក់ទំនងនឹងគ្នា។ នៅពេលដែលសីតុណ្ហភាពបរិយាកាស ឬបន្ទប់ដែលយើងកំពុងគេងធ្លាក់ចុះ វាអនុញ្ញាតឱ្យរាងកាយរបស់យើងមានសីតុណ្ហភាពថេរ ដូច្នេះ យើងអាចគេងបានយូរ។ សីតុណ្ហភាព ត្រជាក់ពេក ឬក្ដៅពេក អាចនឹងនាំឱ្យមានការរំខានដល់ដំណេក។

៣. ជៀសវាងការទទួលទានអាហារមុនចូលគេង ៖ ការចូលគេងជាមួយនឹងអាហារពេញពោះ គឺមិនល្អសម្រាប់ការរំលាយអាហារ ហើយមានទំនាក់ទំនងនឹងការច្រាលអាស៊ីតក្នុងក្រពះ។ ការញ៉ាំអាហារគួរតែមុនការចូលគេង ពីរទៅបីម៉ោង បន្ទាប់មកកំណត់សីតុណ្ហភាពក្នុងបន្ទប់គេងសមល្មម ឬភេសជ្ជៈក្តៅអ៊ុនៗ (ទឹករុក្ខជាតិ និងតែគ្មានជាតិកាហ្វេអ៊ីនជាដើម) និងជៀសវៀងការញ៉ាំអាហារសម្រន់ពេលយប់។

៤. ងូតទឹកក្ដៅអ៊ុនៗ ៖ ការងូតទឹក ឬទឹកក្ដៅអ៊ុនៗមុនចូលគេង អាចជួយសម្លាប់មេរោគ ញើស បាក់តេរី និងធ្វើឱ្យស្បែកស្អាត។ ជាពិសេស សកម្មភាពនេះ ជួយពង្រឹងគុណភាពនៃការគេង ដោយបន្ថយសីតុណ្ហភាពស្នូលរបស់រាងកាយ ដែលជាសញ្ញាប្រាប់ថា រាងកាយដល់ពេលត្រូវគេងហើយ។

៥. ជ្រើសរើសក្លិនសមស្របសម្រាប់ការគេង ៖ ការសិក្សាបែបវិទ្យសាស្ត្របានបង្ហាញថា ប្រេងផ្កាឡាវេនឌ័រ អាចជួយឱ្យអ្នកមានអារម្មណ៍ថា ធូរស្បើយ និងមានប្រសិទ្ធភាពជាជំនួយដល់ការគេង។ ដូចគ្នានេះដែរ ក្លិនផ្កា អេកាលីបតឹស (eucalyptus) អាចជួយ ធ្វើឱ្យអ្នកមានអារម្មណ៍ថាសម្រាក និងកាត់បន្ថយភាពតានតឹងនៅពេលយប់។ អ្នកអាចបាញ់ក្លិនទាំងពីរនេះ នៅលើទ្រូង ក ឬខ្នើយ ដើម្បីងាយស្រូបយកក្លិនក្រអូប។

៦. មានទម្លាប់ហាត់ប្រាណ ៖ លំហាត់ប្រាណទៀងទាត់ និងប្រចាំថ្ងៃជួយឱ្យគេងលក់ស្រួល ទោះគេងពេលថ្ងៃក៏ដោយ។

៧. គេងលើពូកដែលមានផាសុកភាព ៖ ពូក គ្រែ និងសម្លៀកបំពាក់ ដែលអ្នកប្រើ សុទ្ធតែរួមចំណែកដល់សីតុណ្ហភាពរាងកាយ។ ក្នុងលក្ខណៈនៃការគេង ដែលល្អ អ្នកគួរតែគេងប្រកបដោយអារម្មណ៍ផាសុកភាព និងស្ងួត។ ការគេងបានទៀងទាត់ និងគ្រប់គ្រាន់ គឺបញ្ហារបស់មនុស្សជាច្រើន។ ប្រសិនបើអ្នកកំពុងតែមានបញ្ហានេះដែរ អ្នកអាចសាកល្បងបច្ចេកទេសដែលបានរៀបរាប់នេះ អាចបង្កើតទម្លាប់ដែលមានប្រយោជន៍សម្រាប់អ្នក៕