ភ្នំពេញ – កតញ្ញូមាតាបិតា គឺជាករណីកិច្ច ដែលកូលប្រុសស្រីត្រូវបំពេញ​ជាចាំបាច់ក្នុងការរស់នៅ។ ទង្វើនេះ គឺជាមូលដ្ឋានគ្រឹះនៃគុណធម៌របស់មនុស្ស ដែលនាំមកនូវសុ​ភមង្គលក្នុងក្រុមគ្រួសារ និងជំរុញឱ្យសង្គមមានភាពចម្រុងចម្រើន សុខដុមរមនា និងឧត្តុងឧត្តម។ យ៉ាងណាមិញ លក្ខខណ្ឌនៃការរស់នៅក្នុងសង្គមបច្ចុប្បន្ន តម្រូវឱ្យកូនៗរស់នៅឆ្ងាយពីគ្រួសារ និងម្ដាយឪពុក ដើម្បីសិក្សារៀនសូត្រ និងបំពេញមុខរបររកស៊ីចិញ្ចឹមជីវិត ជាហេតុនាំឱ្យទំនាក់ទំនង​រវាងកូន និងម្ដាយឪពុក ហាក់មានភាពឃ្លាតឆ្ងាយ និងមានឱកាសតិចតួចក្នុងការជួបជុំ។

ពេលវេលាចេះតែដើរទៅមុខ យុវជនក្នុងនាមជាកូនកាន់តែចម្រើនវ័យ ចំណែកម្ដាយឪពុកកាន់តែជរា និងថមថយកម្លាំងទៅតាមពេលវេលា។ រូបភាពនេះតម្រូវឱ្យកូនៗត្រូវបង្ហាញការយកចិត្តទុកដាក់ និងតបស្នងសងគុណដល់ពួកគាត់ តាមរយៈសកម្មភាពវិជ្ជមានផ្សេងៗ ។ ខណៈជីវភាពប្រចាំថ្ងៃមានភាពរវល់ខ្លាំង និងមិនសូវមានថ្ងៃឈប់សម្រាក ដូច្នេះថ្ងៃបុណ្យចូលឆ្នាំខ្មែរ គឺជាឱកាសដ៏ល្អបំផុត ដែលកុលបុត្រកុលធីតា អាចបង្ហាញសេចក្ដីដឹងគុណរបស់ខ្លួនចំពោះម្ដាយឪពុក។

បើតាមលោកបណ្ឌិត ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ បានលើកឡើងថា នៅពេលពិធីបុណ្យចូលឆ្នាំ គឺជាឱកាសមួយដែលកូនៗអាចសម្ដែងភាពកត្តញ្ញូទៅកាន់អ្នកមានគុណ តាមរយៈការជូនលុយកាក់ របស់ហូបចុក វត្ថុអនុស្សាវរីយ៍ ឬអ្វីដែលគាត់គិតថា គាត់មានលទ្ធភាពជូនបាន ដោយអាស្រ័យទៅលើធនធានជាក់ស្ដែង។

លោកបានបន្ថែមថា លើសពីនេះវាគឺជាឱកាសមួយ ដែលពួកគាត់អាចជួបជុំ ជីដូនជីតា ញាតិមិត្ត បងប្អូន ដើម្បីសួរសុខទុក្ខគ្នា ឬក៏មានលុយមានកាក់ មានរបស់របរអ្វី ពួកគាត់អាចចែករំលែកគ្នានាពេលនោះបាន។ ដោយឡែកតាំងពីដើមមកទំនៀមទម្លាប់ប្រពៃណីខ្មែរ មិនបានកំណត់ឱ្យច្បាស់លាស់ថា ត្រូវតែចែករំលែកឬជូនអ្វីឱ្យច្បាស់នោះទេ ប៉ុន្តែអាស្រ័យទៅតាមធនធានដែលយើងមាន។

គួរជម្រាបជូនថា រាល់​ឆ្នាំ ប្រជាពលរដ្ឋ​ខ្មែរ​និយម​រៀបចំ​ពិធីបុណ្យ​ចូល​ឆ្នាំ​ថ្មី​ប្រពៃណី​ជាតិ​នៅ​ថ្ងៃ​ទី១៣ ខែ​មេសា​ (យូរ​ៗម្ដង ថ្ងៃ​ទី ១៤ ខែ មេសា) ត្រូវ​​នឹង​ខែ ចេត្រ នៃ​ចន្ទគតិ ។ ក្នុងពិធីបុណ្យ​ដ៏ធំ​ប្រចាំឆ្នាំនេះ មិនត្រឹមតែមានជួបជុំគ្នាក្នុងគ្រួសារប៉ុណ្ណោះ​ទេ តែ​គេ​នាំ​គ្នា​ទៅ​ធ្វើ​បុណ្យ​នៅ​វត្ដ​អារាម​ ដែល​ជាមជ្ឈមណ្ឌល​អប់​រំ​ឱ្យ​មាន​​មនុស្សធម៌ និងសាមគ្គីភាព ។ លើសពីនេះ កូនៗអាចយកភស្ដុភារផ្សេងៗជូនដល់មាតាបិតា ហើយយកទឹកថ្លា ត្រជាក់មកស្រោចស្រព ដុះលាង ពួកគាត់ រួចថ្វាយបង្គំ ដើម្បីបង្ហាញការដឹងគុណ បង្កើនភាពស្និទ្ធស្នាល និងភាពរីករាយក្នុងក្រុមគ្រួសារ៕