ការសរសេរផែនការសម្រាប់ឆ្នាំថ្មី អាចជារឿងធម្មតាសម្រាប់មនុស្សមួយចំនួន ប៉ុន្តែវាជារឿងសំខាន់ណាស់សម្រាប់បុគ្គលដែលចង់អភិវឌ្ឍខ្លួនឱ្យកាន់តែរីកចម្រើន និងចង់សម្រេចគោលដៅជីវិត។ ទន្ទឹមគ្នានេះ ផែនការសម្រាប់ឆ្នាំថ្មី ជាវិធីសាស្រ្តល្អមួយសម្រាប់វ៉ាស់វែងភាពរីកចម្រើន បំពេញបន្ថែមចំណុចខ្វះខាត ព្រមទាំងជួយឱ្យជីវិតរស់នៅពោរពេញដោយគោលបំណងជាក់លាក់។

ខាងក្រោមនេះ ជាចំណុចមួយចំនួនដែលអ្នកអាចសាកល្បងអនុវត្តសរសេរផែនការសម្រាប់ឆ្នាំថ្មី ៖

១. សរសេរផែនការសម្រាប់ឆ្នាំថ្មី ៖ សរសេរផែនការឆ្នាំថ្មីដែលអ្នកចង់សម្រេចឱ្យបានចូលទៅក្នុងសៀវភៅ ឬកត់ត្រាក្នុងកម្មវិធីឌីជីថល។ ការធ្វើបែបនេះ ជួយឱ្យអ្នកដឹងអំពីគោលបំណងដែលអ្នកចង់ធ្វើសកម្មភាព និងអាចវាស់វែងអំពីភាពរីកចម្រើនរបស់ខ្លួនឯងនៅឆ្នាំបន្ទាប់។

២. កំណត់គោលដៅដែលគាំទ្រគោលបំណង ៖ តើ​មាន​គោល​ដៅ​ណា​មួយ​ដែល​អ្នក​ចង់​ធ្វើ​ទេ? តើគោលដៅទាំងនោះជាគោលដៅរយៈពេលខ្លី ឬរយៈពេលវែង? ព្យាយាមកំណត់អាទិភាពគោលដៅចាប់ពី៣ ទៅ៥ចំណុចដែលអ្នកអាចផ្តោតលើការខិតខំប្រឹងប្រែងធ្វើវា ហើយចងចាំថា គោលដៅទាំងនេះអាចផ្លាស់ប្តូរពេញមួយឆ្នាំ។ ឧទាហរណ៍ ការក្រោកពីគេងនៅពេលព្រឹក, ការហាត់ប្រាណទៀងទាត់, ការអានសៀវភៅឱ្យបាន១០ក្បាលក្នុងមួយឆ្នាំ។

៣. ឆ្លុះបញ្ចាំងខ្លួនឯង ៖ ការឆ្លុះបញ្ជាំងខ្លួនឯង គឺត្រូវចំណាយពេលគិតពិចារណា សញ្ជឹងគិត វាយតម្លៃ និងផ្តល់ការគិតយ៉ាងម៉ឺងម៉ាត់ចំពោះអាកប្បកិរិយា គំនិត ការលើកទឹកចិត្ត និងបំណងប្រាថ្នារបស់អ្នក។ ការឆ្លុះបញ្ចាំង គឺជាអ្វីមួយដែលអ្នកអាចធ្វើដោយខ្លួនឯងបានតាមពេលវេលាផ្ទាល់ខ្លួន ដែលអ្នកអាចបង្កើតកន្លែងសន្តិភាពសម្រាប់ខ្លួនឯង ដើម្បីមើលទៅលើបញ្ហាប្រឈមទាំងឡាយដែលអ្នកធ្លាប់មានកាលពីឆ្នាំមុន និងអ្វីដែលអ្នកបានរីកចម្រើន។ លើសពីនេះ ការបង្ហាញពីអារម្មណ៍ និងគំនិតរបស់យើងតាមរយៈការសរសេរអាចមានប្រយោជន៍សម្រាប់សុខភាពផ្លូវចិត្ត ហើយវាអាចជួយឱ្យយើងយល់អំពីអ្វីដែលយើងកំពុងមានអារម្មណ៍ ឬកំពុងគិតផងដែរ។

៤. បន្តតាមដានភាពរីកចម្រើន ៖ បន្ទាប់ពីកំណត់គោលដៅ ការតាមដានភាពរីកចម្រើន អាចជួយអ្នកឱ្យសម្រេចបាននូវគោលដៅទាំងនោះ។ វាអាចជួយអ្នកឱ្យយល់ពីប្រភេទនៃសកម្មភាពដែលនាំទៅដល់ការរីកចម្រើន និងវិធីសាស្ត្រណាដែលមានប្រសិទ្ធភាពបំផុត និងអ្វីដែលមិនទាន់អាចសម្រេចបាន។ លើសពីនេះ ការតាមដានភាពរីកចម្រើន អាចជួយអ្នកបង្កើតកាលវិភាគជុំវិញទម្លាប់របស់អ្នក និងបណ្តុះទម្លាប់ដែលដំណើរការល្អបំផុត។ អ្នកអាចតាមដានភាពរីកចម្រើនរបស់អ្នកតាមរយៈកម្មវិធី ClickUp , Strides , Weekdone , Clockify ជាដើម។

៥. ស្មោះត្រង់ជាមួយខ្លួនឯង ៖ វាមិនអីទេប្រសិនបើអ្នកមិនទាន់ត្រៀមខ្លួនរួចរាល់ក្នុងការគិតអំពីការបង្កើតផែនការឆ្នាំថ្មី ឬប្រសិនបើអ្នកកំពុងសួរថា តើត្រូវចាប់ផ្តើមពីណា? ប្រសិនបើអ្នកជ្រើសរើសបង្កើតផែនការសម្រាប់ឆ្នាំថ្មី សូមចាំថា ជីវិតបានកើតឡើង ប៉ុន្តែផែនការរបស់អ្នកអាចផ្លាស់ប្តូរ ឬមើលទៅខុសប្លែកគ្នានៅពេលដែលពេលវេលាបន្ទាប់៕