ភ្នំពេញ- បើតាមសៀវភៅអប់រំសុខភាពសិក្សា របស់ក្រសួងអប់រំ យុវជន និងកីឡា បានឱ្យនិយមន័យ ការផ្ចង់អារម្មណ៍ គឺជាសមត្ថភាពក្នុងការផ្តោតការយកចិត្តទុកដាក់ ទៅលើសកម្មភាព វត្ថុ ឬការផ្ចង់អារម្មណ៍បញ្ហាជាក់លាក់នៅក្នុងខណៈពេលមួយ។ ទន្ទឹមគ្នានេះ វិធីសាស្ត្រដើម្បីបង្កើនការផ្ចង់អារម្មណ៍ឱ្យបានល្អ រួមមាន ថែទាំសុខភាពផ្លូវកាយ និងផ្លូវចិត្តឱ្យបានល្អ ឆ្លាស់សកម្មភាពជាមួយនឹងការសម្រាកនិងកម្សាន្ត ពង្រឹងការអនុវត្តន៍និងបង្កើនសកម្មភាពភ្ជាប់ជាមួយនឹងទ្រឹស្តី ពឹងផ្អែកទៅលើមជ្ឈដ្ឋានជុំវិញ និងផ្តោតទៅលើបច្ចុប្បន្នភាព។

ខាងក្រោមនេះ ជាចំណុចមួយចំនួនជួយបង្កើនសមត្ថភាពផ្ចង់អារម្មណ៍ឱ្យបានល្អក្នុងការសិក្សា និងការងារ និងសកម្មភាពផ្សេងៗទៀតនៅក្នុងជីវភាពរស់នៅប្រចាំថ្ងៃ រួមមាន៖

១. ថែទាំសុខភាពផ្លូវកាយ និងផ្លូវចិត្តឱ្យបានល្អ ៖ ការយកចិត្តទុកដាក់ថែទាំសុខភាពផ្លូវកាយ និងផ្លូវចិត្តឱ្យបានល្អពិតជាសំខាន់ ព្រោះប្រសិនបើយើងខ្វះការយកចិត្តទុកដាក់ហើយបណ្ដោយឱ្យរាងកាយទ្រុតទ្រោម ផ្លូវចិត្តមិនល្អ នោះនឹងនាំឱ្យតុល្យភាពជីវិតមិនប្រសើរ។ ទន្ទឹមគ្នានេះ ការថែទាំសុខភាពផ្លូវកាយ និងផ្លូវចិត្តឱ្យបានល្អ អ្នកត្រូវគេងឱ្យបានគ្រប់គ្រាន់ យ៉ាងហោចណាស់ ៧ ទៅ ៨ ម៉ោងក្នុងមួយថ្ងៃ ទម្លាប់ដោះស្រាយបញ្ហាតានតឹងចិត្តដោយអនុវត្ត លំហាត់ដង្ហើម ឬសមាធិជាដើម ។

២. ឆ្លាស់សកម្មភាពជាមួយនឹងការសម្រាកនិងកម្សាន្ត ៖ ការផ្ចង់អារម្មណ៍ឱ្យបានល្អទាមទារឱ្យយើងចេះរក្សាតុល្យភាពរវាងសកម្មភាពធ្វើការងារ និងផ្ដល់ការកម្សាន្តដើម្បីឱ្យរាងកាយបានសម្រាក។ ទន្ទឹមគ្នានេះ នៅពេលរាងកាយបានសម្រាកគ្រប់គ្រាន់នឹងជួយឱ្យការផ្ចង់អារម្មណ៍បានល្អ។

៣. ពង្រឹងការអនុវត្តន៍ភ្ជាប់ជាមួយនឹងទ្រឹស្តី ៖ នៅក្នុងការសិក្សា ការងារ និងសកម្មភាពផ្សេងៗទៀតនៅក្នុងជីវភាពរស់នៅប្រចាំថ្ងៃ ដើម្បីផ្ចង់អារម្មណ៍ឱ្យបានល្អត្រូវពង្រឹងការអនុវត្តន៍ភ្ជាប់ជាមួយនឹងទ្រឹស្តី។ ឧទាហរណ៍ ប្រសិនជាសិស្សចង់ផ្ចង់អារម្មណ៍ឱ្យបានល្អក្នុងការរៀនមុខវិជ្ជាគណិតវិទ្យា ចាំបាច់ត្រូវអនុវត្តលំហាត់គណិតវិទ្យាជាប្រចាំ។

៤. ពឹងផ្អែកទៅលើមជ្ឈដ្ឋានជុំវិញ ៖ ការផ្ចង់អារម្មណ៍បានល្អត្រូវពឹងផ្អែកទៅលើមជ្ឈដ្ឋានជុំវិញ ក្នុងនោះភាពស្ងប់ស្ងាត់ ឬមិនមានភាពរំខានច្រើន និងកាត់ផ្តាច់ពីឧបករណ៍រំខានផ្សេងៗ ដូចជា ទូរស័ព្ទ ទូរទស្សន៍ ជាផ្នែកមួយជួយឱ្យផ្ចង់អារម្មណ៍បានល្អ។

៥. ផ្ដោតទៅលើបច្ចុប្បន្នភាព៖ ផ្ដោតការយកចិត្តទុកដាក់ ទៅលើសកម្មភាពដែលអ្នកកំពុងធ្វើបច្ចុប្បន្ន ដោយមិនខ្វល់ខ្វាយពីហេតុការណ៍ដែលនាំឱ្យបែកអារម្មណ៍ជំរុញឱ្យយើងការផ្ចង់អារម្មណ៍បានល្អ។ ដូច្នេះ ផ្ដោតលើអ្វីដែលកំពុងកើតឡើងនៅទីនេះ និងឥឡូវនេះ ដើម្បីជួយឱ្យការផ្ចង់អារម្មណ៍បានល្អ៕