ដំណើរកម្សាន្តផ្សងព្រេងនៅក្នុងព្រៃ ឬការដើរឡើងភ្នំត្រូវមើលឃើញថា ជាសកម្មភាពសប្បាយរីករាយ ប៉ុន្តែវាបានផ្តល់អត្ថប្រយោជន៍ជាច្រើនទៅកាន់សុខភាពផ្លូវចិត្ត និងផ្លូវកាយទាំងក្នុងរយៈពេលវែងនិងខ្លី។ ទន្ទឹមគ្នានោះអ្នកដំណើរ មានឱកាសបង្កើនភាពច្នៃប្រតិដ្ឋថ្មីៗ បង្កើតទំនាក់ទំនងក្នុងសង្គម និងពង្រឹងជំនាញនៃការផ្សងព្រេងបានមួយកម្រិតថែមទៀត។ យោងតាមគេហទំព័រ bestlifeonline បានបង្ហាញគន្លឹះមួយចំនួនអំពីការដើរឡើងភ្នំ ឬដើរព្រៃ ដូចខាងក្រោម ៖

១. កាត់បន្ថយភាពតានតឹង ៖ ដំណើរកម្សាន្តផ្សងព្រេង ឬការឡើងភ្នំ ជាវិធីសាស្រ្តមួយជំរុញឱ្យរាងកាយរឹងមាំ ប៉ុន្តែអ្នកជំនាញបានឱ្យដឹងថា សុខភាពផ្លូវចិត្ត ក៏មានភាពសំខាន់ដែរ ដូច្នេះធ្វើយ៉ាងណាឱ្យធាតុទាំងពីរនេះដើរទន្ទឹមគ្នា ។ គួរកត់សម្គាល់ថា ការជ្រើសរើសសកម្មភាពដើរនៅទីធ្លាខាងក្រៅ គឺមានប្រសិទ្ធភាពយ៉ាងអនេកក្នុងការកាត់បន្ថយជំងឺរ៉ាំរ៉ៃ ភាពតានតឹង និងការបាក់ទឹកចិត្ត។

២. រក្សាប្រព័ន្ធភាពសុំា ​៖ ប្រព័ន្ធភាពសាំ គឺជាកត្តាដ៏សំខាន់ដែលទទួលបានពីការធ្វើដំណើរទៅខាងក្រៅ ជាពិសេសការឡើងភ្នំ ។ ឡើងភ្នំ មិនមែនគ្រាន់តែកាត់បន្ថយបញ្ហាស្រ្តេសប៉ុណ្ណោះទេ ប៉ុន្តែក៏បានដើរតួនាទីយ៉ាងសំខាន់ជំរុញឱ្យប្រព័ន្ធរាងកាយមានភាពសាំផង​ដែរ ដោយសារតែបានស្រូបយកអុកស៊ីសែន និងមើលឃើញធម្មជាតិបន្ថែម។

៣. ពង្រឹងសាច់ដុំ​ ៖ ប្រសិនបើលោកអ្នកកំពុងតែមានបំណងពង្រឹងសាច់ដុំឱ្យរឹងមាំ និងផ្នែកដទៃនៃរាងកាយដែរនោះ កាលដែលឡើងភ្នំជាញឹកញយ ជាវីធីមួយជួយឱ្យគោលដៅមួយនេះងាយនឹងសម្រេចបាន។ ពីព្រោះថា ការឡើងភ្នំ មិនមែនជាសកម្មភាពដែរដើរធម្មតាៗនោះទេ គឺជាការបោះជំហានមួយដែលមានលំនាំស្រដៀងទៅនឹងការលំហាត់ប្រាណ ដោយសារដីដែលត្រូវដើរនោះមិនមានភាពស្មើគ្នា និងតម្រូវឱ្យប្រើប្រាស់សាច់ដុំចលនាបន្ថែម។

៤. បង្កើនការចងចាំនិងស្មារតីរឭកដឹង ៖ ប្រសិនបើលោកអ្នកចង់រក្សាការចងចាំ ឬស្មារតីរឭកដឹងឱ្យស្របនឹងអាយុរបស់អ្នក អ្វីដែលអ្នកអាចធ្វើនាពេលបច្ចុប្បន្នឱ្យបានទៀងទាត់គឺ ជំរុញឱ្យរាងកាយមានចលនាជាប្រចាំ ហើយការដើរព្រៃផ្សងព្រេង ឬឡើងភ្នំជាញឹកញយត្រូវបានរកឃើញថា ជំរុញការចងចាំ ​និងស្មារតីរឭកដឹង។

៥. រក្សានិងសម្រកគីឡូ ៖ ការសិក្សាមួយបានបង្ហាញថា បទពិសោធន៍មនុស្សមួយក្រុម អាចរក្សាទម្ងន់ និងសម្រកទម្ងន់បានតាមរយៈការដើរឡើងភ្នំ ឬដើរផ្សងព្រេងក្នុងព្រៃ ពីព្រោះតាមរយៈការដើរអាចដុតកាឡូរីបាន។

៦. គេងលង់លក់ល្អ ៖ អត្ថប្រយោជន៍ដ៏ពិសេសមួយទៀតគឺ ការដើរក្នុងព្រៃ ឬឡើងភ្នំក៏អាចអភិវឌ្ឍន៍ ឬពង្រឹងគុណភាពដំណេកបានដែរ។

៧. បង្កើនវិតាមីD ៖ ការដើរកម្សាន្តក៏អាចជួយឱ្យរាងកាយបង្កើនវិតាមីនD ដោយសារការអនុញ្ញាតឱ្យស្បែកប៉ះពាល់ផ្ទាល់នឹងពន្លឺ ដែលមាននូវសារធាតុវិតាមីនD តាមរយៈពន្លឺព្រះអាទិត្យ។

៨. បង្កើតទំនាក់ទំនងសង្គម ៖ ការដើរផ្សងព្រេងនាំឱ្យមនុស្សមានឱកាសជួបជុំគ្នា ថែមទាំងមានសកម្មភាពដែលបង្កបាននូវសាមគ្គីភាព បង្កើនឱកាសក្នុងការនិយាយទំនាក់ទំនងគ្នា និងមានរឿងរ៉ាវជជែកគ្នាច្រើនជាងមុន។ ហើយការបង្កើតទំនាក់ទំនង វាសំខាន់សម្រាប់គ្រួសារ មិត្តភ័ក្ដ្រ អ្នកធ្វើការរួមអាជីព និងសមាជិកក្នុងសហគមន៍ផងដែរ។ នៅពេលមនុស្សកាន់តែចេញទៅក្រៅ ហើយមានទំនាក់ទំនងសង្គមកាន់តែច្រើន នោះនឹងជំរុញបាននូវការគាំទ្រ ការជួយគ្នា និងទំនាក់ទំនងរឹងមាំមួយកម្រិតទៀត ហើយជំរុញបាននូវលទ្ធផលវិជ្ជមានទាំងសុខភាពផ្លូវកាយនិងចិត្តកាន់តែប្រសើរជាងមុន៕