ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយពេលឆ្លុះបញ្ចាំងលទ្ធផលឆ្នាំចាស់ និងចាប់ផ្តើមអនុវត្តន៍ផែនការឆ្នាំថ្មីៗ មានយុវជនមួយចំនួនហាក់ស្តាយក្រោយចំពោះពេលវេលាដែលកន្លងទៅ ឬសោកស្តាយទៅនឹងលទ្ធផលដែលមិនដូចការគ្រោងទុក ។ បើតាមគេហទំព័រ PsychologyToday បានឱ្យដឹងថា ការរស់នៅក្នុងស្ថានភាពខ្លួនឯង ការបំពេញភារកិច្ចដែលផ្តល់គុណតម្លៃទៅកាន់ជីវិត ហ៊ានបង្ហាញពីចំណាប់អារម្មណ៍ ជាកត្តាកាត់បន្ថយនូវភាពស្ដាយក្រោយក្នុងដំណើរជីវិត ។ ខាងក្រោមនេះ គឺជាគន្លឹះ៤ចំណុចដើម្បីជួយឱ្យចិត្តស្ងប់ មិនមានការសោកស្តាយនៅក្នុងជីវិតរស់នៅ៖
១.រស់ក្នុងស្ថានភាពខ្លួនឯង ៖ ចំណុចនេះគឺលើកទឹកចិត្តឱ្យយើងរស់តាមបែបស្ថានភាពជីវិតដែលខ្លួនបានដាក់ក្ដីរំពឹង ចង់ឃើញខ្លួនឯងក្លាយទៅជាអ្វីមួយនៅថ្ងៃអនាគតតាមរយៈឧត្តមគតិផ្ទាល់ខ្លួន ដោយមិនមែនជាការរស់នៅដើម្បីចង់ឱ្យអ្នកដទៃសរសើរតែមួយមុខនោះទេ។ ជារួមជ្រើសយកកិច្ចការដែលស្របជាមួយឧបនិស្ស័យ ឬសមត្ថភាព និងតម្រូវការ ជៀសវាងការធ្វើតាមលំអានផ្លូវនៃការរំពឹងពីអ្នកដទៃ ឬមជ្ឈដ្ឋានណាមួយ។ មានសំណួរខ្លះៗដែលអាចប្រើសម្រាប់ការវិភាគ ដើម្បីឱ្យប្រាកដថា តើអ្នកពិតជាបានរស់ក្នុងខ្សែរបន្ទាត់របស់ខ្លួនឯង ឬរបស់អ្នកដទៃ? ឧទារហណ៍ តើអ្នកកំពុងរៀនជំនាញដែលសង្គមផ្តល់តម្លៃ ប៉ុន្តែមិនឆ្លើយតបទៅនឹងទេពកោសល្យ ឬបំណងប្រាថ្នាដែលខ្លួនចង់បានដែរ ឬទេ? បើសិនជាមានភាគរយច្រើននោះគឺមានន័យថា អ្នកមិនបានរស់ក្នុងស្ថានភាពខ្លួនឯងក្នុងភាគរយច្រើនឡើយ។
២.បំពេញកិច្ចការឆ្លើយតបនឹងគុណតម្លៃជីវិត ៖ ជាទូទៅមនុស្សចំណាយពេល ៩ម៉ឺនម៉ោង ដើម្បីចាយទៅក្នុងឆាកជីវិតការងាររបស់ពួកគេ ដោយបើគិតទៅ គឺវាច្រើនសមល្មមដែរ ដូច្នេះតើកែច្នៃពេលដែលចំណាយទាំងនោះដោយប្រសិទ្ធភាព និងភាពល្អប្រសើរបានយ៉ាងដូចម្តេចខ្លះ? ដូច្នេះជាដំបូង គួរដាក់សំណួរចំពោះខ្លួនឯងសិនថា តើអ្នកជាមនុស្សដែលធ្វើការលើសលប់មែនទេ? ឬក៏អ្នកស្ថិតក្នុងក្រុមមនុស្សដែលធ្វើការដើម្បីជាស្ពានឈានទៅរកនិយមន័យ នៃជីវិត ដែលអ្នកចង់បាន?
ការសិក្សាមួយបានរកឃើញថា អ្នកដែលស្រឡាញ់ការងារ ឬកំពុងបំពេញភារកិច្ចឆ្លើយតប នឹងគុណតម្លៃជីវិតរបស់ពួកគេ គឺមានចំណុចសម្គាល់មួយចំនួនដូចជា ១.មានភាពពាក់ព័ន្ធ៖ ពួកគេមើលឃើញថា អ្វីដែលកំពុងធ្វើនៅពេលនេះ បានភ្ជាប់នឹងអ្វីដែលពួកគេចង់បាននៅពេលក្រោយ, ២.ស្វ័យភាព៖ ការត្រួសត្រាយបង្កើតភាពច្បាស់លាស់ចំពោះខ្លួនឯងដែលជំរុញឱ្យមានភាពងាយស្រួលក្នុងការអនុវត្តន៍នូវគំនិតថ្មីៗ, ៣.ជំនាញ៖ ពួកគេរំពឹងថា អ្វីដែលកំពុងធ្វើ អាចអភិវឌ្ឍន៍ខ្លួនឯង និងផ្តល់នូវជំនាញមួយដែលអាចប្រើការបាន និង ៤.មានគោលបំណង ៖ ពួកគេយល់ថា អ្វីដែលកំពុងបំពេញ អាចផ្តល់នូវមរតកមួយដ៏ល្អទៅកាន់ឯកជនភាពជីវិតរបស់ពួកគេ។
សម្រាប់ក្រុមមនុស្ស ដែលតែងតែនិយាយអំពីភាពស្តាយក្រោយ ពីមួយជំនាន់ទៅមួយជំនាន់ អាចនឹងពុំបានយកចិត្តទុកដាក់នៅចំណុចខាងលើនោះទេ មានន័យថា ធ្វើភារកិច្ចមិនឆ្លើយតបទៅនឹងអ្វីដែលជាគុណតម្លៃជីវិតដែលពួកគេចង់បាន។ ជាដំណោះស្រាយទៅនឹងបញ្ហានេះ គឺសរសេរបញ្ចូលទៅក្នុងឆ្នាំបន្ទាប់ ឬថ្ងៃបន្ទាប់ រាល់កិច្ចការណា ដែលមិននាំឱ្យស្តាយក្រោយ ឬផ្តល់នូវភាពរីកចម្រើន។
៣.រក្សាមិត្តភាព ៖ ការរក្សាទំនាក់ទំនងជាមួយនឹងមិត្ត ឬការភ្ជាប់ទំនាក់ទំនងទៅក្នុងសង្គមខាងក្រៅជំរុញឱ្យអាយុរស់នៅមានរយៈពេលវែង និងមានសុខុមាលភាពល្អជាងមុន។
៤.បង្កើតសុភមង្គល ៖ ពេលខ្លះអ្នកប្រហែលជាយល់ថា សុភមង្គលនឹងកើតឡើងនៅថ្ងៃអនាគត ប៉ុន្តែជាក់ស្ដែងភាពរីករាយ និងសុភមង្គលពិតប្រាកដគឺនៅពេលបច្ចុប្បន្ននេះតែម្តង។ ដូច្នេះទៅទីកន្លែងដែលផ្តល់ជូននូវសុភមង្គល និងបរិយាកាសថ្មីៗ ដើម្បីទទួយបានបទពិសោធន៍បន្ថែម ឬធ្វើសកម្មភាពផ្សេងៗទៀត ដែលជំរុញការវិវឌ្ឍន៍ និងការលូតលាស់ដែលមានដូចជា ធ្វើលំហាត់ប្រាណ បរិភោគអាហារមានសារធាតុចិញ្ចឹម រក្សាតុល្យភាពទម្ងន់ សន្សំលុយ ចំណាយពេលបន្ថែមជាមួយគ្រួសារ កាត់បន្ថយការលេងបណ្តាញសង្គម កាត់បន្ថយការចំណាយមិនចាំបាច់ រួមទាំងសកម្មភាពទាំងឡាយណាដែលធ្វើហើយផ្តល់ផលវិជ្ជមានទៅកាន់ដំណើរនៃការស់នៅ៕
