ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្រាវជ្រាវជាច្រើនបានបង្ហាញថា ដើម្បីឱ្យរាងកាយមានថាមពលពេញលេញ អ្នកត្រូវតែគេងឱ្យបានគ្រប់គ្រាន់ ចន្លោះពី ៦ ទៅ ៨ ម៉ោងក្នុងមួយថ្ងៃ។ ប៉ុន្តែជាមួយគ្នានេះ អាហារក៏ដើរតួនាទីសំខាន់ ក្នុងការបង្កើនថាមពលរាងកាយរបស់អ្នកដែរ ។
យោងតាម CNBC បានបង្ហាញថា មានអាហារ ៤ ប្រភេទ ដែលអ្នកជំនាញផ្នែកអាហារូបត្ថម្ភ បានណែនាំឱ្យទទួលទាន ដើម្បីបង្កើនថាមពល។
១. កុំផ្លិចកាបូអ៊ីដ្រាត (Complex carbohydrate) ៖ កាបូអ៊ីដ្រាតសាមញ្ញ គឺជាប្រភេទអាហារ ដែលបំបែកភ្លាមៗទៅជាជាតិស្ករ ហើយនាំជាតិស្ករដែលបំបែករួចទៅក្នុងឈាមភ្លាមៗ។ ផ្ទុយមកវិញ កុំផ្លិចកាបូអ៊ីដ្រាត ជាប្រភេទអាហារ ដែលរំលាយយឺត និងបំបែកទៅជាជាតិស្ករក្នុងល្បឿនយឺត។ ការទទួលទានអាហារកុំផ្លិចកាបូអ៊ីដ្រាតនៅពេលព្រឹក នឹងធ្វើឱ្យអ្នកមានអារម្មណ៍ថា មានថាមពលពេញមួយថ្ងៃ។ អាហាទាំងនោះ មានដូចជា នំបុ័ងស្រូវសាលី ដំឡូង គ្រាប់ល្ពៅ ផ្លែប៉ោម និងសណ្ដែកសៀងជាដើម។
២. អាហារសម្បូរជាតិសរសៃ ៖ យើងទាំងអស់គ្នា សុទ្ធតែអាចបន្ថែមអាហារ ដែលមានជាតិសរសៃទៅក្នុងរបបអាហារប្រចាំថ្ងៃរបស់យើង ខណៈការញ៉ាំអាហារ ដែលមានជាតិសរសៃ គឺជាប្រភព នៃការបង្កើនថាមពលដ៏សំខាន់សម្រាប់រាងកាយ ។ អាហារសម្បូរជាតិសរសៃ ដែលអ្នកជំនាញអាហារូបត្ថម្ភណែនាំ មានដូចជា ផ្លែប៊ឺរី បន្លែបៃតង ចេក និងល្ហុងជាដើម។
៣. ខ្លាញ់ល្អសម្រាប់សុខភាពបេះដូង ៖ ក្រុមអាហារ ដែលអ្នកជំនាញលើកឡើងថា អាចបម្រើជាសារធាតុជំរុញថាមពល គឺខ្លាញ់ល្អសម្រាប់សុខភាពបេះដូង។ អាហារដែលផ្ទុកនូវអាស៊ីតខ្លាញ់ Omega – 3 ខ្ពស់ អាចជួយពង្រឹងសុខភាពខួរក្បាល កាត់បន្ថយកម្រិតនៃជំងឺបាក់ទឹកចិត្ត កាត់បន្ថយការកើនឡើងសម្ពាធឈាម និងបញ្ហារលាក (inflammation)។ ខ្លាញ់ល្អសម្រាប់សុខភាពបេះដូង ដែលអ្នកអាចពិចារណាបរិភោគ មានដូចជា ផ្លែប៊ឺរ តៅហ៊ូ អូលីវ សូកូឡាខ្មៅ និងត្រីសាម៉ុន។
៤. ទឹក ៖ ទឹកជារឿយៗត្រូវបានមនុស្សភាគច្រើនមើលរំលង ប៉ុន្តែវាក៏ជាប្រភេទអាហារ ដែលជួយបង្កើនថាមពលរាងកាយដែរ។ ភាពខ្សោះជាតិទឹកអាចប៉ះពាល់ដល់ផ្នែកជាច្រើននៃរាងកាយរបស់អ្នក និងធ្វើឱ្យអ្នកឆាប់ងងុយគេង។ ម្យ៉ាងទៀត ការទទួលទានទឹកគ្រប់គ្រាន់ពេញមួយថ្ងៃ អាចជួយរក្សាកម្រិតថាមពលក្នុងរាងកាយអ្នកបានល្អ ព្រោះទឹកបានចូលរួមចំណែករក្សាសាច់ដុំរបស់អ្នកឱ្យស្វាហាប់៕
