ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីពេលថ្មីៗនេះ ក្រសួងអប់រំ យុវជន និងកីឡា បានដាក់ឱ្យសាកល្បង នូវកម្មវិធីក្រៅម៉ោងសិក្សា នៅតាមគ្រឹះស្ថានសិក្សាសាធារណៈគំរូ ទាំងបឋមសិក្សា និងមធ្យមសិក្សា ដោយបន្ថែមម៉ោងសិក្សាយ៉ាងហោចណាស់ ២ម៉ោងបន្ថែមទៀត លើម៉ោងសិក្សាបច្ចុប្បន្ន ។ តើម៉ោងបន្ថែមនេះ សិស្សានុសិស្សនឹងត្រូវរៀនអ្វីខ្លះ?
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កម្មវិធីក្រៅម៉ោងសិក្សា ត្រូវបានកំពុងអនុវត្តនៅក្នុងកម្រិតបឋមសិក្សា និងមធ្យមសិក្សា ដែលត្រូវទទួលស្គាល់ថា ជាសាលារៀនគំរូ ដោយសរុបមានចំនួន ១២០សាលា។ លោកជំទាវបន្តថា ក្នុងការអនុវត្តកម្មវិធីបន្ថែមម៉ោង គឺគាំទ្រទៅលើការរៀន និងបង្រៀនទៅលើមុខវិជ្ជានានា ដែលសិស្សនឹងត្រូវការការបំប៉នបន្ថែម ហើយលើសពីនោះ ក៏មានការបញ្ចូលបន្ថែមនូវតម្រូវការ និងបំណិនផ្សេងៗ ដូចជាកម្មវិធីបំណិនមូលដ្ឋាន កម្មវិធីប្រឹក្សាអាជីព កម្មវិធីអភិវឌ្ឍយុវជន ក៏ដូចជាកម្មវិធីអប់រំចរិយាធម៌ និងការរៀបចំព្រឹត្តិការណ៍វិទ្យាសាស្រ្ត និងស្នាដៃសិស្សជាដើម។
បើយោងតាមសេចក្តីណែនាំរបស់ក្រសួងអប់រំ យុវជន និងកីឡា សកម្មភាពក្រៅម៉ោងសិក្សា ត្រូវរៀបចំឱ្យស្របទៅតាមតម្រូវការរបស់សាលារៀនក្នុងការអនុវត្តកម្មវិធីសិក្សាឱ្យបានពេញលេញ និងដើម្បីពង្រឹងចំណេះដឹង វិន័យ សីលធម៌ ចរិយាធម៌ និងឥរិយាបទ របស់សិស្ស ព្រមទាំងការតម្រង់ទិសវិជ្ជាជីវៈ ដោយអនុវត្តការផ្តល់ពិន្ទុ ៨០% លើចំណេះដឹង ១០%លើបំណិន និង ១០%លើសីលធម៌ និងចរិយាធម៌។
សម្រាប់គ្រឹះស្ថានបឋមសិក្សា កម្មវិធីក្រៅម៉ោងសិក្សាមានដូចជា ៖ (១) ការពង្រឹងចំណេះដឹងលើមុខវិជ្ជាគោល គឺភាសាខ្មែរ និងគណិតវិទ្យា ដែលរួមមាន អំណានក្នុងបណ្ណាល័យ ការសរសេរតាមអាន តែងសេចក្តី លំហាត់គណិតវិទ្យា ចំណោទ និងការគិតលេខរហ័ស, (២) កម្មវិធីអភិវឌ្ឍបំណិនមូលដ្ឋាន រួមមាន ការងារស្ម័គ្រចិត្ត និងជួយសហគមន៍ ការយល់ដឹងពីបញ្ហាបរិស្ថាន និងប្រែប្រួលអាកាសធាតុ ការចូលរួមក្នុងយុទ្ធនាការ «សាលារៀនស្អាតគ្មានសំរាម» ការបង្រៀនភាសាបរទេស កុំព្យូទ័រ បំណិនជីវិតមូលដ្ឋាន កម្មវិធីស្វ័យសិក្សា និងការសិក្សាស្រាវជ្រាវ, (៣) កម្មវិធីអប់រំចរិយាធម៌ ដែលមាន ការអប់រំសីលធម៌ សុភាវធម៌ ចរិយាធម៌ (ស្អាត សុភាព របៀប ទៀងពេល និងសមាធិ) និងការអប់រំតាមបែបសាសនា។
សម្រាប់គ្រឹះស្ថានមធ្យមសិក្សាចំណេះទូទៅសាធារណៈ កម្មវិធីក្រៅម៉ោងសិក្សាមាន ៖ (១) កម្មវិធីអភិវឌ្ឍបំណិនមូលដ្ឋាន មានដូចជាការងារស្ម័គ្រចិត្ត និងជួយសហគមន៍ ការយល់ដឹងពីបញ្ហាបរិស្ថាននិងប្រែប្រួលអាកាសធាតុ ការចូលរួមយុទ្ធនាការ «សាលារៀន ស្អាតគ្មានសំរាម» ការបង្រៀនភាសាបរទេស កុំព្យូទ័រ និងបំណិនជីវិតតាមមូលដ្ឋាន កម្មវិធីស្វ័យសិក្សា ការសិក្សាតាមបែបគម្រោង និងការសិក្សាស្រាវជ្រាវ នៅក្នុងបណ្ណាល័យ, (២) កម្មវិធីប្រឹក្សាអាជីព ៖ ការតម្រង់ទិសការសិក្សា និងជំនាញវិជ្ជាជីវៈ ដល់សិស្សទាំងផ្នែកអប់រំចំណេះទូទៅ និងអប់រំបច្ចេកទេស ការជួយផ្តល់ប្រឹក្សាយោបល់ដល់សិស្សទូទៅ ក្រីក្រ និងក្រុមសិស្សងាយរងគ្រោះដែលប្រឈមនឹងការបោះបង់ការសិក្សា និងការរៀបចំសកម្មភាពភាពជាដៃគូរវាងសាលារៀន និងសហគមន៍មូលដ្ឋានដែលមានការសហការជាមួយគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ (TVET) និងក្រុមហ៊ុនឯកជន, (៣) កម្មវិធីអភិវឌ្ឍយុវជន ដូចជា កម្មវិធីក្លឹបកាយរិទ្ធិល្អ កម្មវិធីមិត្តអប់រំមិត្ត ការប្រកួតប្រជែងវោហាស័ព្ទ និងអភិវឌ្ឍបំណិនសតវត្សទី២១ ការប្រកួតប្រជែងនិយាយជាសាធារណៈ កម្មវិធីកីឡា និងអប់រំសិល្បៈ កម្មវិធីបោះជំរំ អ្នកនាំសារសន្តិភាព និងស្មារដៃកាយរិទ្ធិល្អ កម្មវិធីសន្សំប្រាក់សម្រាប់បន្តការសិក្សានៅឧត្តមសិក្សា កម្មវិធីបំណិនកសិកម្ម និងបច្ចេកទេសដើម្បីរកចំណូល និងកម្មវិធីសប្បុរសធម៌ជាដើម, (៤) កម្មវិធីអប់រំចរិយាធម៌ ដូចជា ការអប់រំសីលធម៌ សុភាវធម៌ ចរិយាធម៌ និងការអប់រំតាមបែបសាសនា និង (៥) ការរៀបចំព្រឹត្តិការណ៍ ពិព័រណ៌វិទ្យាសាស្រ្ត និងស្នាដៃសិស្ស៕
