ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមទិន្នន័យគ្រោះថ្នាក់ចរាចរណ៍ផ្លូវគោក ដែលចេញផ្សាយដោយនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ អំឡុងនៃពិធីបុណ្យចូលឆ្នាំថ្មីប្រពៃណីជាតិខ្មែរ ដោយគិតចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៥ គ្រោះថ្នាក់ចរាចរណ៍បានកើតឡើងសរុបចំនួន៤៤លើក ដោយបណ្ដាលឱ្យមានមនុស្សស្លាប់ និងរបួសសរុបជាង១០០នាក់ ក្នុងនោះមូលហេតុដែលបណ្ដាលឱ្យកើតមានគ្រោះថ្នាក់ចរាចរណ៍ច្រើនជាងគេ គឺល្មើសល្បឿនកំណត់។
របាយការណ៍ប្រចាំថ្ងៃរបស់នាយករដ្ឋានចរាចរណ៍បានបញ្ជាក់ថា នៅថ្ងៃទី១២ ខែមេសា ដែលជាថ្ងៃប្រជាពលរដ្ឋភាគច្រើនត្រឡប់ទៅស្រុកកំណើត គ្រោះថ្នាក់ចរាចរណ៍បានកើតឡើងចំនួន៦ករណី ដោយបណ្ដាលឱ្យមនុស្សស្លាប់ចំនួន៥នាក់ របួស៨នាក់ ក្នុងនោះល្មើសល្បឿនចំនួន៣ករណី បណ្ដាលឱ្យស្លាប់មនុស្ស៤នាក់ មិនប្រកាន់ស្តាំបណ្ដាលឱ្យស្លាប់មនុស្សម្នាក់។
នៅថ្ងៃទី១៣ ខែមេសា គ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន ៨ករណី បណ្ដាលឱ្យស្លាប់មនុស្ស៥នាក់ និងរបួសធ្ងន់ស្រាលចំនួន១១នាក់ ក្នុងនោះល្មើសល្បឿនកើតឡើងចំនួន៦ករណី បណ្ដាលឱ្យស្លាប់មនុស្ស៤នាក់ របួស៨នាក់ និងមិនគោរពសិទ្ធិចំនួន២ករណី បណ្ដាលឱ្យស្លាប់មនុស្សម្នាក់។
នៅថ្ងៃទី១៤ ខែមេសា ដែលជាថ្ងៃចូលឆ្នាំថ្ងៃទី១ គ្រោះថ្នាក់ចរាចរណ៍បានកើតឡើងចំនួន ៧លើក បណ្ដាលឱ្យស្លាប់មនុស្ស៥នាក់ និងរបួសធ្ងន់ស្រាលចំនួន១០នាក់ ក្នុងនោះល្មើសល្បឿនមានចំនួន២ករណី បណ្ដាលឱ្យមនុស្សស្លាប់ម្នាក់, មិនគោរពសិទ្ធិ ១ករណី បណ្ដាលឱ្យស្លាប់មនុស្សម្នាក់, មិនប្រកាន់ស្តាំ២ករណី បណ្ដាលឱ្យស្លាប់ម្នាក់, ស្រវឹង ១ករណី បណ្ដាលឱ្យស្លាប់ម្នាក់ និងកត្តាយានយន្ត១ករណី បណ្តាលឱ្យស្លាប់ម្នាក់។
ដោយឡែកនៅថ្ងៃទី១៥ ខែមេសា ដែលជាថ្ងៃចូលឆ្នាំថ្ងៃទី២ គ្រោះថ្នាក់ចរាចរណ៍នៅទូទាំងប្រទេស បានកើតឡើងសរុបចំនួន ១៣ករណី ដោយបណ្ដាលឱ្យស្លាប់មនុស្សចំនួន៩នាក់ របួសធ្ងន់ស្រាលចំនួន២០នាក់ ក្នុងនោះល្មើសល្បឿនកើតមានចំនួន៥ករណី បណ្ដាលឱ្យស្លាប់មនុស្ស៥នាក់, មិនគោរពសិទ្ធិ៥ករណី បណ្ដាលឱ្យស្លាប់មនុស្សម្នាក់, មិនប្រកាន់ស្តាំចំនួន២ករណី បណ្ដាលឱ្យស្លាប់មនុស្សម្នាក់, ស្រវឹង២ករណី បណ្ដាលឱ្យស្លាប់មនុស្សម្នាក់។
សម្រាប់ថ្ងៃទី១៦ ខែមេសា ដែលជាថ្ងៃចុងក្រោយនៃពិធីបុណ្យចូលឆ្នាំ គ្រោះថ្នាក់ចរាចរណ៍បានកើតឡើងចំនួន ១០ករណី ដោយបណ្ដាលឱ្យស្លាប់មនុស្សសរុបចំនួន១២នាក់ និងរបួសធ្ងន់ស្រាលចំនួន១៧នាក់។ នៅថ្ងៃចុងក្រោយនេះ ករណីល្មើសល្បឿនមានចំនួន ៦ករណី ដោយបណ្ដាលឱ្យស្លាប់មនុស្ស៨នាក់, មិនប្រកាន់ស្តាំ២ករណី បណ្ដាលឱ្យស្លាប់មនុស្ស៣នាក់ និងប្រជែង១ករណី បណ្ដាលឱ្យស្លាប់មនុស្សម្នាក់។
ទោះជាយ៉ាងណាក៏ដោយ បើធ្វើការប្រៀបធៀបទៅនឹងរបាយការណ៍គ្រោះថ្នាក់ចរាចរណ៍កាលពីឆ្នាំទៅ នៅឆ្នាំនេះ ករណីគ្រោះថ្នាក់ចរាចរណ៍ហាក់មានការថយចុះ។ នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរកាលពីឆ្នាំ២០២៤ រយៈពេល៤ថ្ងៃ ករណីគ្រោះថ្នាក់ចរាចរណ៍នៅទូទាំងប្រទេសបានកើតឡើងសរុបចំនួន ៥០លើក ដោយបណ្ដាលឱ្យមនុស្សស្លាប់ចំនួន ៣៩នាក់ និងរបួសធ្ងន់ស្រាលចំនួន ៩៦នាក់៕
