ក្រោយឆ្លងកាត់ការប្រកួតប្រជែងស្នាដៃយុវជនសតវត្សរ៍ទី២១ ទាំង២៥ រាជធានី ខេត្ត លើការតាំងពិពណ៌បង្ហាញគម្រោង និងការធ្វើបទបង្ហាញ រយៈពេល៣ថ្ងៃ ក្រសួងអប់រំ យុវជន និងកីឡា បានរកឃើញបេក្ខជន៣ក្រុមជាប់ជ័យលាភីប្រកួតប្រជែងស្នាដៃយុវជនសតវត្សរ៍ទី២១ ក្រោមប្រធានបទ “STEM និងការផលិតអាហារ” កាលពីថ្ងៃទី២ ធ្នូ ឆ្នាំ២០២៣កន្លងទៅនៅមជ្ឈមណ្ឌលជាតិយុវជន ខេត្តសៀមរាប។

បេក្ខជន៣ក្រុម មកពីខេត្តផ្សេងគ្នាបានជាប់ជ័យលាភីលើគម្រោងរបស់ខ្លួន រួមមាន ជ័យលាភីលេខ១ បានទៅលើខេត្តកែប គម្រោង «ព្រះក្រុងទ្រង់គ្រឿង», ជ័យលាភីលេខ២ បានទៅលើខេត្តព្រះវិហារ គម្រោង «Magical Oil» និងជ័យលាភីលេខ៣ បានទៅលើខេត្តកណ្តាល គម្រោង «Multea-Automatic-Drye»។

ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា កម្មវិធីប្រកួតប្រជែងស្នាដៃយុវជនសតវត្សរ៍ទី២១ ជាវេទិកាមួយដ៏មានសារៈសំខាន់សម្រាប់យុវជនក្នុងការទទួលយកនូវបច្ចេកវិទ្យាថ្មីៗ និងជាសរសៃឈាមនៅក្នុងការអភិវឌ្ឍសេដ្ឋកិច្ចសង្គមជាតិ ដើម្បីធ្វើការអនុវត្តជាក់ស្តែងលើទ្រឹស្តីដែលបានសិក្សារៀនសូត្រនៅសាលារៀន ពាក់ព័ន្ធនឹងមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។

យុវជនសតវត្សទី២១ ត្រូវតែយកចិត្តទុកដាក់ និងសិក្សារៀនសូត្រឱ្យបានស៊ីជម្រៅ ដើម្បីបំពេញនូវសក្តានុពល និងរក្សាបាននូវភាពប្រកួត ប្រជែងទាំងក្នុងកម្រិតតំបន់ និងអន្តរជាតិ ជាពិសេស ប្រែក្លាយខ្លួនជាមូលធនមនុស្សប្រកប ដោយថាមពល និងមានសម្បទាចំនួន ៤ គឺ វិជ្ជាសម្បទា បំណិនសប្បទា ចរិយាសម្បទា និង កាយសម្បទា»។

ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា

ឯកឧត្តមបណ្ឌិត ស៊ាន បូរ៉ាត បញ្ជាក់បន្ថែមថា បច្ចុប្បន្ន បច្ចេកវិទ្យាឌីជីថលកំពុងបោះជំហានយ៉ាងលឿន ហើយបានក្លាយជាកាតាលីករជំរុញកំណើនសេដ្ឋកិច្ច។ ទោះស្ថិតក្នុងកាលៈទេសៈណាក៏បច្ចេកវិទ្យាឌីជីថលអាចមានសក្តានុពលខ្ពស់ និងទូលំទូលាយ ផ្តល់លទ្ធភាពឱ្យប្រទេសមួយអាចមានសេដ្ឋកិច្ចលូតលាស់ ឬអភិវឌ្ឍន៍បានយ៉ាងឆាប់រហ័ស និងប្រែក្លាយពីប្រទេសពឹងផ្អែកលើឧស្សាហកម្មប្រពៃណីឱ្យទៅជាឧស្សាហកម្មទំនើបក្នុងរយៈពេលដ៏ខ្លីបាន។ ដូច្នេះយើងត្រូវយកចិត្តទុកដាក់តាមដាន និងចូលរួមយ៉ាងសកម្មនៅក្នុងកម្មវិធីនានារបស់អនុវិស័យការអភិវឌ្ឍយុវជន អភិវឌ្ឍខ្លួនក្លាយជាមូលធនមនុស្សប្រកបដោយថាមពល។

គួរជម្រាបជូនថា កម្មវិធីប្រកួតប្រជែងស្នាដៃយុវជនសតវត្សរ៍ទី២១ រៀបចំឡើងក្នុងគោលបំណង ជំរុញឱ្យសិស្សានុសិស្ស លោកគ្រូ-អ្នកគ្រូ ឱ្យបង្កើនការយកចិត្តទុកដាក់កាន់តែខ្លាំងលើការសិក្សា និងស្រាវជ្រាវមុខជំនាញទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។ ម្យ៉ាងទៀត ត្រូវមានការលើកទឹកចិត្តដល់យុវជនឱ្យមានគំនិតផ្ដួចផ្ដើមបង្កើតថ្មី និងច្នៃប្រឌិត និងផ្ដល់ឱកាសឱ្យយុវជនបានចែករំលែកបទពិសោធន៍ និងបង្ហាញស្នាដៃរបស់ខ្លួនទៅដល់យុវជនដទៃទៀត៕