ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ជាក្តីស្រមៃ និងជាមហិច្ឆតា ក្រសួងការងារ នឹងបើកទីផ្សារការងារអាជីពកម្រិតខ្ពស់សម្រាប់និស្សិតកម្ពុជាដែលរៀនចប់ ឬសម្រាប់យុវជនដែលមានស្នាដៃ អាចទៅប្រកួតប្រជែងដើម្បីយកតួនាទីនៅក្នុងស្ថាប័ន ឬក្រុមហ៊ុននៃប្រទេសនៅក្នុងតំបន់។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ក្តីស្រមៃរបស់ក្មួយៗយុវជន មិនប្រាកដថា គ្រប់គ្នាចង់ធ្វើការតែនៅក្នុងប្រទេសកម្ពុជាមួយនោះទេ, ឯកឧត្តមបន្តថា ឱកាសការងារ ជនបរទេសក៏ចង់មកយើង ហើយយើងក៏ប្រហែលជាត្រូវមានមហិច្ឆតាមួយ គឺ ត្រូវតែពង្រីកខ្លួនដើម្បីប្រកួតយកតួនាទីមួយចំនួននៅក្នុងតំបន់ដែរ។
ដូចដែលយើងធ្លាប់ឃើញគេមកនៅស្រុកយើង គេមកធ្វើការនៅស្រុកយើង គេកាន់តួនាទីធំនៅស្រុកយើង យើងសរសើរស្រុកគេ ឥឡូវនេះក្មួយៗមានសមត្ថភាព មានឱកាសដូចគ្នា ដើម្បីទៅចាប់យកការងារនៅទីនោះ…
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ
បើតាមប្រសាសន៍របស់ ឯកឧត្តមរដ្ឋមន្រ្តីក្រសួងការងារ បច្ចុប្បន្ន ទីភ្នាក់ងារជាតិមុខរបរ និងការងារ មានឱកាសការងារការងារទាំងនៅក្នុងស្រុក ទាំងឱកាសការងារនៅក្រៅស្រុក ហើយអ្វីដែលជាចក្ខុវិស័យថ្មីរបស់ក្រសួងការងារ គឺ មិនពង្រីកទីផ្សារការងារនៅក្រៅប្រទេស តែទៅលើផ្នែកផលិតកម្ម ទៅលើផ្នែកដែលមានជំនាញទាបនោះទេ ជាមហិច្ឆតា គឺបើកទីផ្សារការងារកម្រិតខ្ពស់សម្រាប់និស្សិតកម្ពុជាដែលរៀនចប់ ឬសម្រាប់យុវជនកម្ពុជាដែលមានស្នាដៃ អាចទៅប្រកួតប្រជែងដើម្បីយកតួនាទីនៅក្នុងស្ថាប័ន ឬជាមួយយុវជនជាច្រើនទៀតនៅក្នុងតំបន់ តាមរយៈការភ្ជាប់ខ្លួនជាមួយយុវជនទាំងអស់នោះ ដែលនេះ ក៏ជាឱកាសដើម្បីទាញអ្នកវិនិយោគ មកវិនិយោគនៅកម្ពុជា ដោយបង្កើតឱកាសការងារជូនបងប្អូនប្រជាពលរដ្ឋយើងបន្ថែមទៀតដែរ។
បើយោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ កាលពីឆ្នាំ២០២៣កន្លងទៅនេះ ក្រសួងបានជួយស្វែងរកការងារនៅក្រៅប្រទេសជូនប្រជាពលរដ្ឋកម្ពុជា សរុបចំនួន ៦០ ៤៦៧នាក់ (ស្រី ២៥ ២២៦នាក់) ។ ដោយឡែកបើគិតមកត្រឹមឆ្នាំ២០២៣វិញ ប្រជាពលរដ្ឋកម្ពុជាកំពុងស្នាក់នៅ និងធ្វើការនៅក្រៅប្រទេសមានចំនួន ១ ៣៥៦ ៦១៦នាក់ (ស្រី ៥៥២ ៨៥១នាក់) ក្នុងនោះ ថៃ ចំនួន ១ ២៦២ ១៧៥នាក់, កូរ៉េ ចំនួន ៥០ ៩៧០នាក់, ម៉ាឡេស៊ី ចំនួន ២២ ២៦២នាក់, ជប៉ុន ចំនួន ២០ ០៥៦នាក់, សិង្ហបុរី ចំនួន ៨៧១នាក់, ហុងកុង ចំនួន ២១៨នាក់ និងអារ៉ាប់ប៊ីសាអូឌីត ចំនួន ៦៤នាក់៕
