ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ បានមានប្រសាសន៍ថា ក្រសួងការងារ និងក្រសួងអប់រំ យុវជន និងកីឡា បាននិងកំពុងសហការគ្នាជំរុញការអនុវត្តការអភិវឌ្ឍជំនាញ, ការអប់រំបណ្តុះបណ្តាលបច្ចេកទេស និងវិជ្ជាជីវៈនិងការតម្រង់ទិសវិជ្ជាជីវៈនៅគ្រប់កម្រិតភូមិសិក្សា។
ឯកឧត្តមរដ្ឋមន្រ្តីមានប្រសាសន៍ថា វិស័យទាំងពីរ ដើរតួនាទីបំពេញបន្ថែមគ្នាយ៉ាងសំខាន់ក្នុងការផ្តល់ជម្រើស និងឱកាស សម្រាប់សិស្ស ក៏ដូចជាយុវជន ក្នុងការសម្រេចចិត្តបន្តទៅប្រភេទសិក្សាណាមួយ (ការអប់រំ ឬការអប់រំបណ្តុះបណ្តាលបច្ចេកទេស និងវិជ្ជាជីវៈ) អាស្រ័យទៅតាមសមត្ថភាព លទ្ធភាព និងតម្រូវការជាក់ស្តែងរបស់ខ្លួន។
រដ្ឋមន្រ្តីក្រសួងការងារបញ្ជាក់ថា បេសកម្មស្នូលរបស់ស្ថាប័នទាំងពីរ គឺជាការរួមគ្នាសម្រេចឱ្យបាននូវអាទិភាពគន្លឹះទី១ “មនុស្ស” និងបញ្ចកោណទី១ “ការអភិវឌ្ឍមូលធនមនុស្ស” ដែលធ្វើឱ្យធនធានមនុស្សនៅកម្ពុជា ក្លាយជាកម្លាំងពលកម្មសកម្មគ្រប់កម្រិត និងចូលរួមក្នុងសកម្មភាពសេដ្ឋកិច្ចគ្រប់ៗគ្នា សម្រាប់ជំរុញពិពិធកម្ម និងកំណើនសេដ្ឋកិច្ចប្រកបដោយបរិយាបន្ន និងភាពធន់។
សូមបញ្ជាក់ថា ការអប់រំបណ្តុះបណ្តាលបច្ចេកទេស និងវិជ្ជាជីវៈ មានតួនាទីសំខាន់មិនអាចខ្វះបានក្នុងការអភិវឌ្ឍមូលធនមនុស្ស ដោយជួយផ្តល់ឱ្យអ្នកសិក្សានូវចំណេះដឹង ជំនាញបច្ចេកទេស សមត្ថភាព និងឥរិយាបទការងារ ដើម្បីក្លាយខ្លួនជាកម្លាំងពលកម្មជំនាញ អ្នកបច្ចេកទេស និងចូលរួមកាត់បន្ថយគម្លាតជំនាញនៅក្នុងទីផ្សារការងារ។ បន្ថែមលើនេះ ការអប់រំបណ្តុះបណ្តាលបច្ចេកទេស និងវិជ្ជាជីវៈ ធ្វើឱ្យកម្លាំងពលកម្ម និងមូលធនមនុស្សរបស់កម្ពុជា មានភាពធន់នឹងការបម្រែបម្រួល នៃស្ថានភាព និងរចនាសម្ព័ន្ធសេដ្ឋកិច្ច, ទីផ្សារការងារ, ការវិវត្តនៃវិទ្យាសាស្រ្ត និងបច្ចេកវិទ្យាថ្មីៗ ព្រមទាំងជួយឱ្យយុវជនអាចចាប់យកឱកាសការងារបានឆាប់រហ័ស កាត់បន្ថយភាពឥតការងារធ្វើ, ក៏ដូចជាជំរុញការចូលរួមចំណែករបស់យុវជនបានកាន់តែទូលំទូលាយ ក្នុងការអភិវឌ្ឍសង្គម និងសេដ្ឋកិច្ចជាតិ។
ការអភិវឌ្ឍធនធានមនុស្ស គឺជាកត្តាគន្លឹះសម្រាប់ទ្រទ្រង់ការអភិវឌ្ឍវិស័យឧស្សាហកម្ម ការលើកកម្ពស់ភាពប្រកួតប្រជែង និងការជំរុញកំណើនសេដ្ឋកិច្ចប្រកបដោយចីរភាព បរិយាបន្ន សមធម៌ និងភាពធន់នឹងវិបត្តិ ទាំងក្នុងពេលបច្ចុប្បន្ន និងទាំងសម្រាប់ពេលអនាគត សំដៅជំរុញកែប្រែ និងធ្វើទំនើបកម្មរចនាសម្ព័ន្ធឧស្សាហកម្មនៅកម្ពុជា ពីឧស្សាហកម្មអតិពលកម្ម ឈានទៅឧស្សាហកម្មផ្អែកលើជំនាញ និងចូលរួមចំណែកសម្រេចឱ្យបាននូវចក្ខុវិស័យរបស់រាជរដ្ឋាភិបាល ក្នុងការប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០៕
