ក្រសួងសុខាភិបាល​បានប្រកាស​នៅថ្ងៃនេះ ពីមន្ទីរពេទ្យចំនួន១២បន្ថែម​ទៀត បានជាប់ជាមន្ទីរពេទ្យគំរូចិញ្ចឹមកូនដោយទឹកដោះម្តាយ ដែលធ្វើ​ឱ្យ​ចំនួនមន្ទីរពេទ្យ​គំរូ​ក្នុង​ការ​ចិញ្ចឹម​កូន​ដោយទឹកដោះម្តាយ បានកើន​ដល់ចំនួន២០មន្ទីរពេទ្យ ដែល​បានបង្ហាញពីការយកចិត្តទុកដាក់ក្នុងការលើកកម្ពស់ការបំបៅកូនដោយទឹកដោះម្ដាយ ដើម្បីសុខភាពមាតា និងទារក។

ក្នុងពិធីប្រកាសទទួលស្គាល់ជាផ្លូវការ មន្ទីរពេទ្យគំរូចិញ្ចឹមកូនដោយទឹកដោះម្តាយ នាព្រឹកថ្ងៃទី១៨ ខែវិច្ឆិកា ឆ្នាំ២០២៥ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការ ក្រសួងសុខាភិបាល មានប្រសាសន៍ ដោយ​អបអរសារទរមន្ទីរពេទ្យទាំង១២ ដែលបានជាប់ជាមន្ទីរពេទ្យគំរូចិញ្ចឹមកូនដោយទឹកដោះម្តាយ។

លោកជំទាវ​មានប្រសាសន៍ថា​ ការបំបៅកូនដោយទឹកដោះម្ដាយ នៅតែជាអាទិភាពសំខាន់ក្នុងការគាំពារការលើកកម្ពស់ការបំបៅកូនដោយទឹកដោះម្ដាយ។ ទន្ទឹមគ្នា អត្ថប្រយោជន៍ទឹកដោះម្ដាយ គឺល្អ និងមានតម្លៃខ្លាំង ដែលទាមទារឱ្យគ្រូពេទ្យពន្យល់ណែនាំដល់អ្នកម្ដាយគ្រប់រូបកុំស្ទាក់ស្ទើរក្នុងការបំបៅកូនដោយទឹកដោះម្ដាយ។

ឆ្លៀត​ក្នុង​ឱកាស​នោះ លោកជំទាវវេជ្ជបណ្ឌិត ប្រាក់ សោភ័ណនារី ក៏បានអំពាវនាវដល់មន្រ្តីសុខាភិបាលទាំងអស់ គោរពក្រមសីលធម៌វិជ្ជាជីវៈពេទ្យ ដោយមិនត្រូវណែនាំឱ្យស្រី្តទើបសម្រាលប្រើប្រាស់ម្សៅទឹកដោះគោមកជំនួសទឹកដោះម្ដាយ និងត្រូវទប់ស្កាត់ការលក់ដូរ ផ្សព្វផ្សាយម្សៅទឹកដោះគោទាំងក្នុង និងជុំវិញបរិស្ថានមន្ទីរពេទ្យ។

លោក ហេង សុខន ប្រធានមន្ទីរបង្អែកខេត្តក្រចេះ ដែល​ជាប់ជាមន្ទីរពេទ្យគំរូចិញ្ចឹមកូនដោយទឹកដោះម្តាយ មានប្រសាសន៍ថា ការជាប់ជាមន្ទីរពេទ្យគំរូលើកកម្ពស់ការចិញ្ចឹមកូនដោយទឹកដោះម្តាយនេះ មន្ទីរពេទ្យ​បានឆ្លងកាត់ការវាយតម្លៃចំនួន៣ដំណាក់កាល ហើយតាមរយៈការចុះវាយតម្លៃទាំង៣លើកនេះ អត្រាបំបៅកូនដោយទឹកដោះម្ដាយក្នុងមន្ទីរពេទ្យមានការកើនឡើងពីមួយដំណាក់កាលទៅមួយដំណាក់កាល រហូតដល់អត្រាលើសពី​៩០ភាគរយ។ មួយវិញទៀតដោយសារមានឆន្ទៈ និងការប្ដេជ្ញាចិត្ត ដាក់ចេញគោលនយោបាយស្តង់ដារបស់មន្ទីរពេទ្យ ដោយពន្យល់ណែនាំអប់រំបុគ្គលិកឱ្យមានឆន្ទៈចូលរួម និងអនុវត្តតាម សូចនាករវាយតម្លៃទាំង១០របស់កម្មវិធី រៀបចំឱ្យមានបន្ទប់បំបៅដោះកូន របៀបច្របាច់ទឹកដោះ កន្លែងអង្គុយសម្រាប់អ្នកជំងឺ ទូរទឹកកកសម្រាប់រក្សាទឹកដោះម្ដាយ ដោយបុគ្គលិកពេទ្យជាអ្នកពន្យល់ណែនាំអ្នកម្ដាយពីអត្ថប្រយោជន៍ទឹកដោះម្ដាយ។

ប្រធានមន្ទីរបង្អែកខេត្តក្រចេះ បញ្ជាក់ថា លទ្ធផលនេះ គឺជាជំហានមួយក្នុងការអនុវត្តកិច្ចការងារស្របតាមគោលការណ៍ក្រសួងសុខាភិបាលដែលបានដាក់ចេញ ហើយ​លោក​ប្ដេជ្ញាចិត្តធ្វើយ៉ាងណាពង្រីក និងពង្រឹកអត្រាការបំបៅកូនដោយទឹកដោះម្ដាយ ដែលបានមកប្រើប្រាស់សេវានៅមន្ទីរពេទ្យបង្អែកនេះប្រកបដោយប្រសិទ្ធភាព។

លោកស្រី Edel Cribbin ប្រធានផ្នែកកិច្ចសហប្រតិបត្តិការ និងការអភិវឌ្ឍ ស្ថានទូតអៀរឡង់ ទទួលបន្ទុកប្រទេសកម្ពុជា វៀតណាម ឡាវ មានប្រសាសន៍ថា ទោះជាអត្រានៃការបំបៅកូនដោយទឹកដោះម្តាយ បន្តធ្លាក់ចុះគួរឱ្យកត់សម្គាល់ពី ៧៣.៥៥% ក្នុងឆ្នាំ២០១០ មកត្រឹម ៥០% នៅឆ្នាំ២០២១/២២ ប៉ុន្តែគេសង្កេតឃើញថា រាជរដ្ឋាភិបាលកម្ពុជា ក្រសួងសុខាភិបាល និងភាគីពាក់ព័ន្ធ បានរួមគ្នាធ្វើកិច្ចការងារនេះ សំដៅធ្វើយ៉ាងណាឱ្យអត្រានៃការបំបៅដោះកូននៅកម្ពុជាបានកើនឡើង។

ការលើកកម្ពស់ការបំបៅកូនដោយទឹកដោះម្តាយជាសមិទ្ធផលសុខភាពសាធារណៈដ៏សំខាន់ ប៉ុន្តែអត្រាបំបៅកូនដោយទឹកដោះម្តាយតែមួយមុខគត់បានធ្លាក់ចុះគួរឱ្យកត់សម្គាល់ពី ៧៣.៥៥% ក្នុងឆ្នាំ២០១០ មកត្រឹម ៥០% នៅឆ្នាំ២០២១/២២។ មូលហេតុចម្បងគឺ ការផ្សព្វផ្សាយលក់ផលិតផលជំនួសទឹកដោះម្តាយ។

យ៉ាងណាក៏ដោយ ដើម្បីទប់ស្កាត់និន្នាការនេះ មជ្ឈមណ្ឌលជាតិគាំពារមាតា និងទារក នៃក្រសួងសុខាភិបាល បានកំណត់តម្រូវការបន្ទាន់ចំនួន៣ ក្នុងនោះ ទី១. ពង្រឹងការអនុវត្តច្បាប់ ដោយពិនិត្យ និងកែសម្រួលយុទ្ធសាស្ត្រដែលមានស្រាប់ ដើម្បីធានាប្រសិទ្ធភាពនៃការអនុវត្ត និងតាមដាន អនុក្រឹត្យលេខ១៣៣ ស្តីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារ។ ស្ថាប័នសុខាភិបាលទាំងរដ្ឋ និងឯកជន ត្រូវប្រកាន់ខ្ជាប់នូវក្រមសីលធម៌ខ្ពស់បំផុត។ ទី២. បង្កើនសមត្ថភាពបុគ្គលិក ៖ NCMCH សហការជាមួយអង្គការ Helen Keller International បានផ្តល់វគ្គបណ្តុះបណ្តាលលើប្រធានបទសំខាន់ៗចំនួន១២ ស្តីពីការបំបៅកូនដោយទឹកដោះម្តាយ ដល់បុគ្គលិកសុខាភិបាលនៃមន្ទីរពេទ្យខេត្តចំនួន១០ និងទី៣. ដាក់ឱ្យប្រើប្រាស់ “មន្ទីរពេទ្យគំរូ” បានចាប់ផ្តើមអនុវត្តគំរូ មន្ទីរពេទ្យគំរូចិញ្ចឹមកូនដោយទឹកដោះម្តាយ (CoE) ដើម្បីបំពេញភាពខ្វះចន្លោះ។ គំរូ CoE នេះផ្តោតលើការពង្រឹងសមត្ថភាពបុគ្គលិក ការប្រើប្រាស់ឧបករណ៍តាមដានគុណភាព និងការអនុវត្តបទដ្ឋានជាតិដូចជា BFHI (មន្ទីរពេទ្យស្រឡាញ់ទារក) និង EENC (ការថែទាំជាសារវន្តចំពោះទារកទើបនឹងកើត)។

គួរជំរាបជូនថា ចាប់តាំងពីឆ្នាំ២០២៣មក មានមន្ទីរពេទ្យចំនួន២០ បានចូលរួមអនុវត្តជាមន្ទីរពេទ្យគំរូចិញ្ចឹមកូនដោយទឹកដោះម្តាយ (CoE) នៅកម្ពុជា ហើយលទ្ធផលដំបូងបានបង្ហាញថា ការបំបៅដោះកូនក្នុងម៉ោងដំបូងនៃការសម្រាលមានអត្រាខ្ពស់រហូតដល់៨៥% ក្នុងចំណោមមន្ទីរពេទ្យដែលបានចូលរួមអនុវត្ត CoE៕