ក្រសួងអប់រំ យុវជន និងកីឡា នឹងត្រូវបន្តប្រឡងជ្រើសរើសមន្ត្រីរាជការ ២០៨៨នាក់ សម្រាប់គ្រូមត្តេយ្យសិក្សា គ្រូបឋមសិក្សា គ្រូអនុវិទ្យាល័យ។ ក្នុងនោះ គ្រូបង្រៀនឯកទេសអប់រំកាយនិងកីឡា ចំនួន១០០ នាក់ ត្រូវបានជ្រើសរើសកាលពីពេលថ្មីៗនេះ ដើម្បីដាក់ពង្រាយតាមអនុវិទ្យាល័យ និងវិទ្យាល័យគោលដៅក្នុងខេត្តចំនួន២១។

ក្នុងសន្និសីទ្ធសារព័ត៌មានស្ដីពី «ការប្រឡងប្រជែងជ្រើសរើសមន្ត្រីរាជការជាគ្រូបង្រៀន ឯកទេសអប់រំកាយ និងកីឡា”  ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ មានប្រសាសន៍ថា ក្រសួងមុខងារសាធារណៈ សហការជាមួយក្រសួងពាក់ព័ន្ធនានារៀបចំឱ្យមានការប្រឡងក្នុងក្របខណ្ឌមន្រ្តីរាជការ ដើម្បីបើកឱកាសឱ្យកាន់តែច្រើនសម្រាប់យុវជន យុវនារីដែលមានចំណាប់អារម្មណ៍ចូលរួមប្រឡងប្រកួតប្រជែងផ្អែកលើសមត្ថភាព ពោលគឺបើប្រឡងជាប់ គឺជាប់ដោយកិត្តិយស ប្រសិនប្រឡងធ្លាក់ គឺធ្លាក់ដោយអស់ចិត្ត។

ឯកឧត្តម ហ៊ុន ម៉ានី បញ្ជាក់បន្ថែមថា ការផ្សព្វផ្សាយយ៉ាងទូលំទូលាយ នៅគ្រប់ដំណាក់កាលនៃការរៀបចំប្រព័ន្ធប្រឡង ទាំងអនឡាញ ទាំងដោយផ្ទាល់នៅថ្នាក់ជាតិ និងថ្នាក់ក្រោមជាតិ, ការផ្ដល់ព័ត៌មានជូនបេក្ខជនតាមប្រព័ន្ធព័ត៌មានវិទ្យាឌីជីថល, ការរៀបចំកម្មវិធីណែនាំពន្យល់អំពីការអនុវត្តវិញ្ញាសាកីឡា រួមទាំង សន្និសីទសារព័ត៌មាន គឺដើម្បីធានានូវតម្លាភាព និងការផ្តល់ឱកាសស្មើៗគ្នាដល់បេក្ខជនចូលរួមប្រឡងប្រជែង ។

ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិកាក្រសួងអប់រំ យុវជន និងកីឡា មានប្រសាសន៍ថា ការប្រឡងនេះ ប្រៀបបីដូចជាការបន្តមរតក ដែលក្រសួងអប់រំ យុវជន និងកីឡា បានធ្វើការកែទម្រង់ការប្រឡងសញ្ញាបត្រមធ្យមសិក្សាទុតិយភូមិកាលពីឆ្នាំ២០១៤កន្លងមក (អ្នកចេះគឺជាប់)។

ឯកឧត្តមបណ្ឌិតសភាចារ្យ បន្ថែមថា ការប្រឡងជ្រើសរើស និងការពង្រាយគ្រូបង្រៀនលើកនេះ នៅតែបន្តអនុវត្តដោយមានភាពប្រាកដប្រជា ព្រោះការធ្វើស្វ័យប្រកាស និងឱ្យបេក្ខជនសុំការបញ្ជាក់ពីសាលាគោលដៅមុនពេលប្រឡងបានអនុវត្តច្រើនឆ្នាំកន្លងមកហើយ។ ក្នុងនោះ សាលាដែលខ្វះគ្រូ ត្រូវធ្វើស្វ័យប្រកាសថា មានតម្រូវការពិត ហើយបេក្ខជនត្រូវធ្វើការជ្រើសរើសទីតាំងការងារ នៅសាលាដែលមានតម្រូវការចាំបាច់ និងជាក់លាក់។

ឯកឧត្តមក៏បានគូសបញ្ជាក់ផងដែរថា ការប្រឡងនេះ ត្រូវបានរៀបចំឡើងផ្អែកលើគោលការណ៍គុណធិបតេយ្យ អ្នកចេះគឺជាប់ និងយុត្តិធម៌ ក្នុងទិសដៅកសាងមូលធនមនុស្សប្រកបដោយចំណេះដឹង ជំនាញ សីលធម៌ និងសុខភាពល្អ ដើម្បីឱ្យសង្គមទទួលស្គាល់ និងឱ្យតម្លៃ ហើយការគោរពបាននូវគោលការណ៍នេះក៏នឹងនាំមកនូវកិត្តិយសបុគ្គល គ្រួសារ សង្គម និងប្រទេសជាតិផងដែរ៕