ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានប្រកាសបេក្ខជនឆ្នើមចំនួន៦រូប ជាប់ជ័យលាភីថ្នាក់ជាតិ ក្នុងការប្រកួតតែងនិពន្ធប្រលោមលោកខ្នាតខ្លី ពានរង្វាន់សម្តេចតេជោ ហ៊ុន សែន ក្នុងឱកាសអបអរសាទរទិវាជាតិអំណានលើកទី១០ ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម”។
បើតាមការប្រកាសរបស់ក្រសួងអប់រំ ជ័យលាភីថ្នាក់ជាតិផ្នែក “ប្រលោមលោកខ្នាតខ្លីជាពាក្យរាយ” បានទៅលើបេក្ខជន៣រូប រួមមាន ជ័យលាភីលេខ១ បានទៅលើ លោកស្រី ជា សុលីនី មន្ត្រីរាជការក្រសួងព័ត៌មាន រាជធានីភ្នំពេញ, ជ័យលាភីលេខ២ បានទៅលើ លោក មុំ រដ្ឋា គ្រូបង្រៀនវិទ្យាល័យ ពេជ្រចិន្តា ខេត្តបាត់ដំបង និងជ័យលាភីលេខ៣ បានទៅលើ លោក ជ្រុយ នាវា និស្សិតមកពីសាកលវិទ្យាល័យភូមិន្ទភ្នំពេញ រាជធានីភ្នំពេញ។
ចំណែក ជ័យលាភីថ្នាក់ជាតិផ្នែក “ប្រលោមលោកខ្នាតខ្លីជាពាក្យកាព្យ” បានទៅលើបេក្ខជន៣រូប រួមមាន ជ័យលាភីលេខ១ បានទៅលើ លោក មឿង សំណាង បុគ្គលិកធនាគារ ខេត្តឧត្តរមានជ័យ, ជ័យលាភីលេខ២ បានទៅលើ លោក ជួន ខ្មៅ គ្រូបង្រៀនវិទ្យាល័យ ចំណេះទូទៅនិងបច្ចេកទេសក្រុងព្រះសីហនុ ខេត្ដព្រះសីហនុ និងជ័យលាភីលេខ៣ បានទៅលើ លោក ឯក ខន គ្រូបង្រៀនវិទ្យាល័យ គូលែន ខេត្តព្រះវិហារ។
ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការ ក្រសួងអប់រំ យុវជន និងកីឡា បានមានប្រសាសន៍ ដោយថ្លែងអំណរគុណដល់បេក្ខជនទាំងអស់ដែលបានចូលរួមដាក់ស្នាដៃប្រកួត ជាពិសេសមន្ទីរអប់រំ យុវជន និងកីឡា គ្រប់រាជធានីខេត្តដែលបានរៀបចំការប្រឡងជ្រើសរើសតាំងពីថ្នាក់ក្រោមជាតិរហូតដល់ថ្នាក់ជាតិ ដែលញ៉ាំងឱ្យពិធីអបអរទិវាជាតិអំណានលើទី១០ ទទួលបានជោគជ័យ និងមានភាពអធិកអធម។
ឯកឧត្តមបណ្ឌិតសភាចារ្យ ណាត ប៊ុនរឿន ក៏បានផ្ដាំផ្ញើដល់បេក្ខជនដែលបានជាប់ជ័យលាភីឱ្យខិតខំប្រឹងប្រែងបន្តទៀតក្នុងការពង្រឹងសមត្ថភាពប្រកួតបន្ទាប់ទៀត។ ឯកឧត្តមបណ្ឌិតសភាចារ្យ រំពឹងថា វប្បធម៌អក្សរសិល្ប៍ខ្មែរ អ្នកជំនាន់ក្រោយនឹងខិតខំថែរក្សាបន្តទៅទៀត។
ជាមួយគ្នានេះដែរ រដ្ឋលេខាធិការក្រសួងអប់រំ ក៏បានលើកទឹកចិត្តឱ្យប្រជាជនខ្មែរ យុវជនខ្មែរ ខិតខំនិយាយ ខិតខំសរសេរ ជាភាសាខ្មែរឱ្យបានត្រឹមត្រូវ និងច្បាស់លាស់។
គួរជម្រាបជូនថា សម្រាប់ការប្រកួតប្រជែងតែងនិពន្ធប្រលោមលោកខ្នាតខ្លី ស្នាដៃតែងនិពន្ធ គឺត្រូវឈរលើមូលបទចំនួន៣ ដែលរួមមាន ៖ ១. តម្លៃសីលធម៌ ២. តម្លៃប្រពៃណីទំនៀមទម្លាប់ និងប្រវត្តិសាស្ត្រខ្មែរ និង៣. តម្លៃភាសា អក្សរសាស្ត្រខ្មែរ វប្បធម៌ និងអរិយធម៌ខ្មែរ៕
