ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គោលដៅនៃការអប់រំ គឺជាការបណ្តុះធនធានមនុស្សប្រកបដោយគុណភាព ដោយផ្តោតលើគោលដៅធំៗចំនួន៤ គឺ រៀនដើម្បីចេះដឹង រៀនដើម្បីចេះធ្វើ រៀនដើម្បីជាពលរដ្ឋ និង រៀនដើម្បីឱ្យចេះរស់នៅក្នុងសង្គម ។ លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា បច្ចុប្បន្ននេះ ក្រសួងអប់រំកំពុងតែធ្វើការកែលម្អកម្មវិធីសិក្សានៅគ្រប់កម្រិតសិក្សាទាំងអស់ មិនថាចំណេះដឹងទូទៅ ឬបច្ចេកទេស ពីបឋមសិក្សា ដល់សាកលវិទ្យាល័យ ដោយបំពាក់នូវគុណសម្បទាទាំង៣ គឺវិជ្ជាសម្បទា បំណិនសម្បទា និងចរិយាសម្បទា ដើម្បីឆ្លើយតបនឹងគោលដៅទាំង៤ នៃការអប់រំ។
លោកជំទាវ ឃួន វិច្ឆិកា មានប្រសាសន៍ថា នៅក្នុងកម្មវិធីសិក្សា គឺបានបែងចែកគុណសម្បទារចំនួន៣ គឺ វិជ្ជាសម្បទា ដែលសំដៅលើចំណេះដឹង, បំណិនសម្បទា គឺសំដៅទៅលើការចេះធ្វើ ហើយចរិយាសម្បទា គឺសំដៅទៅដល់អត្តចរិត ការមានសីលធម៌នៅក្នុងការរស់នៅប្រកបដោយគុណធម៌ សីលធម៌ និងអាចសហការធ្វើការងារជាក្រុមបាន ដោយក្លាយជាពលរដ្ឋដ៏ល្អនៅក្នុងសង្គម។
បើតាមប្រសាសន៍បញ្ជាក់របស់លោកជំទាវ ឃួន វិច្ឆិកា ការអប់រំដើម្បីចំណេះដឹង គឺសំដៅទៅលើការអប់រំដើម្បីឱ្យសិស្សានុសិស្ស ឬក៏និស្សិតទាំងអស់ទទួលបានចំណេះដឹង ជាមូលដ្ឋានគ្រឹះនៅក្នុងការយកទៅអនុវត្តការងារ ឬក៏ការសម្រេចចិត្តណាមួយនៅក្នុងការបំពេញការងារ ឬក៏ក្នុងជីវិតរស់នៅប្រចាំថ្ងៃ។ រីឯចំណេះធ្វើ ឬក៏បំណិនសម្បទា គឺសំដៅលើជំនាញ ឬបំណិនដែលសិស្សអាចធ្វើអ្វីមួយបាន ដូចជាការរៀនកុំព្យូទ័រ គឺមិនមែនត្រឹមតែរៀនដើម្បីឱ្យតែរៀននោះទេ ប៉ុន្តែដើម្បីឱ្យសិស្សចេះប្រើប្រាស់ដើម្បីទទួលបានជំនាញក្នុងការធ្វើអ្វីមួយ ឬផលិតអ្វីមួយ ពោលគឺសិស្សអាចប្រើប្រាស់ និងអាចបង្កើតអ្វីមួយបាន តាមរយៈអ្វីដែលគាត់បានរៀន។
ចំណែកក្រមសីលធម៌ ក៏ដូចជាចរិយាសម្បទាវិញ ក្រសួងបានយកចិត្តទុកដាក់ ដោយកែលម្អវិធីសាស្រ្តបង្រៀន ប្រែក្លាយពីគ្រូមជ្ឈមណ្ឌល មកជាសិស្សមជ្ឈមណ្ឌល ដើម្បីឱ្យសិស្សអាចសហការធ្វើការងារជាក្រុម ក្នុងការដោះស្រាយបញ្ហា, និយាយជារួម គឺដើម្បីឱ្យសិស្សមានសកម្មភាព ហើយឱ្យចេះសង្កេត ចេះស្រាវជ្រាវ ចេះដោះស្រាយបញ្ហា ដើម្បីថ្ងៃក្រោយ នៅពេលពួកគេចេញទៅធ្វើការ គឺគេមានស្មារតីធ្វើការងារជាក្រុម ទទួលស្គាល់នូវគំនិតខុសប្លែកគ្នា អាចធ្វើការសហការ និងមានអត្តចរិតដ៏ល្អ អាចធ្វើការងារជាមួយអ្នកដទៃ ឬក៏ក្លាយជាពលរដ្ឋដ៏ល្អបាន។
ជាមួយគ្នានេះ បើតាមប្រសាសន៍របស់លោកជំទាវ ឃួន វិច្ឆិកា ក្រៅតែពីសម្បទាទាំង៣ខាងលើ បច្ចុប្បន្នក្រសួងអប់រំ ក៏កំពុងតែថែម និងផ្តោតសំខាន់ទៅលើកាយសម្បទាមួយថែមទៀត ដើម្បីធានាឱ្យសិស្ស និស្សិត មានសុខភាពល្អ អាចបំពេញការងារប្រកបដោយប្រសិទ្ធភាព។
យ៉ាងណាក៏ដោយ ដើម្បីសម្រេចនូវគោលដៅ នៃការអប់រំទាំង៤ បច្ចុប្បន្នក្រសួងអប់រំបានដាក់ឱ្យប្រើប្រាស់នូវស្តង់ដារសាលារៀនគំរូ ដែលនៅក្នុងនោះបានបញ្ជាក់លម្អិតអំពីអ្វីដែលសាលាត្រូវធ្វើ ដើម្បីឱ្យសិស្សានុសិស្សទទួលបាននូវសម្បទាទាំង៣៕
