ក្នុងជីវិតការងារ និងសង្គម មនុស្សភាគច្រើនមិនអាចជៀសផុតពីការប្រាស្រ័យទាក់ទងជាមួយបុគ្គលដែលមានឥទ្ធិពល ឬមានឋានៈខ្ពស់ជាងខ្លួននោះទេ។ ដើម្បីឱ្យការប្រាស្រ័យទាក់ទងនោះមានប្រសិទ្ធភាព និងក្លាយជាឱកាស, ការត្រៀមខ្លួន ស្វែងយល់អំពីភាគីម្ខាងទៀត គឺជាគន្លឹះសំខាន់ក្នុងការបង្កើតទំនុកចិត្ត ពេលនិយាយជាមួយមនុស្សមានឥទ្ធិពល។

បើតាមរយៈគេហទំព័រ Fastcompany បានបង្ហាញគន្លឹះចំនួន ៥ ដែលអ្នក​អាច​ប្រើប្រាស់ ប្រសិន​បើ​មិន​ទាន់​មានទំនុក​ចិត្ត​ក្នុង​ការ​និយាយជាមួយ​មនុស្ស​ដែលមាន​ឥទ្ធិពល ៖

១. ស្រាវជ្រាវព័ត៌មាន​ ៖ ការស្រាវជ្រាវបន្ថែមអំពីព័ត៌មានមួយចំនួន ដែលអាចធ្វើបានតាមរយៈអ៊ីនធឺណិត ឬការសាកសួរ មុនពេលជួបមនុស្ស ឬក៏ការប្រជុំណាមួយ ប្រៀបដូចជាការរៀបចំកិច្ចប្រជុំមួយដ៏មានប្រសិទ្ធភាពដូច្នោះដែរ។ ការបង្ហាញខ្លួនទៅកាន់បុគ្គលដែលមានឥទ្ធិពល ចាំបាច់ត្រូវត្រៀមឱ្យហើយពាក់ព័ន្ធនឹងប្រធានបទដែលគ្រោងនឹងជជែក និងព័ត៌មានដែលអាចចែករំលែកបាន ឬមិនបាន និងព័ត៌មានអ្វីខ្លះដែលពុំចាំបាច់។

២. បង្ហាញការគោរព ៖ គ្រប់គ្នាសមនឹងទទួលបានការគោរព តែរបៀបនៃបង្ហាញការគោរព ហាក់មានភាពខុសគ្នា ហើយផ្តល់ការគោរពចំពោះបុគ្គលដែលមានឥទ្ធិពល ធ្វើឡើងតាមរយៈសកម្មភាពដូចជាការគោរពពេល និងការស្វែងយល់អំពីភាគីម្ខាងទៀតទុកជាមុន ឬក៏ការស្គាល់ពីស្នាដៃ និងបង្ហាញពីក្ដីសរសើរ និងអ្វីដែលលោកអ្នកពេញចិត្ត ក៏ជាការបង្ហាញការគោរពមួយផ្នែកដែរ។

៣. ជ្រើសរើសយកតែចំណុចសំខាន់មកជជែក ៖ ក្រៅពីការស្រាវជ្រាវ និងការគោរពគ្នា ការនិយាយឱ្យចំណុចដែលត្រូវធ្វើការជាមួយគ្នា ឬអ្វីដែលចង់ដឹងពីភាគីម្ខាងទៀត សុទ្ធសឹងតែជាចំណុចសំខាន់ក្នុងការបង្កើតទំនុកចិត្តពេលនិយាយជាមួយភាគីដែលមានឥទ្ធិពល ទោះបីជាសមត្ថភាពមានគម្លាតពីគ្នា តែការគិតគូរអំពីប្រធានបទ​ និងការត្រៀមសំណួរទុកជាមុនបានរួមចំណែកឱ្យការប្រាស្រ័យទាក់ទងជាមួយមនុស្សមានឥទ្ធិពលកាន់តែមានប្រសិទ្ធភាព។

៤. បង្កើនចំណេះដឹងខ្លួនឯង ៖ មិនថាភាគីម្ខាងទៀតមានឥទ្ធិពល ឬក៏កម្រិតចំណេះដឹងបែបណានោះទេ ពួកគាត់ក៏ត្រូវការគំនិតចម្រុះ និងការផ្លាស់ប្តូរគំនិតដូចគ្នាដែរ ដូច្នេះការបង្កើនចំណេះដឹង ការចម្រាញ់យកព័ត៌មានសំខាន់ៗ ដើម្បីការពារគំនិតផ្ទាល់ខ្លួន ឬក៏ការបង្ហាញហេតុផលដែលមានភាពសម្បូរបែបគឺជាសកម្មភាពដែលគួរអនុវត្តន៍ជាប្រចាំ។

៥. ការប្រើប្រាស់ពាក្យពេចន៍ ៖ ជ្រើសរើសពាក្យដែលត្រូវនឹងអត្ថន័យ និងជៀសវាងការប្រើប្រាស់ពាក្យដែលធ្វើឱ្យការនិយាយស្តីមានភាពមិនច្បាស់លាស់ដូចជា ប្រហែល ស្រមៃ អាចនឹង រួមទាំងសម្លេងរំខានដទៃទៀត ដោយនិយាយជំនួសមកវិញនូវការប្រើពាក្យឱ្យច្បាស់ៗ ជាឧទាហរណ៍បើនិយាយអំពីពេលវេលា គួរបញ្ជាក់ផងដែរថា ម៉ោងប៉ុន្មាន ឬនាទីប៉ុន្មាន? នៅពេលព្រឹក ឬពេលរសៀលជាដើម៕