រយៈពេល​ជាង​មួយ​ទសវត្សរ៍​កន្លងមកនេះ និស្សិត​កម្ពុជា​ប្រមាណជាង ២៥០០នាក់ បានទៅបន្តការសិក្សា​នៅ​តាម​គ្រឹះស្ថាន​សិក្សា​ឧត្តមសិក្សា​នានា​ក្នុង​ប្រទេស​ថៃ ក្នុងនោះ​មាននិស្សិត​ចំនួន​ប្រមាណ ២១៣២នាក់ បានទទួលអាហារូបករណ៍​ព្រះរាជ​ទាន​​របស់ព្រះអង្គម្ចាស់ក្សត្រី មហាចក្រី សិរិនថន។

ក្នុងជំនួបជាមួយ​រដ្ឋមន្រ្តីក្រសួងអប់រំ យុវជន និង​កីឡា កាលពីពេលថ្មីៗនេះ លោកសាស្រ្តាចារ្យបណ្ឌិត Wilert Puriwat សាកលវិទ្យាធិការ នៃសាកលវិទ្យាល័យ​ជូឡាឡុងកន ប្រទេសថៃ បានមានប្រសាសន៍ថា ការអប់រំ គឺជាកូនសោគន្លឹះក្នុងការលើកកម្ពស់គុណភាពជីវិត, ទន្ទឹមនឹងនេះ លោក​ក៏​បានបង្ហាញពីចំណាប់អារម្មណ៍​ក្នុងការ​បន្ត​ពង្រឹង និង​ពង្រីក​កិច្ច​សហប្រតិបត្តិការ​រវាងក្រសួងអប់រំ យុវជន និងកីឡា និង​សាកលវិទ្យាល័យ​ជូឡាឡុងកន ដែល​វា​ក៏​ជា​ការ​រឹតបន្តឹង​ទំនាក់ទំនង​វិស័យ​អប់រំ​រវាង​ប្រទេស​ទាំងពីរផងដែរ។

ក្នុងនោះ លោកបណ្ឌិត Wilert Puriwat បានលើកឡើងអំពីសក្តានុពល នៃការសហការអនុវត្តគម្រោងចំនួន៣ របស់សាកលវិទ្យាល័យ ជាមួយក្រសួងអប់រំ យុវជន និងកីឡា គឺ ៖ (១) បញ្ញាសប្បនិមិត្តក្នុងវិស័យអប់រំ (AI Technology in Education), (២) ការផ្តល់អាហារូបករណ៍ដល់និស្សិតកម្ពុជាទៅបន្តការសិក្សានៅសាកលវិទ្យាល័យជូឡាឡុងកន និង (៣) ការសហការលើផ្នែកការងារស្រាវជ្រាវ។

ជាការឆ្លើយតប តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរ និងថ្លែងអំណរគុណយ៉ាងជ្រាលជ្រៅដល់សាកលវិទ្យាល័យជូឡាឡុងកនដែលបានផ្តល់អាហារូបករណ៍ និងកម្មវិធីសិក្សាផ្លាស់ប្តូរបទពិសោធដល់និស្សិតកម្ពុជា ព្រមទាំងការបន្តទំនាក់ទំនងប្រកបដោយការយកចិត្តទុកដាក់ជាមួយអតីតនិស្សិត ក៏ដូចជាក្រសួងអប់រំ យុវជន និងកីឡាកម្ពុជានាពេលកន្លងមក ដោយបានគូសបញ្ជាក់នូវការគាំទ្រចំពោះរាល់គំនិតផ្តួចផ្តើម នៃកិច្ចសហប្រតិបត្តិការបន្ថែមទៀតដែលមានគោលដៅលើកកម្ពស់វិស័យអប់រំ និងអភិវឌ្ឍធនធានមនុស្សកម្ពុជា។

លោកជំទាវ ឃួន វិច្ឆិកា អ្នកនាំពាក្យ​ក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ តែងតែរក្សាទំនាក់ទំនងល្អក្នុងកិច្ចសហប្រតិបត្តិការជាមួយសាកលវិទ្យាល័យជូឡាឡុងកន ក្នុងប្រទេសថៃ ជាបន្តបន្ទាប់។ លោកជំទាវបន្តថា ក្រសួងអប់រំ ជឿថាការសហការគ្នាជាមួយសាកលវិទ្យាល័យជូឡាឡុងកននេះ នឹងជួយលើកកម្ពស់ការស្រាវជ្រាវ ការលើកកម្ពស់ការអប់រំនៅកម្ពុជា ក៏ដូចជាជំរុញឱ្យមានការផ្លាស់ប្ដូរនិស្សិត និងផ្ដល់អាហារូបករណ៍ដល់សិស្សានុសិស្សកាន់តែច្រើន និងឆ្លើយតបតម្រូវការផងដែរ។

គួរជម្រាបជូនថា គិតត្រឹមដើមឆ្នាំ២០២៤ និស្សិតកម្ពុជា​ដែលទទួលបាន​អាហារូបករណ៍ព្រះរាជទានសិក្សាចាប់ពីថ្នាក់បរិញ្ញាបត្រ រហូតដល់ថ្នាក់បណ្ឌិត ចំនួនប្រមាណ ១៩០៩នាក់ បានបញ្ចប់ការសិក្សាដោយជោគជ័យ ដែលក្នុងនោះមាននិស្សិតចំនួន ៣៧នាក់បានបញ្ចប់ការសិក្សាពីមហាវិទ្យាល័យអប់រំ សាកលវិទ្យាល័យជូឡាឡុងកន៕