ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រសិនបើអង្គុយយូរៗក្នុងការិយាល័យលើសពីប្រាំបីម៉ោងទៅ ហើយមិនបានធ្វើឱ្យរាងកាយមានភាពសកម្មច្រើន អាចបង្កហានិភ័យដល់សុខភាពរបស់យើងដោយជំរុញឱ្យរាងកាយឡើងទម្ងន់លើសតម្រូវការនៃរាងកាយ។ តាមរយៈគេហទំព័រ Indiatimes បានបង្ហាញហេតុផលប្រាំពីរចំណុច ដែលថា ការអង្គុយយូរៗក្នុងការិយាល័យបង្កហានិភ័យដល់សុខភាព។
១. ហានិភ័យនៃជំងឺរ៉ាំរ៉ៃ ៖ ការអង្គុយយូរៗ ក្នុងការិយាល័យបណ្តាលឱ្យហានិភ័យនៃជំងឺរ៉ាំរ៉ៃមានការកើនឡើង រាងកាយឡើងទម្ងន់មិនស្របនឹងតម្រូវការសុខភាពនៃរាងកាយ កើតជំងឺទឹកនោមផ្អែម សរសៃឈាមបេះដូងដំណើរការមិនល្អ រួមទាំងជំងឺមហារីកដែលមានប្រភេទខុសៗគ្នា។
២. សាច់ដុំទូទៅនៃរាងកាយថមថយ ៖ សាច់ដុំដែលងាយនឹងចុះខ្សោយគឺសាច់ដុំជើង ហើយការអង្គុយយូរនៅពីមុខតុធ្វើការ ធ្វើឱ្យពិបាកបត់បែន មានបញ្ហាដល់ការប្រើប្រាស់ឥរិយាបថ ហើយសាច់ដុំទូទៅនៃរាងកាយមានអាការៈចុះខ្សោយ។
៣. សុខភាពនៃសរសៃឈាម ៖ អង្គុយយូរក្នុងការិយាល័យបង្កផលអវិជ្ជមានទៅកាន់សរសៃឈាមក្នុងរាងកាយ នៅពេលឈាមរត់មិនល្អ គឺអាចបណ្តាលឱ្យជើងហើម ឬកកឈាមក្នុងរាងកាយជាដើម។
៤. មេតាប៉ូលីសខ្សោយ ៖ ការរក្សាមេតាប៉ូលីស ក្នុងរាងកាយ ជំរុញថាមពលឱ្យរាងកាយមានសមត្ថភាពគ្រប់គ្រាន់ ក្នុងការបំប្លែងអាហារដែលបានទទួលទានទៅកាន់តម្រូវការនៃរាងកាយ។ មេតាប៉ូលីសគ្រប់គ្រាន់មានសមត្ថភាពកម្រិតជាតិស្ករក្នុងឈាម និងបញ្ចៀសកុំឱ្យរាងកាយលើសទម្ងន់។ ដូច្នេះ ការដើរឱ្យបានច្រើន ឬមានទម្លាប់ហាត់ប្រាណជាប្រចាំ គឺជាកត្តាពង្រឹងមេតាប៉ូលីសនិងសុខភាពរាងកាយទូទៅ។
៥. សុខភាពផ្លូវចិត្ត ៖ អង្គុយយូរម៉ោងក្នុងការិយាល័យ បានជះបញ្ហាប្រឈមទៅកាន់សុខភាពផ្លូវចិត្តជាច្រើនដូចជា អាការៈថប់បារម្ភ ភាពតានតឹង ជំងឺបាក់ទឹកចិត្ត និងស្រ្តេស។
៦. ចុករោយត្រង់ផ្នែកកញ្ចឹងកនិងខ្នង ៖ ការអង្គុយយូរក្នុងរយៈពេលច្រើនម៉ោងពេក ហើយមិនយកចិត្តទុកដាក់ក្នុងការធ្វើចលនា បង្កឱ្យមានភាពចុករោយនៅត្រង់ក និងខ្នងក្នុងរយៈពេលយូរ។
៧. អាយុកាលនៃការរស់នៅ ៖ ឧស្សាហដើរចុះឡើង ឬធ្វើឱ្យរាងកាយមានចលនា មិនត្រឹមតែធ្វើឱ្យអាយុយឺនយូរប៉ុណ្ណោះទេ ប៉ុន្តែប្រៀបដូចជាការអនុវន្ត៍ភាពបត់បែប នៃរាងកាយ និងកាត់បន្ថយហានិភ័យនៃជំងឺនានា។
ដូច្នេះ សរុបមកវិញ ដើម្បីចៀសវាងការអង្គុយយូរដែលនាំឱ្យប៉ះពាល់ដល់សុខភាព អ្នកដែលធ្វើការងារនៅក្នុងការិយាល័យយូរ អាចអនុវត្តនូវវិធីមួយចំនួនដូចជា ដើរចេញពីកៅអីរបស់អ្នករាល់មួយម៉ោង, ធ្វើលំហាត់ប្រាណដែលគាំទ្រឱ្យខ្នងរឹងមាំ, ទទួលទានអាហារដែលល្អសម្រាប់សុខភាព និងមានថាមពលដូចជា បន្លែ និងផ្លែឈើជាដើម។ ការអនុវត្តទម្លាប់ល្អទាំងនេះ អាចជួយអ្នកបន្ថយបញ្ហាសុខភាពដែលអាចកើតឡើងពីការអង្គុយយូរ និងធ្វើឱ្យអ្នកមានផលិតភាពកាន់តែល្អ៕
