ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី៦ ខែវិច្ឆិកា ឆ្នាំ២០២៣ ក្នុងនាមថ្នាក់ដឹកនាំក្រសួងអប់រំ យុវជន និងកីឡា ឯកឧត្តម ហង់ជួន ណារ៉ុន ឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ យុវជន និងកីឡា បានថ្លែងសារ ដោយលើកទឹកចិត្តដល់គណៈមេប្រយោគ គណៈកម្មការនានា និងអ្នកពាក់ព័ន្ធ រៀបចំដំណើរការប្រឡងឆ្នាំនេះ ដោយការទទួលខុសត្រូវខ្ពស់ ប្រកបដោយវិជ្ជាជីវៈ និងមានប្រសិទ្ធភាព។
ឯកឧត្តម ហង់ជួន ណារ៉ុន មានប្រសាសន៍ថា «ខ្ញុំសូមលើកទឹកចិត្តឱ្យគណៈមេប្រយោគ គណៈកម្មការនានា និងអ្នកពាក់ព័ន្ធនឹងការរៀបចំដំណើរការប្រឡងនៅឆ្នាំនេះ សូមខិតខំបំពេញភារកិច្ចរៀងៗខ្លួនដោយការទទួលខុសត្រូវខ្ពស់ប្រកបដោយវិជ្ជាជីវៈ និងមានប្រសិទ្ធភាព ទាំងការងាររដ្ឋបាល ទាំងការងារគ្រប់គ្រងបច្ចេកទេស សន្តិសុខ វិធានការសុខភាព និងសុវត្ថិភាព ដើម្បីធានាថា ការប្រឡងសញ្ញាបត្រមធ្យមសិក្សាទុតិយភូមិ ប្រព្រឹត្តទៅដោយគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន»។
ជាមួយគ្នានេះ ឯកឧត្តម ហង់ជួន ណារ៉ុន ក៏បានជូនពរដល់គណៈមេប្រយោគ និងគណៈកម្មការនានា ព្រមទាំងអ្នកពាក់ព័ន្ធទាំងអស់ សូមទទួលបានជោគជ័យប្រកបដោយសុខសុវត្ថិភាពគ្រប់ៗគ្នា។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រាប់ឆ្នាំសិក្សា២០២២-២០២៣ នឹងប្រព្រឹត្តទៅរយៈពេលពីរថ្ងៃ គឺថ្ងៃទី០៦ និងថ្ងៃទី០៧ ខែវិច្ឆិកា ឆ្នាំ២០២៣ ដោយមានបេក្ខជនដាក់ពាក្យប្រឡងសរុបចំនួន ១៣៧៤១២នាក់ ដោយចែកចេញជាថ្នាក់វិទ្យាសាស្រ្តចំនួន ៤១៣៧៩នាក់ និងបេក្ខជនថ្នាក់វិទ្យាសាស្រ្តសង្គមចំនួន ៩៦០៣៣នាក់។
បើយោងតាមកាលវិភាគ នៃការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ បន្ទាប់ពីដំណើរការសំណេរនៅថ្ងៃទី៦-៧ ខែវិច្ឆិកា ដំណើរការកំណែ អាចនឹងប្រព្រឹត្តទៅចាប់ពីថ្ងៃទី០៩ ដល់ថ្ងៃទី១៥ ខែវិច្ឆិកា ឆ្នាំ២០២៣, ដំណើរស្រង់បូកពិន្ទុ ដោយកុំព្យូទ័រ និងផ្ទៀងផ្ទាត់ពិន្ទុ ចាប់ពីថ្ងៃទី១៦ ដល់ថ្ងៃទី២៦ ខែវិច្ឆិកា ឆ្នាំ២០២៣ ហើយប្រកាសលទ្ធផលនៅថ្ងសទី២៨ ខែវិច្ឆិកា ឆ្នាំ២០២៣ពេលរសៀលសម្រាប់រាជធានីភ្នំពេញ និងខេត្តកណ្តាល និងថ្ងៃទី២៩ ខែវិច្ឆិកា សម្រាប់ខេត្តផ្សេងៗទៀតនៅទូទាំងប្រទេស៕
