ភ្នំពេញ – ក្រសួងអប់រំយុវជន និងកីឡា បានដាក់ចេញនូវយុទ្ធសាស្ត្រអភិវឌ្ឍជាតិ មានទំនាក់ទំនងយ៉ាងសំខាន់ជាមួយនឹងការអភិវឌ្ឍយុវជន ដែលផ្សារភ្ជាប់យ៉ាងជិតស្និទ្ធជាមួយនឹងការបំពាក់ជំនាញសតវត្សរ៍ទី២១ និងជំនាញឌីជីថល ដើម្បីឱ្យយុវជនដែលជាអ្នកបន្តវេន និងជាអ្នកជំនាន់ក្រោយ បានត្រៀមខ្លួនសម្រាប់ទីផ្សារការងារ ឱកាស និងការដឹកនាំ ទាំងបច្ចុប្បន្ន និងអនាគត។ ក្នុងន័យនេះ បានបង្ហាញថា​ សមត្ថភាពក្នុងការជជែកដេញដោល និងការទំនាក់ទំនងប្រកបដោយក្រមសីលធម៌ ពិតជាមានសារៈសំខាន់សម្រាប់យុវជនសម័យថ្មី ដូច្នេះ ការបង្កើតឱ្យមានវេទិកាជជែកដេញដោល ទាំងថ្នាក់សាលា ថ្នាក់ស្រុក ថ្នាក់ខេត្ត និងថ្នាក់ជាតិ គឺជាឱកាសមួយដ៏ពិសេសសម្រាប់យុវជនពង្រឹងជំនាញជីវិត។

លោក ម៉ៅ រ៉ាវី ជាមន្ត្រីមន្ទីរអប់រំខេត្តសៀមរាប និងជាអ្នកដឹកនាំក្រុមយុវជនចូលរួមប្រកួតកម្មវិធីជជែកដេញដោលថ្នាក់ជាតិ ២០២៣ បានបង្ហាញការយល់ឃើញរបស់ផ្ទាល់ខ្លួនថា ការរៀបចំវិធីជជែកដេញដោល ផ្ដល់ផលវិជ្ជមានច្រើនសម្រាប់យុវជន ព្រោះបានផ្ដល់ឱកាសឱ្យយុវជនពង្រឹងជំនាញទន់ ក្លាហាន ហ៊ាននិយាយ ហ៊ានចោទសួរ និងហ៊ានឆ្លើយ។ លោកបន្ថែមថា សម្រាប់លោកដែលតំណាងអ្នកអប់រំខេត្តសៀមរាបមួយរូប លោកពិតជាចង់ឱ្យមានការបង្កើតកម្មវិធីបែបនេះកាន់តែច្រើនជាងនេះទៀត ព្រោះកម្មវិធីមិនត្រឹមតែផ្ដល់ឱកាសឱ្យយុវជននៅទីក្រុង និងខេត្តប៉ុណ្ណោះទេ ប៉ុន្តែយុវជននៅតាមទីជនបទដាច់ស្រយាលក៏ពួកគាត់អាចចូលរួមបានដែរ។ ជាក់ស្ដែង ក្រុមយុវជន វិទ្យាល័យ ហ៊ុនសែន ស្វាយលើ ដែលលោកបានដឹកនាំ គឺមានទីតាំងរហូតដល់ ៧៥គីឡូពីទីរួមខេត្តឯណោះ។

“ខ្ញុំចង់ឱ្យថ្នាក់ដឹកនាំក្រសួង ជាពិសេសឯកឧត្តមបណ្ឌិតហង់ ជួនណារ៉ុន បន្តបង្កើតកម្មវិធីបែបនេះឱ្យបានរហូត។”

លោក ម៉ៅ រ៉ាវី មន្ត្រីមន្ទីរអប់រំខេត្តសៀមរាប

លោក សំ សុពេជ្រ អ្នកសម្របសម្រួលនៅក្នុងកម្មវិធីជជែកដេញដោលយុវជនថ្នាក់ជាតិឆ្នាំ២០២៣ ក៏បានបង្ហាញពីការចង់ឃើញវិស័យជជែកដេញ និងការនិយាយជាសាធារណៈមានការរីកចម្រើនកាន់តែខ្លាំងជាងបច្ចុប្បន្ននេះទៀត។ លោកថា ការរៀបចំកម្មវិធីនេះ បានបណ្ដុះភាពក្លាហានដល់យុវជន ហើយតាមរយៈការចូលរួមកម្មវិធីធ្វើឱ្យយុវជនក្មេងៗដឹងថា ទោះជាពួកគេជាសិស្សកម្រិតវិទ្យាល័យក្ដី ប៉ុន្តែពួកគេមានសមត្ថភាពក្នុងការសម្ដែងនៅចំពោះមុខមនុស្សជាច្រើន។ ចំណុចមួយទៀត កាលណាយុវជនមានឱកាសបានចូលរួមកម្មវិធីជជែកដេញដោល នឹងធ្វើឱ្យពួកគាត់លែងនិយាយដោយប្រើអារម្មណ៍ ព្រោះមុននឹងនិយាយ គេនឹងគិតដល់ទិន្នន័យ ឯកសារយោង និងអំណះអំណាង។ ម្យ៉ាងវិញទៀត ដោយសារការចូលរួមកម្មវិធីបែបនេះ ត្រូវឱ្យធ្វើការជាក្រុម ដូច្នេះក៏បានបណ្ដុះស្មារតីរបស់ក្មេងៗឱ្យចេះស្រឡាញ់គ្នា និងយល់ទុក្ខធុរៈគ្នា។

“ឥឡូវនេះ ឱកាសគឺសម្រាប់ទាំងអស់គ្នា ឱកាសមានច្រើនមែនទែន ដូច្នេះយុវជនត្រូវបំពាក់បំប៉ន់សមត្ថភាពឱ្យបានខ្លាំង ហើយស្វែងរកឱកាសចូលរួមកម្មវិធីបែបនេះឱ្យបានច្រើន។”

លោក សំ សុពេជ្រ អ្នកសម្របសម្រួលនៅក្នុងកម្មវិធីជជែកដេញដោលយុវជនថ្នាក់ជាតិឆ្នាំ២០២៣

យុវជន ហេង ច័ន្ទបញ្ញាបុត្រ ជាសិស្សថ្នាក់ទី១២ មកពីសាលាប៊ែលធីអន្តរជាតិ និងជាយុវជនដែលចូលចិត្តវិស័យនិយាយជាសាធារណៈមួយរូប បានបង្ហាញចំណាប់អារម្មណ៍ថា ការចូលរួមទស្សនាកម្មវិធីជជែកដេញដោល ធ្វើឱ្យរូបគេផ្ទាល់ទទួលបានចំណេះដឹងថ្មីៗជាច្រើន ព្រោះអ្នកចូលរួមប្រកួតសុទ្ធតែបានស្រាវជ្រាវលើប្រធានបទនីមួយៗបានស៊ីជ្រៅ ហើយនិយាយប្រកបដោយសិល្បៈ ហេតុផល និងមានអំណះអំណាងជាក់លាក់។ យុវជនរូបនេះបន្ថែមថា ប្រសិនបើកម្មវិធីបែបនេះ បានរៀបចំឱ្យបានទូលំទូលាយនៅតាមបណ្ដាលខេត្តគឺរឹតតែល្អ ព្រោះគេចង់ឃើញយុវជនកម្ពុជាកាន់តែច្រើនមានឱកាសបញ្ចេញសមត្ថភាព ពង្រឹងចំណេះដឹង និងមានបទពិសោធន៍និយាយជាសាធារណៈ។  «ខ្ញុំសូមអំពាវនាវដល់ក្រសួងដែលពាក់ព័ន្ធទាំងអស់ បង្កើតកម្មវិធីនេះឱ្យបានកាន់តែច្រើនកាន់តែល្អ»។

ដោយឡែក យុវតី អ៊ា ណាវីត និង ធន់ ដានី ជាអតីតម្ចាស់ជ័យលាភីកម្មវិធីជជែកដេញដោលឆ្នាំ២០២២ ហើយបច្ចុប្បន្នជានិស្សិតឆ្នាំទី១ បានបង្ហាញការយល់ឃើញថា មិនថាសិស្សនិស្សិតរៀនជំនាញវិទ្យាសាស្ត្រ ឬសង្គមនោះទេ គួរតែស្វែងរកឱកាសចូលរួមកម្មវិធីជជែកដេញដោល ដើម្បីពង្រឹងជំនាញទន់របស់ខ្លួនឱ្យកាន់តែប្រសើរឡើង។ ជាក់ស្ដែង ត្បិតថារូបគេទាំងពីរ ជាអតីតជ័យលាភីជជែកដេញដោលថ្នាក់ជាតិក៏ពិតមែន ប៉ុន្តែពួក​គេបានជ្រើសរើសជំនាញវិទ្យាសាស្រ្ត នៅពេលបន្តការសិក្សាថ្នាក់សាកលវិទ្យាល័យ ហើយតាមរយៈបទពិសោធន៍នៃការចូលរួមជជែកដេញដោលធ្វើឱ្យពួកគេមានភាពក្លាហានជាងមុន ជាពិសេស​ក្នុងការប្រាស្រ័យទាក់ទង។ ដូច្នេះ យុវជនឯទៀត គួរតែស្វែងរកឱកាសចូលរួមកម្មវិធីបែបនេះ ឱ្យបានច្រើន ដើម្បីអភិវឌ្ឍខ្លួន និងបង្កើនចំណេះដឹងទាក់ទងនឹងការនិយាយ។ ចំណែករឿងលទ្ធផលចាញ់ ឬឈ្នះគឺជារឿងធម្មតា សម្រាប់ការប្រកួត។

គួរបញ្ជាក់ផងដែរថា កម្មវិធីជជែកដេញដោលថ្នាក់ជាតិ​បានរៀបចំនួន ៣រដូវកាលរួចមកហើយ។ ចំណែកឆ្នាំ ២០២៣នេះ គឺជារដូវកាលទី៤ អ្វីដែលរឹតតែពិសេសនោះគឺ ក្រសួងបានពង្រីកកម្មវិធីឱ្យមានការប្រកួតនិយាយជាសាធារណៈបន្ថែមទៀត ដើម្បីផ្ដល់ឱកាសឱ្យយុវជនបញ្ចេញសមត្ថភាព។ សកម្មភាពនេះ គឺជាសកម្មភាពឆ្លើយតបទៅនឹងកំណែទម្រង់ស៊ីជម្រៅរបស់ក្រសួង ដើម្បីដុសខាត់យុវជនឱ្យក្លាយជាធនធានមនុស្សប្រកបដោយសក្តានុពល៕