ភ្នំពេញ – ក្រោយ​ការ​ប្រកួត​ជម្រុះជាបន្តបន្ទាប់ ទីបំផុតទៅ ក្រសួងអប់រំ យុវជន និង​កីឡា បានរកឃើញបេក្ខជន​ចំនួន២ក្រុម ដើម្បីទៅ​កាន់ការ​ប្រកួត​វគ្គផ្តាច់ព្រ័ត្រ នៃកម្មវិធីជជែកដេញដោលយុវជន​ថ្នាក់ជាតិ​រដូវកាលទី៤ ឆ្នាំ​២០២៣ ដែល​គ្រោងប្រព្រឹត្ត​ទៅនៅ​ថ្ងៃទី១២ ខែសីហា ឆ្នាំ​២០២៣ខាងមុខ ក្រោមប្រធានបទ «ឥទ្ធិពលនៃបច្ចេកវិទ្យាបញ្ញាសិប្បនិម្មិត AI គឺជាកត្តាគន្លឹះដល់អនាគតភាពនៃវិស័យអប់រំនៅកម្ពុជា»។

យុវជន​ចំនួន២ក្រុម ដែលឈានទៅ​ដល់​ការ​ប្រកួតវគ្គផ្តាច់ព្រ័ត្រ គឺយុវជន​មក​ពីសាលាបញ្ញាសាស្រ្តអន្តរជាតិខេត្តបាត់ដំបង និង​ក្រុមយុវជន​មក​ពី​សាលា​ចំណេះដឹងទូទៅ មីគីវ៉េ រាជធានីភ្នំពេញ ក្រោយ​ពីពួកគេ​បានឈ្នះ​ក្រុមយុវជន​ពីរក្រុមផ្សេង​ទៀត​នៅ​ក្នុង​វគ្គពាក់កណ្តាលផ្តាច់ព្រ័ត្រកាលពីចុងសប្តាហ៍​កន្លងទៅនេះ នៅ​មជ្ឈមណ្ឌល​ម៉ានី រាជធានីភ្នំពេញ ។

លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្រសួងអប់រំ យុវជន និងកីឡា មានប្រសាសន៍ថា សម្រាប់កម្មវិធីប្រកួតជជែកដេញដោលយុវជន​ថ្នាក់​ជាតិ​នៅឆ្នាំនេះ គឺខុសប្លែកពីឆ្នាំមុនៗ ដោយ​ក្រៅពីកម្មវិធីជជែកដេញដោលយុវជនជាក្រុម ដែលបានបើកចំហរយ៉ាងទូលាយសម្រាប់យុវជនមកពី២៥រាធានីខេត្ត ក្រសួងក៏បានបញ្ចូលកម្មវិធីវោហាស័ព្ទឆ្នើមមួយទៀតក្នុងរបៀបវារៈ ដែលជាកម្មវិធីនិយាយជាសាធារណៈសម្រាប់យុវជន។

លោកជំទាវ ស្រូយ សុជាតិ

“កម្មវិធីជជែកដេញដោល នឹងធ្វើឱ្យយុវជន ចេះដាក់ទ្រឹស្តីក្នុងការអនុវត្តជាក់ស្ដែង ហើយអាចត្រៀមខ្លួនបានល្អ ដើម្បីប្រឡូកក្នុងសង្គម។”

លោកជំទាវបានបញ្ជាក់ថា មិនថាសិស្សមកពីសាលារដ្ឋ ឯកជននោះទេ គឺសុទ្ធតែជាសិស្សានុសិស្សរបស់កម្ពុជា ដែលជាកោសិកាដ៏សំខាន់សម្រាប់សង្គម។ ដូច្នេះ គោលនយោបាយរបស់ក្រសួង គឺប្រមូលផ្ដុំប្អូនៗទាំងអស់ឱ្យមានឱកាសស្មើៗគ្នា។ លើសពីនេះ លោកជំទាវបានបង្ហាញការអរគុណចំពោះ គ្រប់ភាគីពាក់ព័ន្ធ ដែលមានលោកគ្រូអ្នកគ្រូ អាណាព្យាបាលសិស្ស និងវិស័យឯនជន ដែលបានចូលរួមយ៉ាងសកម្មភាព ក្នុងជំរុញឱ្យកម្មវិធីនេះ មានការដំណើរការទៅដោយរលូន។

យុវជន សាលាវ ខៃស៊ីង តំណាងក្រុមវិទ្យាល័យហ៊ុនសែន កំពង់សិលា និង យុវជន សៀ សាក់ តំណាងក្រុម វិទ្យាល័យ ស្វាយលើ បានបង្ហាញចំណាប់អារម្មណ៍ថា បើទោះជាក្រុមខ្លួន​មិនមានឱកាសបន្តដំណើរទៅកាន់វគ្គផ្ដាច់ព្រ័ត្រ ប៉ុន្តែពួកគេទទួលបានបទពិសោធន៍ និងចំណេះដឹងជាច្រើនពីកម្មវិធី ជាពិសេសគឺការបង្កើនភាពក្លាហាន និងការបំពេញការងារជាក្រុម។ លើសពីនេះ ពួកគេពិតជាកោតសរសើរចំពោះសមត្ថភាពបេក្ខជនមកពីគ្រប់ក្រុមទាំងអស់ ដោយមានទាំងភាពក្លាហាន ការយល់ដឹង ការគិត ការនិយាយ និងការត្រៀមខ្លួន។ យុវជន សៀ សាក់ លើកឡើងថា «ការឈានមកដល់វគ្គពាក់កណ្ដាលផ្ដាច់ព្រ័ត្រគឺជា មោទនភាពយ៉ាងធំធេង​សម្រាប់ខ្ញុំ និងក្រុម។»

ចំណែក យុវតី មន សុធម្មបញ្ញា តំណាងក្រុមសាលាបញ្ញាសាស្ត្រអន្តរជាតិ ខេត្តបាត់ដំបង និងយុវតី ហួ លីហ័រ តំណាងក្រុម សាលាចំណេះដឹងទូទៅ មីគីវ៉េ រាជធានីភ្នំពេញ ដែលនឹងត្រូវបន្តដំណើរទៅកាន់វគ្គផ្ដាច់ព្រ័ត្រ បានបង្ហាញភាពរីករាយ និងមោទនភាពដែលទទួលភាពជោគជ័យក្នុងវគ្គនេះ។ ពួកគេ​លើកឡើងដូចៗគ្នាថា បើទោះជាមានឧបសគ្គខ្លះៗក្ដី ក៏ក្រុមពួកគេនៅតែបន្តដំណើរ។ ក្រៅពីនេះ យុវតីទាំងពីររូប ក៏​ចង់ឃើញយុវជនកម្ពុជា មានភាពផុសផុលកាន់តែខ្លាំងក្នុងការចូលរួមកម្មវិធី ជជែកដេញដោលផ្សេងៗ ដើម្បីពង្រឹងសមត្ថភាព។

យុវតី ហួ លីហ័រ

“ខ្ញុំចង់ឃើញយុវជនខ្មែរមានការចូលរួមគ្រប់កម្មវិធី មិនមែនតែកម្មវិធីជជែកដេញដោលនោះទេ ព្រោះគ្រប់កម្មវិធីសុទ្ធតែល្អ សម្រាប់ការពង្រឹងចំណេះដឹង និងសមត្ថភាព ដែលធ្វើឱ្យពួកគាត់ក្លាយជាសសរទ្រូងប្រទេសជាតិ។”

សូមជម្រាបជូនថា កម្មវិធីជជែកដេញដោលយុវជនថ្នាក់ជាតិ២០២៣ បានចាប់ផ្តើម​ការប្រកួតតាំងពីថ្ងៃទី១១ ខែមីនា ដោយមានការចូលរួមពីវិទ្យាល័យចំនួន ៣២ មកពី២៥រាជធានីខេត្ត។ ការរៀបចំកម្មវិធីនេះ គឺក្នុង​គោលបំណងបណ្ដុះបណ្ដាលយុវជនកម្ពុជា ឱ្យចេះប្រើវប្បធម៌សន្ទនា ហ៊ានដោះស្រាយបញ្ហាតាមរយៈការជជែកដេញដោល ព្រមទាំងជំរុញឱ្យយុវជនឱ្យ​ចេះប្រើប្រាស់សិទ្ធិក្នុងការបញ្ចេញមតិ ដោយភាពឈ្លាសវៃ និងស្មារតីវិជ្ជមាន ពង្រឹងជំនាញត្រិះរិះពិចារណា ការសិក្សាស្រាវជ្រាវ ការចែករំលែកគំនិត និងជំនាញនិយាយជាសាធារណៈ ដើម្បីឱ្យធនធានយុវជនកម្ពុជា ក្លាយជាមូលធនមនុស្សសម្រាប់សង្គមជាតិ៕