ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា គ្រោងនឹងសម្ពោធដាក់ឱ្យប្រើប្រាស់បណ្ដាញសាកលវិទ្យាល័យសាយប័រកម្ពុជា (ប.ស.ស.ក) នៅខែមិថុនាខាងមុខ ដោយគេរំពឹងថា បណ្ដាញសាកលវិទ្យាល័យនេះ នឹងរួមចំណែកកាត់បន្ថយគម្លាតរវាងសាកលវិទ្យាល័យនៅរាជធានីភ្នំពេញ និងតាមបណ្តាខេត្តនានា ក៏ដូចជាលើកកម្ពស់គុណភាពអប់រំ។
លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា មានប្រសាសន៍ថា បណ្ដាញសាកលវិទ្យាល័យសាយប័រកម្ពុជានេះ គឺជាកម្មវិធីមួយដែលបានរៀបចំឡើងថាតាមរយៈអនុក្រឹត្យដែលចេញនៅក្នុងថ្ងៃទី១៤ ខែមករា ឆ្នាំ២០២២ នៅក្នុងទិសដៅកែលម្អគុណភាព និងសមធម៌នៃការអប់រំកម្រិតឧត្តមសិក្សា ក្នុងការកសាងសេដ្ឋកិច្ច និងលើកកម្ពស់សុខុមាលភាពសង្គមផ្អែកលើចំណេះដឹង។
បើតាមលោកស្រីបណ្ឌិត ឃួន វិច្ឆិកា បណ្តាញសាកលវិទ្យាល័យសាយប័រ គឺមានការចូលរួមពីសាកលវិទ្យាល័យនានានៅក្នុងប្រទេសកម្ពុជា រួមមាន វិទ្យាស្ថានបច្ចេកវិទ្យាកម្ពុជា, សាកលវិទ្យាល័យភូមិន្ទភ្នំពេញ, សាកលវិទ្យាល័យស្វាយរៀង, សាកលជាតិបាត់ដំបង, សាកលវិទ្យាល័យហេងសំរិនត្បូងឃ្មុំ និងសាកលវិទ្យាល័យភូមិន្ទកសិកម្មជាដើម។ លោកស្រីបន្តថា កិច្ចការសំខាន់របស់បណ្តាញសាកលវិទ្យាល័យសាយប័រ គឺ ការរៀបចំការរៀន និងបង្រៀនតាមប្រព័ន្ធអនឡាញ ឬប្រព័ន្ធឌីជីថល ជាទម្រង់ (Platform) មួយសម្រាប់និស្សិតទាំងអស់អាចចូលរួមទទួលបានចំណេះដឹង និងរៀនតាមប្រព័ន្ធឌីជីថលនេះ ហើយសាកលវិទ្យាល័យដែលពាក់ព័ន្ធនឹង ថតជាវីដេអូបង្រៀន និងរៀនផ្សេងទៀតដើម្បីដាក់ចូលទៅក្នុងទម្រង់ (Platform) នោះ។
នៅតាមសាកលវិទ្យាល័យនៅតាមទីក្រុងភ្នំពេញ និងសាកលវិទ្យាល័យដែលពាក់ព័ន្ធនានា នឹងធ្វើការថតជាវីដេអូលើមុខជំនាញនានាហើយដាក់នៅក្នុងប្រព័ន្ធអនឡាញ ហើយសិស្សានុសិស្សដែលពាក់ព័ន្ធនឹងមុខវិជ្ជាដែលគាត់រៀនអាចចូលរួមទទួលបានចំណេះដឹងនេះឡើង
លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា
តាមអ្នកនាំពាក្យក្រសួងអប់រំ បណ្ដាញសាកលវិទ្យាល័យសាយប័រកម្ពុជា នឹងជួយពង្រឹងការបណ្ដុះបណ្ដាល ពង្រឹងសមត្ថភាពក៏ដូចជាការអប់រំគ្រប់ទិសទីនៅសាកលវិទ្យាល័យឱ្យមានលក្ខណៈល្អប្រសើរ និងមានភាពស្មើគ្នា (សមភាព)។ ទន្ទឹមគ្នានេះ នៅក្នុងការអនុវត្តមានការផ្ទេរក្រេឌីត ដោយក្នុងពេលបច្ចុប្បន្នក្រួងអប់រំ កំពុងសិក្សានិងរៀបចំ ដើម្បីឱ្យមានការផ្ទេរក្រេឌីតរវាងសាកលវិទ្យាល័យនៅកម្ពុជា ហើយដំណាក់កាលបន្ទាប់ឈានដល់ការទទួលស្គាល់ការផ្ទេរក្រេឌីតក្នុងតំបន់ និងពិភពលោកផងដែរ។
បើតាមក្រសួងអប់រំ យុវជន និងកីឡា ឱ្យដឹងថា បណ្ដាញសាកលវិទ្យាល័យសាយប័រកម្ពុជា ត្រូវបានរៀបចំឡើងក្នុងគោលបំណងកែលម្អគុណភាព និងសមធម៌នៃការអប់រំឧត្តមសិក្សា ដើម្បីកសាងសេដ្ឋកិច្ច និងលើកកម្ពស់សុខុមាលភាពសង្គមផ្អែកលើចំណេះដឹង ដោយក្រសួងអប់រំ យុវជន និងកីឡា បានដាក់ចេញនូវ “កម្មវិធីវិនិយោគសាធារណៈអនុវិស័យឧត្តមសិក្សា ២០២២-២០២៣ ស្តីពីបណ្ដាញសាកលវិទ្យាល័យសាយប័រកម្ពុជា” នៅខែមិថុនា ឆ្នាំ២០២២។ ជាមួយគ្នានេះ ដើម្បីអាចវាស់ផលសម្រេច នៃវត្ថុបំណងកម្មវិធីវិនិយោគនេះ មានសូចនាករវត្ថុបំណងអភិវឌ្ឍន៍កម្មវិធីវិនិយោគ ចំនួន០៣ ដូចជា៖ (សូចនាករ ១). ចំនួនមុខវិជ្ជាដែលបានដាក់ឱ្យប្រើប្រាស់ក្នុងកម្មវិធីបណ្ដាញសាកលវិទ្យាល័យសាយប័រ (សូចនាករ ២). ចំនួនកម្មវិធីសិក្សាបរិញ្ញាបត្រដែលអនុវត្តកម្មវិធីបណ្ដាញសាកលវិទ្យាល័យសាយប័រ និង (សូចនាករ ៣). ចំនួនគ្រឹះស្ថានដែលមាន និងដំណើរការហេដ្ឋារចនាសម្ព័ន្ធសាកលវិទ្យាល័យសាយប័រ៕
