រដ្ឋមន្រ្តីក្រសួងបរិស្ថាន ឯកឧត្តម អ៊ាង សុផល្លែត បានឱ្យដឹងថា ក្រោយ​ពី​ក្រសួងបើកយុទ្ធនាការ «ថ្ងៃនេះ ខ្ញុំ​មិន​ប្រើប្រាស់ថង់ប្លាស្ទិកទេ» ​​មាន​ប្រជាពលរដ្ឋ និង​សិស្សា​នុសិស្ស​ជាង​៨លាននាក់ ដែល​ស្មើ​នឹង​ជាង​ពាក់​កណ្តាល​នៃចំនួន​ប្រជាពលរដ្ឋ​សរុប បានចូលរួម​កាត់បន្ថយ​ការ​ប្រើប្រាស់​ថង់ប្លាស្ទិក​ក្នុង​ថ្ងៃ​ប្រមាណជាង ៣០លានថង់។

ឯកឧត្តម អ៊ាង សុផល្លែត បានថ្លែងថា នេះ​គឺជា​ជោគជ័យ​រួម​របស់​កម្ពុជា ក្រោយ​ត្រឹម​រយៈពេលជាង ៨ខែប៉ុណ្ណោះ កម្ពុជា​អាចកាត់បន្ថយ​ថង់ប្លាស្ទិក​បាន​យ៉ាង​ច្រើន​សន្ធឹក​សន្ធាប់ តាមរយៈ​សាមគ្គីភាព និង​ការ​ចូលរួម​ពីសំណាក់​ប្រជាពលរដ្ឋ អាជ្ញាធរ​មូលដ្ឋាន ព្រះសង្ឃ កម្មករ កម្មការិនី លោកគ្រូ អ្នកគ្រូ និង​សិស្សានុសិស្ស។

ជាមួយគ្នានេះ ឯកឧត្តម​រដ្ឋមន្រ្តី​ក៏​បានរំលេចថា ការសម្រេចបានលើសពីការរំពឹងទុកនេះ គឺបានមកពីកត្តាចំនួន៣ចំណុច ក្នុងនោះរួមមាន ផ្ទៃក្នុងរបស់ក្រសួងបរិស្ថានដែលមានថ្នាក់ដឹកនាំ និងមន្រ្តីរាជការទាំងអស់ ចំណែកខាងក្រៅវិញ គឺបានមកពីការយកចិត្តទុកដាក់ និងរួមចំណែកពីស្ថាប័នពាក់ព័ន្ធគ្រប់លំដាប់ថ្នាក់ ជាពិសេសសិស្សានុសិស្ស និងប្រជាពលរដ្ឋកម្ពុជា ហើយចំណុចទី៣ គឺជាការទទួលស្គាល់ពីអន្តរជាតិថា ខ្មែរស្អាត ខ្មែរធ្វើបាន នេះហើយជាមោទនភាពរបស់កម្ពុជាលើឆាកអន្តរជាតិ ដើម្បីសម្រេចបានជោគជ័យជាបន្តបន្ទាប់ទៀត ចាំបាច់ត្រូវតែមានសុទិដ្ឋិនិយមជានិច្ច ហើយសុទិដ្ឋនិយមនេះ គឺជាមាគ៌ាឆ្ពោះទៅកាន់ភាពជោគជ័យស្របតាមយុទ្ធសាស្រ្តចក្រា ដែលមានភាពសាមញ្ញ ងាយយល់ ងាយធ្វើ និងអាចពង្រីកទៅមុខបានយូរអង្វែង។

បើតាម​ក្រសួងបរិស្ថាន បទពិសោធន៍ជោគជ័យនៃយុទ្ធនាការ «ថ្ងៃនេះ ខ្ញុំមិនប្រើប្រាស់ថង់ប្លាស្ទិកទេ» ដែលបានកាត់បន្ថយប្លាស្ទិកក្នុង១ថ្ងៃជាង ៣០លានថង់នេះ ក្រសួងក៏បានដាក់ចេញនូវយុទ្ធនាការជាបន្តបន្ទាប់ដូចជា យុទ្ធនាការ ដាំដើមឈើយ៉ាងតិច ១លានដើម នៅថ្ងៃទី ១០ តុលា ឆ្នាំ២០២៣, យុទ្ធនាការផ្ទៃមេឃពណ៌ខៀវ ១៥ វិច្ឆិកា ឆ្នាំ២០២៣, យុទ្ធនាការសំអាតបឹងទន្លេសាប នៅថ្ងៃទី០១ ខែមីនា ឆ្នាំ២០២៤ និងយុទ្ធនាការ «កម្ពុជាស្អាត ខ្មែរធ្វើបាន» ដែលប្រកាស​នៅ​ថ្ងៃទី១៥ ខែឧសភា ឆ្នាំ២០២៤ ដើម្បីឆ្ពោះទៅយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ដែលមានយុទ្ធសាស្រ្តចក្រាវិស័យបរិស្ថានជាត្រីវិស័យតម្រង់ទិស៕