ក្នុង​ឱកាស​ចូលរួម​សន្និសីទវិទ្យាសាស្រ្ត​ថ្នាក់ជាតិលើកទី៩ នៅសាកលវិទ្យាល័យ​ជាតិ​មានជ័យ កាលពីដើមសប្តាហ៍​នេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានជំរុញ​ដល់​អ្នកស្រាវជ្រាវ ស្វែង​រក​ដំណោះស្រាយល្អៗ ដើម្បីឆ្លើយតបទៅនឹងបញ្ហាប្រឈមនៃការប្រែប្រួលអាកាសធាតុ និងការប្រកួតប្រជែងសេដ្ឋកិច្ចសកល ក៏​ដូចជា ធ្វើវិវត្តកម្មកសិកម្មដែលមានជំនួយពីបច្ចេកវិទ្យា និង AI។

សន្និសីទវិទ្យាសាស្រ្ត​ថ្នាក់ជាតិលើកទី៩ នឹង​ប្រព្រឹត្ត​ទៅ​រយៈពេល​២ថ្ងៃ ចាប់ពីថ្ងៃទី១ ដល់ថ្ងៃទី២ ខែធ្នូ ឆ្នាំ២០២៥ ក្រោមប្រធានបទ “ឧត្តមភាពបច្ចេកវិទ្យាកសិកម្ម ដើម្បីចីរភាពសេដ្ឋកិច្ចសង្គម និងបរិស្ថាន” ដោយ​មានសាកលវិទ្យាល័យ និងវិទ្យាស្ថានចំនួន១៤ចូលរួម ព្រមជាមួយ​​អត្ថបទស្រាវជ្រាវ ចំនួន៣២៤អត្ថបទ ផ្តោតលើ បច្ចេកវិទ្យាកសិកម្ម ដើម្បីចីរភាពសេដ្ឋកិច្ចសង្គម និងបរិស្ថាន។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា វិស័យកសិកម្ម បានដើរតួនាទីយ៉ាងសំខាន់ក្នុង​ការកាត់​បន្ថយភាព​ក្រីក្រនៅកម្ពុជា ហើយគោលដៅរបស់យើងគឺប្រែក្លាយកសិកម្មប្រពៃណី ទៅជា «កសិកម្មវៃឆ្លាត» ដែលមានផលិតភាពខ្ពស់ និងភាពម្ចាស់ការ។ តែយ៉ាងណា​ដើម្បីសម្រេចគោលដៅនេះ គឺត្រូវទាមទារ​នូវការពង្រីកដីដាំដុះ តាមរយៈការកែច្នៃចម្ការមីនទៅជាដីកសិកម្មប្រកបដោយសុវត្ថិភាព។ បង្កើនទិន្នផល និងគុណភាព តាមរយៈការផលិតពូជស្រូវដែលផ្តល់គុណភាពខ្ពស់ និងការប្រើប្រាស់ជីឱ្យបានត្រឹមត្រូវតាមបច្ចេកទេស។ ប្រើប្រាស់បច្ចេកវិទ្យាទំនើប ដូចជាការប្រើប្រាស់គ្រឿងយន្តកសិកម្ម ការប្រើប្រាស់ Drone សម្រាប់តាមដានស្ថានភាពដី និងការអនុវត្តកសិកម្មសុក្រិត។

បន្ថែមលើនេះ ឯកឧត្តមរដ្ឋមន្រ្តីបានផ្តល់អនុសាសន៍​បន្ថែម ដោយថា ដើម្បីអភិវឌ្ឍផ្នែកកសិកម្ម កម្ពុជាត្រូវផ្តោតទៅលើការបម្រែបម្រួលអាកាសធាតុដើម្បីរៀបចំការងារកសិកម្មឱ្យបានសមស្រប ការអនុវត្តយន្តការឧស្សហកម្ម ៤.០ ការពង្រីកផ្ទៃដីកសិកម្ម ការវិនិយោគផ្នែកកសិកម្ម ស្វែងរកនិងបង្កើតទីផ្សារកសិកម្ម ការគាំទ្រដល់កសិកម្មតាមសហគមន៍ អេកូទេសចរណ៍ ការធ្វើវិវត្តកម្មកសិកម្មដែលមានជំនួយពីបច្ចេកវិទ្យា និង AI។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរ និងថ្លែងអំណរគុណចំពោះថ្នាក់ដឹកនាំ សាស្ត្រាចារ្យ និងសហគមន៍អ្នកស្រាវជ្រាវទាំងអស់ ដែលបានចូលរួម​ចំណែកយ៉ាងសកម្មក្នុងការប្រែក្លាយសន្និសីទនេះ ទៅជាកម្លាំងចលករជំរុញការអភិវឌ្ឍវិស័យកសិកម្ម និងការអប់រំនៅកម្ពុជា និងជឿជាក់ថា តាមរយៈការប្រមូលផ្តុំអ្នកស្រាវជ្រាវ និងការចែករំលែកបទពិសោធក្នុងសន្និសីទនេះ នឹងអាច​រកឃើញ​ដំណោះស្រាយល្អៗ ដើម្បីឆ្លើយតបទៅនឹងបញ្ហាប្រឈមនៃការប្រែប្រួលអាកាសធាតុ និងការប្រកួតប្រជែងសេដ្ឋកិច្ចសកល និងត្រូវបន្តជំរុញការបោះពុម្ពផ្សាយឯកសារសិក្សាស្រាវជ្រាវ ដើម្បីផ្សព្វផ្សាយចំណេះដឹង និងបច្ចេកទេស ទៅដល់ប្រជាពលរដ្ឋ ដើម្បីឱ្យបន្តកែលម្អជីវភាពរស់នៅរបស់ពួកគាត់ និងកាត់បន្ថយភាពក្រីក្រ៕