លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់ទូរទស្សន៍អប្សរាថា មានអតីតពលករខ្មែរដែលត្រឡប់មកពីប្រទេសថៃជាង ១ម៉ឺននាក់បានចុះឈ្មោះចូលរៀនជំនាញវិជ្ជាជីវៈដោយឥតគិតថ្លៃ ដែលផ្តល់ដោយរាជរដ្ឋាភិបាល។

” ពលករដែលមកពីថៃប្រមាណជាង១ម៉ឺននាក់ហើយ ដែលបានចុះឈ្មោះចូលរៀននៅសាលាបណ្ដុះបណ្ដាលបច្ចេកទេសវិជ្ជាជីវៈរបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលជាការសិក្សាដោយឥតគិតថ្លៃ ដើម្បីជួយបងប្អូនអតីតពលកររបស់យើងឲ្យមានជំនាញ និងចំណេះដ៏ពិតប្រាកដមួយ”

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ

រាជរដ្ឋាភិបាលបានបង្កើតកម្មវិធីបណ្តុះបណ្តាលជំនាញវិជ្ជាជីវៈសម្រាប់យុវជនកម្ពុជា ពិសេសពលរដ្ឋមកពីគ្រួសារក្រីក្រ សរុបចំនួន ១លាន ៥សែននាក់ សម្រាប់រយៈពេល ៥ឆ្នាំ គិតចាប់ពីឆ្នាំ ២០២៣។

វិស័យអាទិភាពទាំង១០ ដែលត្រូវបណ្តុះបណ្តាលរួមមាន សំណង់, អគ្គិសនី និងថាមពល, អេឡិចត្រូនិក, បរិក្ខារត្រជាក់និងកម្ដៅ, កម្មន្តសាល, មេកានិកទូទៅ មេកានិករថយន្ត, ទេសចរណ៍, សេវាកម្ម, កសិកម្ម និងកសិ-ឧស្សាហកម្ម, ធុរកិច្ច និងព័ត៌មានវិទ្យា។

យោងតាម លោក ស៊ុន មេសា អតីតពលករខ្មែរ បានចាប់យកជំនាញក្នុងវិស័យសំណង់ច្រើនជាងគេ ដោយសារពួកគេធ្លាប់ធ្វើការងារនេះពេលកំពុងបំពេញការងារនៅប្រទេសថៃ។

ជម្លោះព្រំដែនកម្ពុជា-ថៃ បានបង្ខំចិត្តឱ្យ​ពលករខ្មែរដែលធ្វើការងារនៅប្រទេសថៃប្រមាណជាង ៩០ម៉ឺននាក់បានវិលត្រឡប់មកកម្ពុជាវិញ។ លោក ស៊ុន មេសា បញ្ជាក់ថា ក្នុងចំណោមពលករដែលត្រឡប់ពីប្រទេសថៃទាំងអស់ ក្នុងនោះមានប្រមាណ ៤៥ម៉ឺននាក់ទទួលបានការងារធ្វើនៅកម្ពុជា។

បើតាមអ្នកនាំពាក្យក្រសួងការងារ គិតមកទល់ពេលនេះ មានអ្នកចុះឈ្មោះចូលរៀនជំនាញវិជ្ជាជីវៈសរុបចំនួន ១៤២ ៩៧៥នាក់ ក្នុងនោះសិស្សចំនួន ៦៣ ៦២៧នាក់ បាន​បញ្ចប់ការ​សិក្សា​។

អតីតពលករខ្មែរដែលត្រឡប់មកពីប្រទេសថៃ ដែលមកស្វែងរកងារការធ្វើនៅរាជធានីភ្នំពេញ ធ្លាប់បានប្រាប់ទូរទស្សន៍អប្សរាថា ពួកគេក៏ចង់រៀនជំនាញវិជ្ជាជីវៈដែរ ប៉ុន្តែពួកគេខ្វះព័ត៌មានអំពីការសិក្សា និងរៀនជំនាញនេះ និងខ្លះទៀតចង់រៀនជំនាញដែរ ប៉ុន្តែដោយសារបញ្ហាជីវភាពប្រចាំថ្ងៃក្នុងការរកប្រាក់ចិញ្ចឹមគ្រួសារ ទើបពួកគេមិនអាចមករៀនបាន៕

អត្ថបទ៖ សេង បារាំង