ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គ្រូបង្រៀននៃបណ្តាញសាលារៀនវ៉េស្ទឡាញន៍ សាលារៀនណត្សឡាញន៍ និងសាលារៀនសហគមន៍២១ កាលពីពេលថ្មីៗកន្លងទៅនេះបានទទួលការបណ្តុះបណ្តាលពីអ្នកជំនាញមកពីប្រទេសកាណាដា ទៅលើចំណេះដឹងពាក់ព័ន្ធការអប់រំពិសេស។
លោកស្រី អ៊ុក សូនីតា នាយិកាសិក្សាធិការនៃបណ្តាញគ្រឹះស្ថានអប់រំ វេសឡាញ គ្រុប មានប្រសាសន៍ថា ការបណ្តុះបណ្តាលដែលធ្វើឡើងតាមរយៈសិក្ខាសាលា Mental Health Literacy កាលពីថ្ងៃទី២៤ មករា បានផ្តល់ជាទុន ក៏ដូចជាចំណេះដឹងទៅដល់លោកគ្រូអ្នកគ្រូនៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ទៅលើព័ត៌មានពាក់ព័ន្ធជាមួយនឹងប្រភេទ នៃការអប់រំបែបពិសេស ដែលមានដូចជា ADHD និង អូទីហ្សឹម, ពីលក្ខណៈនៅក្នុងការសម្គាល់ នូវអ្វីដែលអាចកើតឡើងចំពោះកុមារដែលមានបញ្ហា ADHD ហើយក៏ដូចជាកុមារដែលមានបញ្ហាអូទីហ្សឹម។
ជាមួយគ្នា អ្នកជំនាញក៏បានបង្ហាញពីការសម្គាល់ចំពោះកុមារដែលមានបញ្ហា ADHD និងអូទីហ្សឹម ដោយធ្វើការបង្ហាញទាក់ទងនឹងកម្រងសំណួរមួយចំនួន ដែលលោកគ្រូអ្នកគ្រូអាចធ្វើការវិភាគជាមួយកុមារដែលនឹងចូលរៀន ឬក៏កំពុងរៀននៅបណ្តាញសាលារៀន ដើម្បីអាចជួយគាំទ្រពួកគាត់ឱ្យបានទាន់ពេលវេលា។
បើតាមលោកស្រី សូនីតា តាមរយៈការធ្វើបទបង្ហាញពីអ្នកជំនាញ លោកគ្រូអ្នកគ្រូទទួលបានចំណេះដឹងជាច្រើន ដែលអាចជួយគាំទ្របន្ថែមដល់កុមារដែលមានបញ្ហា ADHD ក៏ដូចជាអូទីហ្សឹម ក្នុងការជួយពួកគេអាចរៀនសូត្រជាមួយកុមារធម្មតា ហើយមានការរីកចម្រើនទៅលើការប្រាស្រ័យទាក់ទង ក៏ដូចជារៀននៅសាលាដែលតម្រូវឱ្យមានការអប់រំពិសេស៕
