ក្រោយ​បញ្ចប់ថ្នាក់វិទ្យាល័យ​ ការជ្រើសរើស​ជំនាញ អាចជារឿងពិបាកមួយ​សម្រាប់​សិស្សានុសិស្ស។ កន្លងទៅមានយុវជនខ្លះសម្រេចចិត្តជ្រើសរើស​ជំនាញដែលខ្លួនស្រឡាញ់ ប៉ុន្តែមានយុវជនខ្លះទៀត បែរជាសម្រេចចិត្តជ្រើសរើសជំនាញ​សិក្សាតាម​មិត្តភក្តិ ឬតាមឪពុកម្តាយរៀបចំទៅវិញ។ ដូច្នេះ តើការជ្រើសរើសជំនាញសិក្សាតាមចិត្តខ្លួនឯង ឬតាម​បំណង​អាណាព្យាបាល មួយណាជាជម្រើស​ដ៏ល្អ?

លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជា មានប្រសាសន៍ថា សម្រាប់ការជ្រើសរើសជំនាញសិក្សាបន្តនៅថ្នាក់មហាវិទ្យាល័យ សិស្សានុសិស្សគួរសម្រេចចិត្តជ្រើសរើសជំនាញដែលស្របតាមឧបនិស្ស័យខ្លួនឯង ដោយ​មានន័យថា ស្របតាមចំណង់ចំណូលចិត្ត និងទេពកោសល្យរបស់ខ្លួន។

បើតាមអគ្គលេខាធិការ នៃរាជបណ្ឌិត្យសភាកម្ពុជា បន្ថែមថា ពលរដ្ឋទាំងអស់ យុវជនទាំងអស់ទោះរៀនមុខជំនាញអ្វីក៏សំខាន់ដែរ ឱ្យតែស្របតាមឧបនិស្ស័យរបស់ខ្លួន ស្របនឹងសមត្ថភាពរបស់ខ្លួន ហើយប្រឹងរៀនឱ្យពូកែ នោះសង្គមមិនអាចបោះបង់អ្នកចេះទេ ហើយការងារនឹងរត់មករកមនុស្សដែលពូកែ។

“ការសិក្សារៀនសូត្រ ទៅលើមុខវិជ្ជានីមួយៗ ចាំបាច់ត្រូវរៀនឱ្យប្រាកដប្រជា រៀនឱ្យខ្លាំង មិនមែនរៀនឱ្យតែរួចខ្លួន យកតែសញ្ញាបត្រឱ្យតែចប់ឆ្នាំ នោះហើយជារឿងដែលខាតបង់”

លោកបណ្ឌិត យង់ ពៅ បន្ថែមថា ការជ្រើសរើសជំនាញសិក្សា ត្បិតតែត្រូវការតម្រង់ទិសពីអ្នកមានបទពិសោធន៍ ដូចជាគ្រួសារ ឪពុកម្ដាយ និងគ្រូបង្រៀន ប៉ុន្តែក៏​ត្រូវ​ការតម្រង់ទិសទាំងអស់នោះ ត្រូវតែស្របតាមឧបនិស្ស័យ និងសំណង់ចំណូលចិត្ត និងសមត្ថភាពរបស់មនុស្សម្នាក់ៗ។ លោកបណ្ឌិតលើកទឹកចិត្តសិស្សនុសិស្ស ត្រូវរៀននូវជំនាញដែលខ្លួនចង់រៀន រៀនឱ្យពូកែបំផុត មិនថាអ្នកណានិយាយអំពីជំនាញដូចម្ដេចក្តី ព្រោះពេលយើងពូកែ បើមិនមានការងារធ្វើ ក៏យើងអាចបង្កើតការងារធ្វើដោយខ្លួនឯងបានដែរ។

សម្រាប់ លោក ភាព សុភ័ក អនុបណ្ឌិតភាសាអង់គ្លេស និងជាអតីតសិស្សនិទ្ទេស A លើកឡើងថា សម្រាប់ការជ្រើសរើសជំនាញ សិស្សានុសិស្សត្រូវរៀនស្វែងយល់ពីខ្លួនឯងថា ស្រឡាញ់ជំនាញអ្វី ហើយចង់ធ្វើការបែបណា? បើតាមលោក សុភ័ក សិស្សានុសិស្សមិនត្រឹមតែគិតអំពីជំនាញដែលខ្លួនចង់រៀនប៉ុណ្ណោះទេ ប៉ុន្តែត្រូវគិតទៅដល់ការងារដែលខ្លួនចង់ធ្វើ មានន័យថា ក្រោយរៀនជំនាញចប់ ការអនុវត្តការងារជាក់ស្ដែងបែបណា។

ប៉ុន្តែបើករណីឪពុកម្ដាយរៀបចំឱ្យ​រៀនជំនាញណាមួយ ប៉ុន្តែខ្លួនមិនស្រឡាញ់​ បើតាម​លោក ភាព សុភ័ក ករណីនេះ យើងជាកូនត្រូវតែក្លាហានហ៊ានបើកចិត្តក្នុងការនិយាយប្រាប់ទៅឪពុកម្ដាយ ហើយឪពុកម្ដាយគួរតែស្ដាប់កូន នៅពេលកូនលើកហេតុផលសមស្រប។ ការធ្វើបែបនេះ ដើម្បីកុំឱ្យខាតពេលវេលា និងថវិកាឱ្យកូនរៀនជំនាញដែលមិនបានពេញចិត្ត៕