ខណៈ​ដែលលទ្ធផល នៃការប្រឡងសញ្ញាបត្រមធ្យមសិក្សា​ទុតិយភូមិ ឬបាក់ឌុប ឆ្នាំសិក្សា​២០២២-២០២៣ គ្រោងប្រកាសនារសៀលថ្ងៃទី២៣ វិច្ឆិកា​ សម្រាប់រាជធានីភ្នំពេញ និង​ខេត្តកណ្តាល និងនៅព្រឹកថ្ងៃទី២៤ វិច្ឆិកា សម្រាប់បណ្តាខេត្តផ្សេងៗទៀត អ្នកនាំពាក្យក្រសួងអប់រំ យុវជន និងកីឡា បញ្ជាក់ថា លទ្ធផលនេះ នឹងគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា នៅក្នុងអំឡុងពេលកែសន្លឹកកិច្ចការ គ្រូដែលជាអ្នកកែបានស្រង់ពិន្ទុបេក្ខជនប្រឡងចូលទៅក្នុងបណ្ណសម្រង់ពិន្ទុ រួចឆ្លងកាត់ការផ្ទៀងផ្ទាត់ចំនួនបួនតំណាក់កាលសំខាន់ៗ ទើបបញ្ជូនមកដល់ដំណាក់កាលបូកស្រង់ពិន្ទុដោយកុំព្យូទ័រ។

លោកជំទាវ ឃួន វិច្ឆិកា បន្ថែមថា អ្នកបញ្ចូលពិន្ទុដោយកុំព្យូទ័រ គឺជាបុគ្គលិកអប់រំដែលធ្វើតេស្តជាប្រចាំរៀងរាល់ឆ្នាំអំពីសមត្ថភាពបញ្ចូលពិន្ទុបានល្អ និងមិនមានកំហុស។ នៅពេលបញ្ចូលរួចក្រដាសលទ្ធផលដែលព្រីនចេញ និងកឹបជាប់ជាមួយក្រដាសសម្រង់ពិន្ទុដែលយកចេញពីមណ្ឌលកំណែ ទើបមានអនុកម្មការម្នាក់ទៀតជាអ្នកផ្ទៀងផ្ទាត់ ដោយធានាថា ពិន្ទុពិតជាត្រឹមត្រូវ​និងមិនមានបញ្ហា ។

«ក្នុងករណីរកឃើញថា ពិន្ទុបញ្ចូលខុស គឺត្រូវបញ្ចូលឡើងវិញ និងត្រួតពិនិត្យឡើងវិញរហូតរកឃើញថាលែងមានកំហុស»

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា

បើតាមការបញ្ជាក់របស់ អ្នកនាំពាក្យក្រសួងអប់រំ ក្នុងដំណើរការបូកស្រង់ពិន្ទុក៏មានកិច្ចសហការជាមួយអង្គភាពប្រឆាំងអំពើពុករលួយ ក៏ដូចជាបំពាក់កាម៉េរាសុវត្ថិភាពក្នុងបន្ទប់ធ្វើការទាំងអស់ដើម្បីពិនិត្យមើលអំពីភាពសុក្រិត និងតម្លាភាពក្នុងការធ្វើការ។

លោកជំទាវបណ្ឌិត ឃួន វិច្ឆិកា បញ្ជាក់បន្តថា ជាគោលការណ៍ក្រសួងអប់រំ មិនលើកទឹកចិត្តឱ្យបេក្ខជនតវ៉ាលទ្ធផលប្រឡងបាក់ឌុបនោះទេ ពីព្រោះក្រសួងអប់រំ បានខិតខំប្រឹងប្រែងថែរក្សាភាពសុក្រិតដូចគោលការណ៍ដែលបានចែង គឺក្រសួងអប់រំអនុវត្តការប្រឡងនេះដោយស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន៕