ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានឱ្យដឹងថា ដោយមានការយកចិត្តទុកដាក់ខ្ពស់បំផុតពី សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និស្សិតខ្មែរចំនួន ១៧២នាក់ដែលបានវិលត្រឡប់ពីប្រទេសថៃ នឹងទទួលបាន “អាហារូបករណ៍សម្តេចតេជោ” ដើម្បីមកបន្តការសិក្សានៅតាមគ្រឹះស្ថានឧត្តមសិក្សាសាធារណៈ និងឯកជន ក្នុងប្រទេសកម្ពុជាវិញ។
លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា និស្សិតអាហារូបករណ៍នៅប្រទេសថៃមានចំនួនសរុប ១៨៧១នាក់ សិក្សាថ្នាក់បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត។ លោកជំទាវបន្តថា គិតមកត្រឹមថ្ងៃទី៣១ ខែកក្កដានេះ គឺមាននិស្សិត ១៧២នាក់ សម្រេចចិត្តមកបន្តការសិក្សានៅប្រទេសកម្ពុជាវិញ។
អ្នកនាំពាក្យក្រសួងអប់រំ បញ្ជាក់ថា ក្រសួងអប់រំ នឹងផ្ដល់អាហារូបករណ៍ដល់និស្សិតខ្មែរដែលត្រឡប់មករៀនក្នុងប្រទេសវិញ ដែលមានជំនាញទាំងផ្នែកអប់រំ សុខាភិបាល វិទ្យាសាស្ត្រ និងសិក្សាសង្គម ពោលគឺមានចម្រុះមុខជំនាញ តាំងពីកម្រិតបច្ចេកទេស ថ្នាក់បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត។
យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា ចាប់តាំងពីមានការផ្ទុះអាវុធនៅតាមបណ្តោយព្រំដែនកម្ពុជា-ថៃ នាថ្ងៃទី២៤ ខែកក្កដា ឆ្នាំ២០២៥ រហូតដល់ព្រឹកថ្ងៃទី៣០ ខែកក្កដា ឆ្នាំ២០២៥ និស្សិតដែលបានវិលត្រឡប់ពីប្រទេសថៃមកកាន់ប្រទេសកម្ពុជាវិញមានចំនួន ៤២៣នាក់។ និស្សិតចំនួន១៧២នាក់ ក្នុងចំណោម ៤២៣នាក់ បានស្នើសុំអាហារូបករណ៍ពីក្រសួងអប់រំ យុវជន និងកីឡា ដើម្បីបន្តការសិក្សានៅតាមបណ្តាគ្រឹះស្ថានឧត្តមសិក្សាសាធារណៈ និងឯកជនក្នុងប្រទេសកម្ពុជា៕
