ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីបិទកម្មវិធីប្រកួតប្រជែងអំណានភាសាអង់គ្លេស និងអំណានល្បី (X-Reading and Great Book Program Competition) កាលពីដើមសប្តាហ៍នេះ ឯកឧត្តមបណ្ឌិត អ៊ុម រម្យណី រដ្ឋលេខាធិការនៃក្រសួងអប់រំ យុវជន និងកីឡា បានជំរុញឱ្យយុវជនជាសិស្សានុសិស្សទាំងអស់បន្តទម្លាប់នៃការអាន ដើម្បីសិក្សាស្វែងយល់ចំណេះដឹងថ្មីៗនៃពិភពលោក និងធ្វើជាគំរូល្អដល់មនុស្សជុំវិញខ្លួន។
ជាមួយគ្នានេះ ឯកឧត្តមរដ្ឋលេខាធិការ ក៏បានកោតសរសើរ និងវាយតម្លៃខ្ពស់ចំពោះភាពក្លាហាន និងសមត្ថភាពរបស់សិស្សានុសិស្សដែលចូលរួមកម្មវិធីប្រកួត ក្នុងការអាន វិភាគ និងបកស្រាយរឿងនិទានជាភាសាខ្មែរ និងភាសាអង់គ្លេសយ៉ាងស្ទាត់ជំនាញ។ ឯកឧត្តមបណ្ឌិត អ៊ុម រម្យណី លើកឡើងថា ព្រឹត្តិការណ៍នេះ មិនត្រឹមតែជាការប្រកួតប្រជែងឈ្នះចាញ់មួយថ្ងៃនោះទេ ប៉ុន្តែជារង្វាន់នៃការបណ្ដុះទម្លាប់អាន និងទំនុកចិត្តពេញមួយជីវិត តាមរយៈការប្រើប្រាស់ជំនាញសតវត្សរ៍ទី២១ រួមមាន ការវិភាគស៊ីជម្រៅ (Critical Thinking) ការប្រាស្រ័យទាក់ទង និងភាពច្នៃប្រឌិត។
”អ្វីដែលសំខាន់ គឺក្មួយៗបានឈ្នះចិត្តខ្លួនឯង និងទទួលបានចំណេះដឹងពិតប្រាកដសម្រាប់អនាគតដ៏ភ្លឺស្វាង”
ឯកឧត្តមបណ្ឌិត អ៊ុម រម្យណី បញ្ជាក់ថា កម្មវិធីអំណានត្រូវបានកំណត់ជាយន្តការគន្លឹះក្នុងទិសដៅកំណែទម្រង់ការសិក្សាអប់រំ ដោយភ្ជាប់ការប្រើប្រាស់ភាសាអង់គ្លេស និងវប្បធម៌នៃការអាន ទៅនឹងការផ្លាស់ប្ដូរវិធីសាស្ត្របង្រៀនបែបវិភាគស៊ីជម្រៅ ស្របតាមលំនាំនៃការវាយតម្លៃស្ដង់ដាអន្តរជាតិ PISA។ បទពិសោធ និងគំរូជោគជ័យពីសាលារៀនជំនាន់ថ្មីទាំង១២ នឹងត្រូវដកស្រង់ដើម្បីពង្រីកវិសាលភាពទៅកាន់សាលារៀនដទៃទៀតនៅទូទាំងប្រទេសកម្ពុជា សំដៅលើកកម្ពស់គុណភាពអប់រំជាតិទាំងមូល។
កម្មវិធីប្រកួតប្រជែងអំណានភាសាអង់គ្លេស និងអំណានល្បី (X-Reading and Great Book Program Competition) រៀបចំឡើងដោយអង្គការ KAPE សហការជាមួយក្រសួងអប់រំ យុវជន និងកីឡា ក្នុងគោលបំណងបណ្តុះទម្លាប់នៃការអាន ជំរុញការគិតពិចារណាឱ្យបានស៊ីជម្រៅ និងបើកឱកាសឱ្យយុវជនបានបញ្ចេញសមត្ថភាព បង្ហាញទស្សនៈ ក៏ដូចជាផ្លាស់ប្តូរចំណេះដឹងល្អៗចេញពីសៀវភៅល្បីៗ។
គួរជំរាបជូនថា ការប្រកួតប្រជែងអំណានភាសាអង់គ្លេស និងអំណានល្បីៗ សិស្សានុសិស្សនៃវិទ្យាល័យ ហ៊ុន សែន កំពង់ចាម សាលារៀនជំនាន់ថ្មី ទទួលបានចំណាត់ថ្នាក់លេខ១, សិស្សានុសិស្សនៃវិទ្យាល័យសម្តេចអគ្គមហាធម្មពោធិសាល ជាស៊ីម ព្រែកអញ្ចាញ ទទួលបានជ័យលាភីលេខ២, សិស្សានុសិស្សនៃវិទ្យាល័យព្រះអង្គឌួង សាលារៀនជំនាន់ថ្មី ទទួលបានជ័យលាភីចំណាត់ថ្នាក់លេខ ៣ និងសិស្សានុសិស្សនៃវិទ្យាល័យគោកព្រីង ទទួលបានចំណាត់ថ្នាក់លេខ៤៕
