ក្រុមការងារផ្នែកវប្បធម៌ និងកីឡា នៃសមាគមន៍និស្សិតខ្មែរនៅសាធារណរដ្ឋកូរ៉េ ឬហៅកាត់ថា CSAK កាលពីសប្តាហ៍មុន បានរៀបចំកម្មពិធី «ស្វាគមន៍ឆ្នាំថ្មីប្រពៃណីជាតិខ្មែរ» ផ្សារភ្ជាប់ «ការប្រកួតបាល់ទាត់ផ្នែកបុរស» ឬហៅជារួមថា សង្ក្រាន្តនិស្សិត ដើម្បីស្វាគមន៍ និងទទួលទេវតាឆ្នាំថ្មីដើម្បីជុំនិស្សិតខ្មែរ និងប្រជាពលរដ្ឋខ្មែរកំពុងរស់នៅប្រទេសកូរ៉េ។

លោក ខ្វាត ប៊ុនរ័ត្ន សមាជិកទទួលបន្ទុកការងាររដ្ឋបាលនៃ CSAK បាន​ឱ្យ​ដឹងថា កម្មវិធីនេះបានប្រារព្ធឡើងនៅទីក្រុងសេអ៊ូល ដោយមានជាសកម្មភាពជាច្រើនដែលបានរៀបចំដោយនិស្សិតខ្មែរ និងបងប្អូនប្រជាពលរដ្ឋខ្មែរនៅប្រទេសកូរ៉េផ្ទាល់។ កម្មវិធីមានការតាំងពិព័រណ៌ជាផលិតផលខ្មែរដូចជា ក្រម៉ាខ្មែរ​ សម្លៀកបំពាក់ប្រពៃណី ឧបករណ៍ភ្លេងខ្មែរ ដូចជាស្គរ រនាដ ចម្លាក់ប្រពៃណី វត្ថុអនុស្សាវរីយ៍ និងមានតាំងម្ហូបខ្មែរ បង្អែមខ្មែរឱ្យបានទទួលទាន និងការលេងល្បែងកម្សាន្តប្រជាប្រិយខ្មែរជាច្រើន។

លោក ខ្វាត ប៊ុនរ័ត្ន បានបន្តថា កម្មពិធីនេះ បានបង្កភាពស្និតស្នាលដល់ប្រជាពលរដ្ឋខ្មែរដែលកំពុងរស់នៅប្រទេសកូរ៉េនេះ និងជួយឱ្យកាត់បន្ថយការនឹកផ្ទះបានមួយកម្រិតដែរ ។ លើសពីនេះ កម្មវិធីប្រកួតបាល់ទាត់មិត្តភាព បានធ្វើឡើងដើម្បីនិស្សិតខ្មែរដែលនៅសាកលវិទ្យាល័យផ្សេងៗគ្នាបានលេងបាល់ និងជួបជុំគ្នា ថែមទាំងរក្សាមិត្តភាពរវាងនិស្សិតខ្មែរទាំងអស់ឱ្យ​បានស្គាល់ និងកាន់តែជិតស្និត។

បើតាមលោក ប៊ុនរ័ត្ន កម្មវិធីដែល​ធ្វើឡើងកាលពីថ្ងៃទី៦ ខែមេសា ឆ្នាំ២០២៤ មានជាការចូលរួមផ្តល់កិត្តិយសពីលោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ព្រមជាមួយ​សិស្សនិស្សិតខ្មែរ និងបងប្អូនសហគមន៍ខ្មែរកំពុងរស់នៅប្រទេសកូរ៉េផងដែរ។ 

គួរបញ្ជាក់ដែរថា លោក ខ្វាត ប៊ុនរ័ត្ន ជានិស្សិតអាហារូបករណ៍ខ្មែរដែលកំពុងបន្តការសិក្សាថ្នាក់បរិញ្ញាបត្រជាន់ខ្ពស់នៅសាកលវិទ្យាល័យកូរ៉េ ជំនាញ សុខភាព និងសុវត្ថិភាពការងារនៅសាកលវិទ្យាល័យជាតិវេជ្ជសាស្ត្រ និងបច្ចេកវិទ្យាសេអ៊ូល ឬហៅកាត់ថាSEOUTECH និងជាសមាជិកនៃសមាគមន៍និស្សិតខ្មែរនៅសាធារណរដ្ឋកូរ៉េ៕