នៅ​ក្នុង​ឆ្នាំសិក្សា២០២៥-២០២៦នេះ ក្រសួងអប់រំ យុវជន និងកីឡា នឹងបន្តលើកកម្ពស់បរិវត្តកម្មអប់រំឌីជីថល តាមរយៈការអនុវត្តកម្មវិធីអប់រំបង្កើតហ្គេម នៅតាមសាលារៀនគោលដៅនៅទូទាំងប្រទេស ដោយផ្តោត​សំខាន់ក្នុងការបណ្ដុះបំណិនសតវត្សរ៍ទី២១ ដល់សិស្សានុសិស្សនៅតាមសាលារៀន។

បើតាម​ក្រសួងអប់រំ កម្មវិធីនេះមិនត្រឹមតែផ្ដោតលើទ្រឹស្តីប៉ុណ្ណោះទេ ប៉ុន្តែជាការបើកឱកាសឱ្យសិស្សានុសិស្សបានអនុវត្តផ្ទាល់តាមរយៈយុទ្ធសាស្ត្រ “លេង និងរៀន” ដើម្បីប្រែក្លាយពួកគេពីអ្នកប្រើប្រាស់ ឱ្យទៅជាអ្នកបង្កើតប្រកបដោយនវានុវត្តន៍។ ក្នុងសកម្មភាពជាក់ស្តែង សិស្សានុសិស្សបានរៀនសរសេរកូដ រចនាតួអង្គឌីជីថល និងសហការគ្នាជាក្រុមដើម្បីដោះស្រាយបញ្ហាក្នុងសហគមន៍តាមរយៈការបង្កើតហ្គេម ដោយ​សកម្មភាពទាំងនេះ ស្របតាមវិធានគន្លឹះ និងយុទ្ធសាស្ត្របរិវត្តកម្មឌីជីថលរបស់ក្រសួងអប់រំ យុវជន និងកីឡា ក្នុងការប្រែក្លាយសាលារៀនឱ្យទៅជាកន្លែងដែលសិស្សមិនមែនត្រឹមតែជាអ្នករៀន ឬអ្នកប្រើប្រាស់ តែជា “អ្នកបង្កើតប្រកបដោយនវានុវត្តន៍” និងត្រៀមខ្លួនទទួលយកបច្ចេកវិទ្យាថ្មីនាពេលអនាគត។

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា មានប្រសាសន៍ថា ការបង្កើតក្លឹបសិក្សាឌីជីថលក្រៅម៉ោងសិក្សា នៅតាមសាលារៀន គឺជារឿងចាំបាច់បំផុតក្នុងសម័យកាលនេះ ព្រោះរាល់ការសិក្សា ការប្រកបអាជីវកម្ម និងការដឹកនាំ សុទ្ធតែប្រើប្រាស់ប្រព័ន្ធឌីជីថល។

លោកបណ្ឌិត ឈត ប៊ុនថង បញ្ជាក់ថា ប្រសិនបើបណ្ដុះយុវជនតាំងពីក្មេងមក ពេលពួកគេរៀន និងធ្វើការ ហើយ​ពួកគេ​នឹងមានសមត្ថភាពខ្ពស់។ “បច្ចុប្បន្នយើងមានទាំង AI បណ្ដាញសង្គម និងកម្មវិធីស្រាវជ្រាវកម្រិតខ្ពស់ សូម្បីតែក្នុងវិស័យការពារជាតិក៏គេប្រើឌីជីថលបញ្ជាដ្រូនដែរ ដូច្នេះការយល់ដឹងផ្នែកនេះ គឺដើរស្របតាមការវិវត្តនៃពិភពលោក”។

ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា បានផ្ដល់អនុសាសន៍ថា អនាគតទៅកម្មវិធីឌីជីថលមិនគួរមានត្រឹមតែក្រៅម៉ោងសិក្សានោះទេ ប៉ុន្តែត្រូវដាក់បញ្ចូលទៅក្នុងម៉ោងសិក្សាផ្លូវការនៅគ្រប់សាលារៀន។ លោកបណ្ឌិតបន្តថា រាជរដ្ឋាភិបាល និងភាគីពាក់ព័ន្ធគួរពិចារណាដាក់ទុនវិនិយោគបន្ថែមលើការរៀបចំផែនការមេ ការបណ្ដុះបណ្ដាលគ្រូ និងការបំពាក់សម្ភារៈបច្ចេកវិទ្យា ក៏ដូចជាប្រព័ន្ធអ៊ីនធឺណិតឱ្យបានទូលំទូលាយ។

លោកបណ្ឌិត ឈត ប៊ុនថង យល់ថា ប្រសិនបើយុវជនចេះបង្កើតហ្គេមបែបអប់រំ វានឹងផ្ដល់ប្រយោជន៍ទ្វេដង គឺទាំងការកម្សាន្តកាត់បន្ថយស្ត្រេស និងការទទួលបានចំណេះដឹងផ្នែកភូមិសាស្ត្រនយោបាយ ប្រវត្តិសាស្ត្រ និងបច្ចេកវិទ្យា។ ទន្ទឹមគ្នានេះ ក៏ត្រូវបង្រៀនសិស្សឱ្យចេះប្រើប្រាស់បណ្ដាញសង្គម និង AI ឱ្យបានត្រឹមត្រូវ ដើម្បីជៀសវាងការចាញ់បោកគេ ឬរងគ្រោះដោយសារប្រព័ន្ធឌីជីថល។

ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា ជឿជាក់ថា កាលណាសិស្សានុសិស្សមានមូលដ្ឋានគ្រឹះឌីជីថលរឹងមាំ ពួកគេនឹងមានសមត្ថភាពប្រកួតប្រជែងខ្ពស់ អាចជជែកពិភាក្សា និងធ្វើការងារស្មើមុខស្មើមាត់ជាមួយប្រជាជនក្នុងតំបន់ និងនៅលើពិភពលោកក្នុងសម័យកាលដ៏ទំនើបនេះ៕